İRAN “ALTILAR”ın HƏDƏSİNƏ MƏHƏL QOYMADI ABŞ və Avropa Birliyi bu gün Tehrana qarşı sonrakı addımlar haqda müzakirələrə başlayır Xəbər verildiyi kimi, BMT Təhlükəsizlik Şurasının 5 üzvü və Almaniyanın (“altılar”) İrana verdiyi iki həftəlik müddət ötən şənbə günü başa çatıb. “Altılar” İrandan Cenevrədə nüvə proqramlarının həllinə dair təqdim edilmiş stimul paketinə iki həftə müddətində cavab verməyi tələb edirdi. Bu müddət başa çatsa da İrandan təkliflərə dair heç bir rəsmi cavab verilməyib. Tehranın cavabının İranla danışıqlara başçılıq edən Avropa Birliyinin xarici siyasət və təhlükəsizlik üzrə ali nümayəndəsi Havyer Solanaya göndəriləcəyi gözlənilirdi. Lakin şənbə günü Solananın ofisindən bildiriblər ki, Tehrandan reaksiya yoxdur. “Altılar”ın təkliflərinə görə, İran zənginləşdirilmiş uran proqramlarını dayandırsa, Qərblə sərfəli əməkdaşlıq edə bilər. Lakin Tehran əvvəlcədən elan edib ki, o, nüvə proqramlarını dayandırmaq fikrində deyil və ultimatumları qəbul etmir. “Röyter” agentliyi Avropa Birliyinin nümayəndəsinə istinadən xəbər verib ki, İranın cavabı üçün daha bir neçə gün gözləmək qərara alınıb. “Nəzərə aldıq ki, istirahət günləridir və daha iki gün gözləyək”- deyə avropalı diplomat bildirib. Qeyd edək ki, şənbə və bazar günləri İranda rəsmi iş günləridir. ABŞ da bəyan edib ki, müddətin başa çatmasından sonra İrandan iki gün ərzində cavab gözləyir. Dövlət Departamentinin nümayəndəsi Qonsalo Qoleqos bildirib ki, Tehran təkliflərə cavabını ən geci bu gün təqdim etməlidir. Əks halda elə həmin gün İrana qarşı yeni sanksiyalarla bağlı müzakirələr başlayacaq. Qərbin ultimatumunun müddəti başa çatdığı gün İran prezidenti Mahmud Əhmədinejad Tehranda Suriya prezidenti Bəşər Əsədi qəbul edib. B.Əsəd İranın dinc nüvə çalışmalarına dəstək verərək bildirib ki, yaranmış gərginlik yalnız diplomatik yolla həll ediməlidir. Mahmud Əhmədinejad bildirib ki, o, İranın nüvə proqramı ilə bağlı danışıqlara başlamağa hazırdır. İran prezidenti bu sözləri Tehranda Bəşər Əsədlə birgə keçirdiyi mətbuat konfransında bildirib. Bundan əvvəl isə M.Əhmədinenejad demişdi ki, nüvə proqramı ilə bağlı bir addım belə geri çəkilməyəcək. O, mətbuat konfransında da danışıqlara hazır olduğunu, amma İranın geri çəkilmək fikrində olmadığını bildirib. Bildirilir ki, Əhmədinejad beynəlxalq ictimaiyyətin nüvə proqramını dondurmaq barədə İrana verdiyi vaxtın bu həftə başa çatması barədə heç bir söz deməyib. Bəşər Əsəd isə İranla beynəlxalq ictimaiyyət arasında vasitəçi olmaq üçün Tehrana gəlməsi barədə deyilənləri təkzib edib. İran Xarici İşlər Nazirliyi isə “altılar”ın iki həftəlik müddətinin başa çatması ilə bağlı Tehranın heç kimdən bu cür ultimatum qəbul etmədiyini açıqlayıb. Beləliklə, İranla Qərb arasında gərginlik yenidən arta bilər. Doğrudur, Birləşmiş Ştatlar İranın nüvə problemini ancaq diplomatik yolla həll etməyə çalışacaqlarını, hərbi güc tətbiqinin ən son variant olduğunu bildirir. Lakin İsrail diplomatik səylərin nəticə vermədiyini görərək İranın nüvə obyektlərini təkbaşına vurmağa cəhd edə bilər. Hələlik ABŞ Avropa Birliyi ilə İranın təklifləri rədd etməsi halında Tehrana qarşı yeni iqtisadi və maliyyə sanksiyalarının tətbiqini nəzərdə tutur. Ehtimal olunan sanksiyalar Avropa şirkətlərinin İrandan çəkilməsi və bu ölkəyə göndərilən istənilən yükün saxlanılaraq yoxlanılması barədə ola bilər. Xəbər xidməti musavat