"ATƏT silah və texnikanı özü sayır" Yaşar Cəfərli: "Ərazi bütövlüyümüz təmin olunana qədər müdafiəyə strateji baxış prosesinə ehtiyac yoxdur" ABŞ, Böyük Britaniya, Hollandiya və Bolqarıstandan olan mütəxəssislər qrupu Azərbaycan və Ermənistanın paralel müdafiəyə strateji baxış prosesi keçirmələrini zəruri sayır. Bunu mütəxəxsis qrupu müdafiəyə strateji baxış metodologiyası üzrə İrəvanda keçirilən seminarın nəticələriylə bağlı Ermənistanın müdafiə naziri Seyran Ohanyanla görüş zaman söyləyiblər. Onlar hesab edirlər ki, proses şəffaf və beynəlxalq ictimayyət üçün açıq olmalıdır. Ekspertlərə görə, müdafiəyə strateji baxış prosesi iki ölkə arasında təhlükəsizlik atmosferinin möhkəmlənməsinə, mümkün təhlükə və risklərin maksimum aradan qaldırılmasına kömək edər. Seyran Ohanyan bu təklifi məmnuniyyətlə qarşıladığını söyləyib. Xatırladaq ki, bu mütəxəssis qrupuna Monteredə yerləşən ABŞ-la Hərbi-Siyasi Əlaqələr Mərkəzinin direktoru, elmlər doktoru Antonius Bernards başçılıq edir. Rəvan Məmmədli Bəs hər iki ölkədə müdafiəyə strateji baxış prosesi Azərbaycanın maraqlarına nə dərəcədə cavab verərdi? Hərbi ekspert Yaşar Cəfərli deyir ki, Azərbaycan ATƏT-in üzvüdür və bu quruma üzv ölkələr təhlükəsizlik sahəsində bir sıra müqavilələrə qoşulublar. Avropada Adi Silahlı Qüvvələr haqqında Cinah Sazişi də bu sıradadır. Keçən il Rusiya bu sazişi birtərəfli qaydada ratfikasiya etməyib, sazişdə iştirakını müvəqqəti dayandırıb. Həmin sazişə görə, Cənubi Qafqaz ölkələri üçün də kvota müəyyənləşdirilib, hansı sayda silah və texnikanı saxlaya biləcəkləri göstərilib. Söhbət yüngül və ağır texnikadan gedir. Ölkələrdə, o cümlədən Azərbaycan və Ermənistan ərazisində bu kvotaya nəzarəti beynəlxalq təşkilatlar mütəmadi həyata keçirirlər. ATƏT-in müvafiq strukturlarının nümayəndələri üzv ölkələrə gəlir, hesablamalar aparır, yerində silah və texnikanı sayırlar: "Artıq ATƏT-in timsalında belə beynəlxalq mexanizm var. Ona görə də hesab edirəm ki, yeni mexanizmlərin yaradılmasına heç bir ehtiyac yoxdur". Onun sözlərinə görə, ekspert qrupunun yeni təklif olunan mexanizmini Azərbaycan qəbul etməməlidir. Çünki ərazi bütövlüyümüzü problemimiz var. Ermənistana sərf edən variantdır ki, bundan sonra öz təhlükəsizliyini indiki, torpaqlarımızı 20 faiz işğal etmiş səviyyədə qoruyub saxlasın: "Azərbaycan heç bir vəclə buna getməməlidir. Nə vaxt ərazi bütövlüyümüz təmin olunar, ondan sonra hətta Ermənistanla birgə müdafiə baxış sistemi barədə düşünmək olar. Hələlik isə Azərbaycan ATƏT-in qəbul etdiyi normalara uyğunlaşıb, bu, kifayətdir. Yeni mexanizmlərə ərazi bütövlüyümüz təmin olunana qədər ehtiyac yoxdur". xalqcebhesi