“TÜRKİYƏ SƏRHƏDLƏRİ AÇSA, SƏRKİSYANIN MÖVQEYİ GÜCLƏNƏCƏK” Ömər Engin Lütem: “Ermənistan bu məqsədinin reallaşmasına heç bir ciddi güzəştə getmədən çalışır” Türkiyə ilə Ermənistan arasındakı mümkün yaxınlaşma və tərəflərin bir-birinə göndərdiyi barışıq mesajları hələ də müzakirə predmeti olaraq qalmaqdadır. Bu mövzuda səfir Ömər Engin Lütemin Türkiyə mətbuatında dərc edilmiş məqaləsində (məqalə redaksiyamıza Türkiyənin Azərbaycandakı səfirliyindən daxil olub-red.) deyilir ki, Ankara-İrəvan münasibətlərinin tarixi Türkiyənin xoşməramlı addımları ilə kifayət qədər zəngindir. Lakin Ermənistan bunların əvəzində heç bir xoşməramlı addım atmayıb. Diplomat yazır ki, Türkiyə Ermənistanın müstəqilliyini ABŞ-dan daha əvvəl tanıyıb, lakin bu günə qədər Ermənistan Türkiyənin ərazi bütövlüyünü tanımaqdan imtina edir. 90-cı illərin əvvəllərində Türkiyə ağır iqtisadi böhranla üzləşən Ermənistana 100 ton buğda verib və onu bir müddət elektriklə də təmin edib, lakin bunun əvəzində qarşı tərəfdən heç bir xoşməramlı jestlə qarşılaşmayıb. Nəhayət, Ermənistan Azərbaycan torpaqlarını işğal etməyə başlayanda və Naxçıvanda hücum əməliyyatları təşkil edib Türkiyə sərhədlərinə yaxınlaşmağa cəhd edəndə Ankara bu xoşməramlı jestlərə son verib hava və quru sərhədlərini bağlamalı oldu. İki il sonra Ankara yenidən güzəştə gedərək Ermənistana hava sahəsini açdı, Ermənistan vətəndaşlarına sərhəddə viza verilməsinə və bununla çoxlu sayda erməninin Türkiyəyə işləmək üçün gəlməsinə göz yumuldu. Bu ermənilər Türkiyədə qazandıqları pulları Ermənistana göndərməklə ölkə iqtisadiyyatı üçün önəmli ölçülərdə gəlir təmin ediblər. Lakin Robert Köçəryan Türkiyəyə qarşı sərt mövqe tutmaqla ikitərəfli münasibətlərin normallaşması üçün heç bir addım atmayıb, “soyqırım” iddiaları üzərindən düşmənçilik siyasəti aparıb: “Serj Sərkisyan isə prezident olandan sonra Türkiyə ilə uzlaşmada maraqlı olduğunu elan edib, ancaq bunun üçün konkret xoşməramlı addımlar atmaq əvəzinə Türkiyə prezidentini İrəvana dəvət edərək Ankaranın bir daha xoş məram göstərməsini istəyib”. Səfir Ö.E.Lütem qeyd edir ki, S.Sərkisyanın vəziyyəti mürəkkəbdir. Ermənistandakı seçkilərlə başlayan siyasi böhran aradan qalxmayıb, ölkə iqtisadiyyatının durumu ağırdır, müxalifət isə ona qarşı aksiyaları davam etdirir. Bu baxımdan S.Sərkisyanın ictimaiyyətə güclü təsir edə biləcək təşəbbüsə ehtiyacı var, Türkiyə prezidentinin İrəvandakı futbol matçına dəvət edilməsi məhz buna xidmət edir: “Əgər Sərkisyan Gülün İrəvana mümkün səfərinə əlavə olaraq ciddi güzəştlərə getmədən Türkiyə ilə sərhədlərin açılmasını da təmin edə bilsə, o zaman mövqelərini möhkəmləndirəcək, küçələrdən çəkilməyən müxalifəti isə geri çəkilməyə məcbur edəcək”. F.MƏMMƏDOV musavat