Ermənilər "soyqırım" iddialarına özləri də inanmır Ruben Akopyan: "Əgər komissiya qərara gəlsə ki, soyqırım ümumiyyətlə olmayıb, o zaman Ermənistan prezidenti nə edəcək?" "Lragir" agentliyi: "Ermənistanın nefti yoxdur, molibdenlə isə nüfuzumuzu yalnız Lixtenşteynin gözündə yüksəltmək olar" Ermənistanın Sankt-Peterburqdakı sabiq konsulu, hazırda isə "Akunk" siyasi təhlil mərkəzinin rəhbəri Ruben Akopyan öz ölkəsinin xarici siyasətinin tamamilə iflasa uğradığını bəyan edib. Onun sözlərinə görə, rəsm İrəvan tərəfindən yürüdülən zəif siyasət kursu ölkə Ermənistan üçün taleyüklü nəticələrə gətirib çıxara bilər: "Mən uzun illərdir ki, siyasi fəaliyyətlə məşğulam, ancaq Ermənistanın xarici siyasət sahəsində bu günki qədər ciddi problemlərlə qarşılaşdığını xatırlamıram". Azər Ruben Akopyan Ermənistanın xarici siyasətinin perspektivsizliyi barədə fikirlərini prezident Serj Sərkisyanın 1915-ci ildə baş verən hadisələrin araşdırılması üçün Türkiyə ilə birgə komissiya yaradılmasına razılıq verməsilə əlaqələndirib: "Belə vəziyyətdə "soyqırım" məsələsinin dondurulması faktların öyrənilməsi məqsədilə komissiya yaradılmasına razı olmaqdan daha yaxşıdır. Əgər komissiya qərara gəlsə ki, soyqırım ümumiyyətlə olmayıb, o zaman Ermənistan prezidenti nə edəcək?". Akopyan hesab edir ki, Rusiya prezidenti Dmitri Medvedyevin Azərbaycana son səfəri və həmkarı İlham Əliyevlə bir sıra dövlətlərarası müqaviləyə imza atması da Ermənistanın xarici siyasətindəki boşluqlardan xəbər verir: "Təbii ki, mən son vaxtlar Rusiyanın Azərbaycan yönümlü siyasət yürütməsilə bağlı qənaətləri bölüşmürəm. Məncə bu, Rusiya yönümlü siyasətdir. Sadəcə biz doğru addımlar atmırıq. Əvvəl-axır başa düşməliyik ki, Rusiyanın da əbədi dostları yoxdur, dəyişməyən maraqları var". Rusiyanın maraqlarını nümayiş etdirən fakt kimi, sabiq diplomat Ermənistandan yan keçməklə Moskva-Bakı-Tehran dəmiryolu layihəsinin gerçəkləşməsinm də misal nümunə gətirib: "Bakı-Tiflis-Qars layihəsindən sonra bu Ermənistanın ikinci acınacaqlı məğlubiyyətidir". Akopyan Serj Sərkisyanın Türkiyə prezidenti Abdulla Gülü İrəvana dəvət etməsinə də kinayə ilə yanaşıb: "Hakimiyyət konkret addımlar atmaq əvəzinə naz satmaqla məşğul olur". Qeyd edək ki, Ermənistanın xarici siyasətinin iflasa uğramasıyla bağlı düşkünlük təkcə Ruben Akopyanın açıqlamalarında deyil, bu ölkənin mətbuat orqanlarında dərc edilən müxtəlif yazılarda da nəzərə çarpır. Ermənistanın "Lragir" agentliyinin dünən yayımladığı "Qarabağ qırmızı yaylıqdır" adlı şərhdə isə bu ovqat daha çox nəzərə çarpır. ATƏT sədrinin xüsusi nümayəndəsi Heykki Talvitienin "Dağlıq Qarabağ münaqişəsinin yalnız Azərbaycanın ərazi bütövlüyü çərçivəsində həll oluna biləcəyi ilə bağlı bəyanatından iqtibas gətirən agentlik hesab edir ki, bu fakt mövcud vəziyyətin Ermənistan üçün nə qədər ağır olduğunu sübuta yetirir: "Ola bilsin ki, Talvitie İrəvanda tamamilə əks mövqedən çıxış etsin. ATƏT-in Vyanadakı mənzil-qərargahında, yaxud doğma Helsinki şəhərində bəyan etsin ki, Dağlıq Qarabağ münaqişəsini ümumiyyətlə həll etməyə ehtiyac yoxdur. Ona görə ki, ermənilər və azərbaycanlılar buna layiq deyillər". "Lragir" agentliyinin qənaətinə görə avropalı məmurların belə davranışlarını əsaslandıran amillərdən biri də münaqişənin tənzimlənməsilə bağlı müzakirələrin predmetinin ictimaiyyətə təqdim olunmamasındadır: "Hazırda bu sənəd Madrid prinsipləri adlandırılır. Əvvəllər isə Paris, Ki-Uest, Praqa şəhərlərinin adlarıyla çağırılırdı. Görəsən daha hansı şəhər vasitəçilərin xoşuna gələcək? Son zamanlar Rusiyanın fəallaşdığını nəzərə alsaq, müəyyən bir vaxtdan, yəni həmsədrlər və tərəflər "Madrid" sözündən yorulduqdan sonra, masa üzərinə "Moskva prinsipləri"nin qoyulacağını da gözləmək mümkündür". Erməni agentliyi ictimai rəyin vasitəçilərin və tərəflərin bəyanatlarında yer alan ziddiyyətli məqamlar arasında çaşıb qaldığını bildirir: "Ancaq reallıq ondan ibarətdir ki, vaxt keçir, Azərbaycan isə öz enerji resurslarını və bunun hesabına regiondakı siyasi və iqtisadi çəkinsini inkişaf etdirir. Ermənistanın nefti yoxdur, molibdenlə isə nüfuzumuzu yalnız Lixtenşteynin gözündə yüksəltmək olar. Abdulla Gül isə çox güman ki, futbola televizorla baxmağa üstünlük verəcək. Ermənistanın Türkiyə ilə münasibətləri yaxşılaşdırmaq yoluyla Azərbaycana zərbə vurmaq iddiaları isə dalana dirənəcək. Bütün bunlar sübuta yetirir ki, Qarabağla əlaqədar səslənən bəyanatlardan bir nə zamansa gerçəkliyə çevriləcək. Əgər artıq çevrilməyibsə... Baş verən proseslər isə Talvitienin son bəyanatı üçün tamamilə real əsas yaradır". xalqcebhesi