Vaşinqtonun "Tehran gizlinləri" "Məqsəd İrandakı nüvə proqramının həyata keçirilməsinə mane olmaq yox, mövcud rejimi dəyişməkdir" Vaşinqtonla Tehran araasındakı münasibətlərin "istiləşdiyi" bir vaxtda İran prezidenti Mahmud Əhmədinejad bir sıra açıqlamalar verib. İran prezidenti uranın zənginləşdirilməsi üçün hazırda əllərində 6 min sentrafuqasının olduğunu bəyanlayıb. Bu isə ölkənin cəmi bir neçə ay bundan əvvəl malik olduğu sentrafuqanın sayından ikiqat çoxdur. Ekspertlərin fikrincə, Mahmud Əhmədinejad bununla da İranın nüvə proqramınını sürətlə davam etdirdiyini ortaya qoyub. Politoloq Məhərrəm Zülfüqarlı belə bəyanatların şişirdilmiş məlumatlar əsasında verilməsini istisna saymır. Tural "ABŞ-İran münasibətlərinin düzəlmə nöqtəsinə gəldiyi bir vaxtda, sanki kimlərinsə təhrikilə yenidən narazılıqlar artır. ABŞ prezidenti Corc Buşun yeritdiyi siyasət artıq iflasa uğrayır. İraqda və Əfqanıstanda aparılan hərbi əməliyyatların sonu bilinməməklə yanaşı, bu proseslər regionu iflic vəziyyətinə salıb. Artıq məşhur politoloqlar da Vaşinqtonun Əfqanıstanda vaxtilə SSRİ-nin buraxdığı səhvləri təkrarlamağa başladığını söyləyirlər. Ümumiyyətlə, gözlənilən haldır ki, yeni prezident seçkilərindən sonra Corc Buşun Yaxın Şərq siyasəti kəskin tənqid olunsun". Məhərrəm Zülfüqarlının fikrincə, İran rəhbərlərinin qəribə bəyanatlar səsləndirməsi də başadüşülən deyil: "Düzdür, Tehranın haqqı var ki, nüvə enerjisindən yararlansın. Cənub qonşumuzda bunu onunla əlaqələndirirlər ki, Pakistanda və Hindistanda bu proqramlar var. Hətta Dehli və İslamabad nüvə silahına da sahib olduğu təqdirdə, İranın bu sahədə atdığı addımlar heç bir əndişə yaratmamalıdır. Sadəcə olaraq, nüvə məsələsinin qabardılması birbaşa olaraq Vaşinqtonun Tehranla düşmənçilik münasibətlərindən irəli gəlir. Prezident Corc Buş da həmişə "şər üçbucağına daxil olan ölkə" adlandırdığı İranda nüvə proqramının reallaşdırılmasını təhlükəli sayır". Məhərrəm Zülfüqarlı müharibənin başlanacağı təqdirdə, regionun fəlakətlərlə üz-üzə gələcəyini proqnozlaşdırdı. Məhərrəm Zülfüqarlının sözlərinə görə, əgər İranda 1979-cu ilə qədərki rejim olsaydı, ABŞ buna dəstək verərdi: "Hətta nüvə silahının lazım olan avadanlıqlarını Vaşinqton verərdi. Çünki bu ölkə o zaman cənub qonşumuza ən yaxın dövlətlərdən biri idi. Sadəcə olaraq İran inqilabından sonrakı rejimlə ABŞ arasında düşmən münasibətlər yaranıb. Bu münasibətlərdəkı müəyyən problemləri həll etmək üçün Corc Buş da neçə vaxtdır ki, belə sərt siyasət yürüdür. Qısası, Vaşinqtonun məqsədi İrandakı nüvə proqramının həyata keçirilməsinə mane olmaq yox, Tehrandakı rejimi dəyişməkdir. Bunun üçün də bəhanə kimi bu proqramdan istifadə olunur". xalqcebhesi