Vətənpərvər Azərbaycan məsələsi Emin Həsənli: "Hər kəs vətənpərvərlik ruhunun aşılanmasına, təbliğinə töhvə verməlidir" Torpaqları işğal altında olan Azərbaycanda hərbi vətənpərvərlik ruhunun daim yüksək səviyyədə olması vacib şərtlərdən biridir. Çünki torpaqlarımızın azad edilməsində bu amil başlıca şərt olacaq. Tərxis Olunmuş Hərbçilərin Gəncləri Maarifləndirmə İctimai Birliyinin (TOHGMİB) sədri Emin Həsənli deyir ki, bu gün milli qəhrəmanlara ayda 600 manat prezident təqaüdü, şəhid ailələrinə 100 manat müavinət verilir. Qarabağ əliləri, şəhid ailələri üçün mənzillər tikilir, avtomobillər bağışlanır. Onun sözlərinə görə, bu gün hərbi büdcəmiz Ermənistanın dövlət büdcəsinə bərabərdir. Ramiz Mikayıloğlu İli-ildən zabitlərin əməkhaqqı artırılır, mənzil şəraiti yaxşılaşdırılır. Emin Həsənli qeyd etdi ki, buna baxmayaraq, ölkədə vətənpərvərlik ruhu daha da yüksəlməlidir. Xüsusən bu işdə ictimai təşkilatlar, mətbuat fəal olmalı, təhsil müəssisələrində, məktəblərdə, uşaq bağçalarında, ailədə hərbi vətənpərvərliyin aşılanmasına xüsusi diqqət yetirilməlidir. Azərbaycanda oğlan uşaqlarının hərbiyə marağı həddən artıq çox olur. Oğlan uşaqlarının hər biri valideynlərinin, qohumlarının onlara cürbəcür silah və texnikanın maketlərini hədiyyə etməsini arzulayırlar. Yaxud kompüter oyunları müşahidə olunsa, oğlan uşaqlarının böyük əksəriyyəti müharibə oyunlarına üstünlük verirlər. Bu, qandan, gendən gəlir. Türk milləti daim vətənpərvər, döyüşkən olub. TOHGMİB sədri bildirdi ki, buna baxmayaraq, sonradan oğlan uşaqlarının nədən hərbi məktəblərə üz tutmaması diqqət çəkir: "Niyə hərbi təhsil almaq istəyənlərin sayı daha çox olmasın? Digər universitetlərə nisbətən, ali təhsil müəssisələrinə üz tutanların sayı çox və ən yüksək balla ora qəbul olmalıdır". Emin Həsənli vurğuladı ki, hərbi vətənpərvərlik ruhunun yüksəldilməsini tək dövlətdən, hansısa nazirlikdən tələb etmək düzgün deyil, bu, bütün ictimaiyyətin işi olmalıdır. İnsanlar yaxınlıqlarındakı Qarabağ əlilinə, müharibə veteranına, şəhid ailəsinə xüsusi diqqət göstərməlidir. Hərbi formada olan insanlara sayğıyla yanaşılmalıdır: "Bunu dövlətdən, bir-iki qəzetdən, hansısa ictimai təşkilatdan ummaq doğru deyil. Hər kəs bu işə töhvə verməlidir". TOHGMİB sədri bildirdi ki, uşaq bağçasında müəllimə bir neçə uşağı vətənpərvər ruhda tərbiyə edə bilər. Orta məktəbdə işləyən müəllim, hər bir valideyn bu işin ondan asılı olduğunu düşünməlidir. Hər bir valideyn uşağını yaxşı tərbiyə edərsə, bunun özü ən yaxşı vətənpərvərlikdir. Həkimin xəstəsinə yaxşı baxması, müalicə etməsi, jurnalistin milli mövqeni əsas götürərək yazması da vətənpərvərlikdir: "Bəzən sülh dövründə deyirlər ki, vətənpərvərlik silah götürüb döyüşməkdən