TÜRK XƏFİYYƏSİ İSTANBULDAKI TERAKTLARIN İZİNƏ DÜŞMƏYƏ ÇALIŞIR Əsas versiya partlayışların PKK tərəfindən təşkil edilməsi ehtimalı üzərində qurulub Türkiyənin xüsusi xidmət orqanları İstanbulun Güngörən məhəlləsində iyulun 27-də axşam baş vermiş terror aktının izini tapmağa çalışır. İlkin təhqiqatlardan sonra müəyyən edilib ki, partlayışlar TNT maddəsindən hazırlanmış partlayıcılarla törədilib. Partlayıcıları insanların sıx olduğu küçədəki zibil qutularına yerləşdirənlər isə ətrafdakı təhlükəsizlik kameraları tərəfindən lentə alınıb. Qeyd edək ki, TNT tipli partlayıcılardan istər PKK, istərsə də Türkiyədə fəal olan “əl-Qaidə” istifadə edir. Xatırladaq ki, partlayışlar nəticəsində əksəriyyəti qadın və uşaqlar olmaqla 18 nəfər həlak olub, 150-dən çox adam xəsarət alıb. Terror Türkiyədə siyasi gərginliyin hökm sürdüyü, “Ergenekon” iş üzrə məhkəmə prosesinə strart verildiyi və AKP-nin bağlanması iddiası üzrə Konstitusiya Məhkəməsinin qərar vermək üçün toplancağı gündən əvvəl törədilib. İstanbul polisindən bildiriblər ki, hadisənin baş verdiyi ərazidəki iş yerlərinin və mağazaların təhlükəsizlik kameralarındakı görüntülər diqqətlə araşdırılır. Bu görüntülərdə partlayışlardan əz əvvəl sifətləri seçilməyən iki şəxsin hadisə yerindən qaçaraq uzaqlaşdığı görünür. Polis və xüsusi xidmət orqanları ehtimal edir ki, həmin şəxslər zibil qutularına partlayıcıları yerləşdirənlərdir. Hazırda onların tapılması üçün İstanbulda geniş miqyaslı axtarış əməliyyatları aparılır. Təhlükəsizlik və terror üzrə ekspertlər qeyd edirlər ki, Güngörən partlayışlarında həm PKK-nın, həm “əl-Qaidə”nin dəst-xəttini görmək mümkündür. Belə ki, PKK bir qayda olaraq mülki şəxslər arasında maksimum tələfata səbəb olan partlayışlar təşkil edir. Son günlər Türkiyənin silahlı qüvvələri ölkənin cənub-şərqində və İraqın şimalında PKK-ya qarşı əməliyyatlar aparır, bu əməliyyatlar nəticəsində terror təşkilatı ciddi itkilər verir. Ehtimal olunur ki, PKK bu əməliyyatlara cavab olaraq İstanbulda terror aktı törədib. Lakin PKK indiyədək İstanbul partlayışlarına görə, məsuliyyəti üzrəinə götürməyib. PKK-ya yaxın saytlardan birində isə bu hadisədə təşkilatın əli olmadığı bildirilir. Ekspertlərə görə, partlayışların bir-birinin ardınca baş verməsi “əl-Qaidə” dəst-xəttini də xatırladır. İstənilən halda ekspertlər terror aktının məhz indi, yəni Türkiyədə siyasi qütbləşmənin və gərginliyin yüksəldiyi bir vaxtda törədilməsini təsadüfi saymırlar. Ehtimal olunur ki, terror aktının təşkilatçıları bununla ölkədəki gərginliyi daha da artırmaq, kütləvi çaxnaşmalara səbəb olmaq və ya hansısa qüvvələrə mesaj vermək məqsədi daşıyıblar. Xarici mətbuat da bu terrorda siyasət izinin olduğuna diqqəti cəlb edir. Bildirilir ki, son terror aktının dindar fundamentalistlərin onlara qarşı çıxan qüvvələri qorxutmaq məqsədi daşıdığı, yaxud islamçılarla mübarizə aparan qüvvələrin təxribatı və ya kürd terrorçularının növbəti qanlı aksiyası olduğu hələ aydın deyil. Lakin görünən odur ki, İstanbul partlayışlarının günahkarları üzə çıxarılanadək belə mübahisələr davam edəcək. F.MƏMMƏDOV musavat