ÇEYNİ İRANA QARŞI TƏXRİBAT HAZIRLAYIR Məşhur amerikalı jurnalist Seymur Herş ABŞ-ın müharibəyə başlamaq üçün bəhanə axtardığını bildirib ABŞ İrana zərbə endirmək üçün bəhanə axtarır. Bu barədə tanınmış jurnalist, “The New Yorker” qəzetinin əməkdaşı Seymur Herş bildirib. İsrail mənbələrinin məlumatına görə, S.Herş deyib ki, Amerika administrasiyasının bir sıra yüksək rütbəli nümayəndələri bugünlərdə vitse-prezident Dik Çeyninin iqamətgahında görüş keçiriblər. Administrasiyadakı mənbədən S.Herşə məlum olub ki, görüşdə məqsəd İrana qarşı hərbi əməliyyatları legitimləşdirmək məsələsinin müzakirəsi olub. Jurnalistin bildirdiyinə görə, bir neçə ay əvvəl Fars körfəzində İran katerinin Amerika hərbi gəmisinə hücum etməsindən sonra administrasiya başa düşüb ki, qərar kifayət qədər əsaslandırılsa, Amerika ictimaiyyəti İrana qarşı hərbi əməliyyatları dəstəkləməyə hazırdır. S.Herşin qənaətincə, İrana qarşı müharibə bəhanəsi tapmaq yönündə müzakirələr zamanı bu ideya daha çox müzakirə edilib: ABŞ dəniz piyadalarının xüsusi təyinatlı dəstələrinə İran hərbi formasını geydirmək və onları 4-5 sürətli katerdə yerləşdirib Amerika donanmasına məxsus gəmilərə hücum təşkil etmək. Qalmaqallı araşdırmaları və sensasion məlumatları ilə tanınan təcrübəli jurnalistin bildirdiyinə görə, görüşdə 10-a yaxın ideya müzakirə edilib. Onlardan ən maraqlısı isə bu olub ki, İran donanmasının istifadə etdiyi sürətli katerlərdən eynisini düzəltmək və onlarda İran forması geymiş Amerika əsgərlərini oturtmaqla Hörmüz körfəzində hücum təşkil etmək olar. Lakin S.Herşin dediyinə görə, ideya rədd edilib, çünki bu halda Amerika əsgərləri bir-birinə atəş açmalı olacaqdılar. Digər bəhanələr üzərində müzakirələri isə davam etdirmək qərara alınıb. Bildirilir ki, ABŞ İraqa qarşı da bu cür təxribat ssenarilərini müzakirə edib. Belə təxribatlardan biri BMT rəngində rənglənmiş Amerika təyyarəsinə İraq tərəfdən atəş açılması variantı üzərində qurulub. Lakin o vaxt həmin ideyadan imtina ediblər və Amerika administrasiyası çox da baş sındırmadan İraqa qarşı hər hansı ciddi əsas olmadan müharibəyə başlayıb. Qeyd edək ki, İrana qarşı hərbi əməliyyatlar hazırda ABŞ-ın gündəmində deyil. Lakin məlumatdan görünür ki, İranın vurulmasını ən çox istəyən vitse-prezident Dik Çeyni öz planlarını reallaşdırmaq üçün hələ də variantlar axtarır. İsrail isə təkbaşına İranı vurmaq planları qurur. Artıq İranla İsrail arasında mümkün müharibənin ssenariləri haqda müzakirələr gedir. Pentaqon rəhbərliyi və tanınmış hərbi ekspertlər isə xəbərdarlıq edirlər ki, yəhudi dövləti İrana qarşı təkbaşına hücum etməklə ciddi risklə qarşılaşa, nəinki öz təhlükəsizliyini, eyni zamanda bölgədəki vəziyyəti təhlükədə qoya bilər. Xəbər xidməti musavat