“MƏNİ SƏHV BAŞA DÜŞÜBLƏR” Metyu Brayza növbəti dəfə dediklərini dandı: “Reallıq budur ki, biz Azərbaycanın ərazi bütövlüyünü qəbul etməklə iş aparırıq” Xəbər verildiyi kimi ötən həftə Ermənistan və Azərbaycan xarici işlər nazirləri arasında Moskvada aparılmış danışıqlardan sonra “İnterfaks” agentliyinə müsahibə verən amerikalı həmsədr Metyu Brayza Dağlıq Qarabağın statusunun referendumda müəyyən ediləcəyini deyib. Amerika dövlət katibinin köməkçisinin bu sözləri Azərbaycanda qəzəblə qarşılanıb, Abxaziya, Cənubi Osetiya və Dağlıq Qarabağ separatçılarını isə ruhlandırıb. Diplomat demişdi ki, danışıqlarda müzakirə edilən təkliflər Dağlıq Qarabağın gələcək statusunun orada yaşayan əhali tərəfindən səsvermə yoluyla müəyyən edilməsini nəzərdə tutur. Lakin BBC-yə eksklüziv müsahibəsində Dağlıq Qarabağın gələcəyi barədə geniş əks-səda doğurmuş bəyanatını şərh edən Amerika diplomatı sözlərinin səhv yozulduğunu bildirib:"İnterfaks"da dərc edilmiş müsahibəni oxumuş bəzi adamlar, mənim dediklərimin yalnız bir hissəsini oxuyublar və sonra onu səhv yozublar. Çünki onlarda baş verənlərin bütün detalları yoxdur. Buna görə də onlar nüansları nəzərə almırlar. Azərbaycanda elə başa düşüblər ki, mən Dağlıq Qarabağ sakinlərinin yaxın vaxtlarda öz gələcəklərini müəyyən edəcəklərini demişəm. Yəni Qarabağın siyasi statusu barədə. Əslində isə mən demişdim ki, geniş bir təkliflər paketi var." Brayzanın sözlərinə görə, söhbət yalnız Minsk Qrupu həmsədrlərinin masa üzərinə qoyduqları təkliflərdir. Bura rayonların azad edilməsi, didərginlərin qaytarılması və sairə daxildir. “Buraya müəyyən formada səsvermə də daxil ola bilər. Mən deyə bilmərəm ki, bu referendum ola bilər, ya plebistsit, yalnız hansısa formada səsvermə ki, burada Dağlıq Qarabağ sakinləri iştirak edə bilərlər. Bu bizim hazırda dəqiq deyə bilmədiyimiz bir gələcək vaxtda baş verə bilər. Lakin bu ancaq didərginlərin öz vətənlərinə dönməsindən sonra baş verə bilər və bunu dünən Novruz Məmmədov da deyib. İstənilən saziş tərəflər arasında əldə edilməlidir”,-deyə Brayza əlavə edib. Amerikalı diplomatın bu izahına qane olmayan BBC əməkdaşı ona bu sualla müraciət edib: “İnterfaksdakı müsahibədə sizə istinadən yazılıb ki, ”qarabağlılar özləri Azərbaycan tərkibində qalıb-qalmayacaqlarına dair qərar verə bilərlər". Axı Azərbaycan deyir ki, sülh sazişinin hansı formada olmasından asılı olmayaraq, Dağlıq Qarabağ Azərbaycanın tərkibində qalmalıdır. Referendum və ya səsvermə yalnız bölgənin hansı statusla Azərbaycanda qalacağını müəyyən edə bilər. Bəlkə buna görə Azərbaycan hökuməti müsahibəyə belə reaksiya verib?" Brayza isə deyib ki, “İnterfaks”ın nəyisə dərc etməsi, onun dəqiq olması demək deyil: “Mən təhriflər, düzgün sitatların gətirilməməsinə çox vaxt sərf edirəm. Bu halda biz dediklərimin səhv yozulmasını görürük. Reallıq budur ki, biz Azərbaycanın ərazi bütövlüyünü qəbul etməklə iş aparırıq, qurtardı getdi.” Daha sonra Brayza ilə BBC əməkdaşı arasında bu dialoq olub: - Və heç bir referendum bunu dəyişə bilməz? - Biz Azərbaycanın ərazi bütövlüyünü tanıyırıq. Bu beynəlxalq prinsip çox yüksək diplomatik statusa malikdir. Eyni zamanda siyasi prinsiplər də var ki, bu, erməni tərəfi üçün vacibdir. Əgər razılıq əldə ediləcəksə, deməli razılıq iki tərəfdən imzalanmalıdır. Beləliklə, tərəflər əvvəlcədən razılaşdırılmış platforma, yəni Azərbaycanın ərazi bütövlüyü üzərində razılıq əldə etməlidirlər. Amma bu razılıq digər tərəfin əhəmiyyət verdiyi siyasi razılıqları da nəzərə almalıdır. Biz hazırda belə bir sazişin əldə edilməsinə çalışırıq. - Cənab Brayza, bəs siz bu müsahibə ilə bağlı Azərbaycan Xarici İşlər Nazirliyi ilə əlaqə saxlamısınızmı, onlara bu barədə izahat vermisizmi? - Bəli, təbii ki vermişik. - Bəs niyə sizin izahatınız Azərbaycan ictimaiyyətinə çatdırılmayıb? - Bu sualı onlara vermək lazımdır. Amma əminəm ki, Azərbaycan bizim hansı mövqedə olduğumuzu yaxşı bilir. Qeyd edək ki, Azərbaycan Xarici İşlər Nazirliyinin sözçüsü Xəzər İbrahim bu həftənin əvvəlində keçirdiyi brifinq zamanı Brayzanın dünən dediklərini bu gün dandığını demişdi. Yəni göründüyü kimi, amerikalı diplomatın dəfələrlə dediyi sözlərdən geri çəkilməsi və jurnalistlərin onun sözlərini təhrif etdiyini bildirməsi rəsmi Bakıda da onun mövqeyinə şübhələr yaradıb. Brayza Minsk Qrupuna artıq 3 ildir həmsədrlik edir və bu müddət ərzində danışıqlar prosesinin gedişi haqda ən çox informasiya, şərh verən də o olub. Amerikalı diplomat hər dəfə danışıqlar olanda həvəslə jurnalistlərlə təmasa girir və prosesin gedişi haqda bir çox hallarda bu cür qalmaqal yaradan açıqlamalar verir. Ancaq məsələ böyüyən kimi sözlərinin düzgün anlaşılmadığını bildirir. Bir tərəfdən Brayzanın danışması yaxşıdır, onun dedikləri Azərbaycan ictimaiyyətinə bağlı qapılar arxasında aparılan danışıqlar haqda müəyyən informasiya verir və bəlli olur ki, danışıqlarda Dağlıq Qarabağın statusunun gələcəkdə səsvermə yoluyla müəyyən edilməsi kimi təhlükəli element var. Ancaq digər tərəfdən Brayza dediyi sözlərdən o qədər geri çəkilib ki, artıq onun nəyi doğru dediyini də ayrıd etmək çətinləşib. Siyasət şöbəsi musavat