ibarətdir. Xeyr! Əgər bu gün sahibkar bir çox insanları işlə təmin edirsə, vergisini verirsə, bu vergi ölkənin iqtisadiyyatının, ordusunun güclənməsinə yönəlir. Biz təbliğ etməliyik ki, hər bir şəxs öz sahəsində ölkənin güclənməsinə çalışsın. Şagird bilməlidir ki, vətənə ən böyük xidməti yaxşı oxuyub, güclü mütəxəssis kimi yetişməyindən, əxlaqlı olmasından keçir". Emin Həsənəli uşaqlıqdan başlayaraq hər bir kəsə həm konstitusion, həm mənəvi vətəndaşlıq borcunun, Vətən qarşısında müəyyən öhdəliklərinin olduğunun aşılanmasını zəruri sayır. Onun sözlərinə görə, orta məktəblər var ki, milli qəhrəmanlardan birinin adını daşıyır, ancaq o təhsil müsəsisəsində oxuyan uşaqlar həmin qəhrəmanın döyüş yolu barədə məlumatlı deyillər: "Şəhərin küçələrində hansısa siqaretin, bir şirkətin məhsulunun reklamı diqqət çəkir. Yaxud televiziyalarda heç bir iş görməyən, bir-iki mahnı oxumuş şəxs həvəslə təbliğ olunur. Araşdıranda görürsən ki, nə o şəxslər hərbi xidmətə gedib, nə orduda olub, nə hərbi hissələrdən birində konsert verib. Bir-iki toyda oxuyub, kimsə sponsorluq edib, bütün günü kanallardan düşmür. Vətənə xidmət etmiş milli qəhrəmanlar, çoxlu ziyalılar var ki, onların təbliğatı yetərincə aparılmır. Düzdür, telekanallarda hərbi vətənpərvərliklə bağlı müəyyən verilişlər işıq üzü görür. Bəzi kanallar, xüsusən İctimai Televiziya bu mövzuda dəyirmi masalar, görüşlər keçirir. Amma kanalların birinci işi bu olmalıdır. Şou-biznes əyləncə də olmalıdır, amma ağırlıq hərbi vətənpərvərliyin yüksəldilməsinə yönəldilməlidir". O dedi ki, günün müəyyən saatlarında elə seriallar, verilişlər verirlər ki, onlar vətənpərvərlik ruhunu, ancaq aşağı endirə bilər. Belə verlişlərə son qoyulmalı, ictimai qınaq olmalıdır: "Dövlət hər şeyi inhisara ala bilməz, bu, vətəndaşlardan asılıdır. Bizim bəzi jurnalistlərimiz çox gözəl ənənə formalaşdırıblar, vicdan senzurası var. Elə şeylər var ki, millətin, dövlətin marağı naminə onu yazmırlar, bu, ABŞ-da da, Avropada da belədir. Amma təəssüf ki, bəzi telekanallarda jurnalistlər bəzi şəxslərin yataqlarını, necə yatıb durduqlarını da çəkirlər. Bu, heç bir ictimai əhəmiyyət kəsb etmir. Əvəzində hansısa beş milli qəhrəmanın həyat yolunu göstərmək olar. Məhz yanlış verilişlərin sayəsində gənclərimiz adını çəkmədiyimiz müğənnilərə daha çox oxşamağa çalışırlar". TOHGMM sədri "ulduz yarışmaları" əvəzinə telekanalların qəhrəmanlığın təbliği yönündə yarışmaların keçirilməsini məqsədəuyğun sayır: "Yeri gəlmişkən, Heydər Əliyev Fondunun dəstəyilə muğam müsabiqələri keçirildi. Biz belə layihələri dəstəkləyirik. Muğamın özü də vətənpərvərliyi, milli-mənəvi dəyərləri təbliğ edir. Günümzdə də məhz milli-mənəvi dəyərlər təbliğ olunmalıdır". xalqcebhesi