Tiflis soydaşlarımızı eşitmir - Dilimizi, tariximizi, adətlərimizi unutmaq istəmirik. Ölkədəki millətlər qazanında bişsək də, əriyib yox olmaq fikrimiz yoxdur. Buna görə də bizi qınayır, yerli cəmiyyətə inteqrasiya olmamaqda suçlayırsınız. Lakin inteqrasiya ikitərəfli olmalıdır: birtərəfli hərəkət yalnız assimilyasiyadır. İndi vicdanınıza qulaq asıb deyin: bizimlə ədalətlə davranırsınız? ... Aftandil Qurbanov danışdıqca səsini qaldırırdı. Onu sinirləndirən Tiflisdən gələn məmurların illərdən bəri deyilənləri təkrarlaması, Gürcüstanda yaşayan azərbaycanlıların problemlərini həll etmək üçün konkret iş görməyə çalışmamalarıydı. Onun sözlərinə görə, il başlayandan bəri artıq dördüncü dəfədir ki, Tiflisdəki hakimiyyət mənsubları Borçalıya gəlir, danışır, vədlər verirlər. Amma onlar geri dönəndən sonra heç nə dəyişmir. "Elə bil bizi küt, müti insanlar bilirlər. Bura gələndə gürcülərlə azərbaycanlıların qardaş olmalarından bəhs edirlər, amma sonra heç də dəyişmir, münasibətlər olduğu kimi qalır, problemlərin çözülməsini xahiş edəndə də daş atıb başlarını tuturlar. Öz dilimizdə danışmağı da bizə qəbahət bilir, gürcü dilini bilmədiyimizə görə inteqrasiya olmadığmızı söyləyirlər. Buyurun, gürcü dilində səlis danışır və yazıram. Amma mənə ən kiçik vəzifə, yamanın yaman günündə bələdiyyədə qarovulçuluq təklif edən varmı? Belədirsə, gürcü dilini bilmək mənə, iki diplomu olan adama gərəkdirmi?! Anlayın, vəzifə-filan istəmirəm. İstəyim bizə danışılan yalanlarına son qoymalarıdır", - "Sivil Gürcüstan" cəmiyyətinin direktor müavini A.Qurbanov söyləyir. Gürcüstanın reinteqrasiya məsələləri üzrə dövlət naziri Yelena Tevdoradze və Kvemo-Kartlinin qubernatoru David Kirkitadze isə regionda yaşayan milli azlıqlarla görüşlərindən çox razı qalıblar. Vilayət administrasiyasının binasında keçirilən görüşdə qamqebelilər (rayon icra hakimiyyətlərinin başçıları, - H.B) də iştirak ediblər. "Sual-cavab rejimində keçən görüşdə əsas müzakirə mövzusu mlli azlıqların Gürcüstan cəmiyyətinə inteqrasiyası ilə bağlı məsələlərdi. Azərbaycanlılar dedilər ki, onların inteqrasiyasının qarşısını alan əsas problem gürcü dilini bilməmələri və ya zəif bilmələridir. Bu səbəbdən də regiondakı gənclərin əksəriyyəti ali təhsil almaq üçün Azərbaycana yollanırlar. Azərbaycanlılar xahiş etdilər ki, onların kəndlərində təlim-tərbiyə və təhsil prosesinin gürcü dilində aparıldığı uşaq bağçaları ilə məktəblər açılsın. Görüş iştirakçılarının fikrincə, belə olarsa azərbaycanlıların cəmiyyətə inteqrasiyası daha intensiv xarakter alar. Təbii ki, bu zaman azərbaycanlıların mədəniyyət və dilləri qorunub saxlanacaq", - Y.Tevdoradze söylədi. Azərbaycanlıların kompakt yaşadıqları Kvemo-Kartlinin qubernatoru David Kirkitadze də bu fikirdədir. Onun sözlərinə görə, bölgədəki azərbaycanlıların qarşılaşdıqları problemlərdən biri də gürcü dilini bilməmələridir. "Bu səbəbdən də onlar dövlət və bələdiyyə strukturlarında çalışa bilmir, Gürcüstan siyasətində saylarına uyğun çəkini qazanmırlar. Səmimiyyətlə deyirəm ki, azərbaycanlıların hakimiyyətdə daha miqyaslı şəkildə təmsil olunmalarını, onların ictimai-siyasi həyatda daha fəal rol oynamalarını istəyirik. Lakin tək istək azdır - iş görmək lazımdır", - D.Kirkitadze dedi. Qubernator onu da vurğulayır ki, hazırda Kvevo-Kartlidəki dövlət hakimiyyəti, hüquq-mühafizə, məhkəmə orqanları və bələdiyyə strukturlarında çalışan azərbaycanlıların sayı azdır. Bu statistikanı yaxşılaşdırmağın yeganə yolu isə cəmiyyətə inteqrasiya prosesini sürətləndirməkdir. Kvevo-Kartlidəki dövlət və bələdiyyə strukturlarında soydaşlarımızın təmsilçiliyi ilə bağlı statistika gerçəkdən də, ürəkaçan deyil. "Ekspress" əməkdaşının əldə etdiyi məlumatlara görə, hazırda 340 minə yaxın azərbaycanlının yaşadığı vilayətin hüquq-mühafizə orqanlarında 56, məhkəmələrində 22, kütləvi informasiya vasitələrində 11 bələdiyyə strukturlarında - 29 soydaşımız çalışır. Müqayisə üçün ermənilərin kompakt yaşadıqları Samstxe-Cavaxetiyada müvafiq göstəricilər dəfələrlə çoxdur. Daha konkret olsaq, burada hüquq-mühafizə orqanlarında 124, məhkəmələrdə - 43, kütləvi informasiya vasitələrində - 38, bələdiyyə strukturlarında isə 82 erməni işləyir. Ermənilərin Tiflisdəki mərkəzi hakimiyyət orqanları, Gürcüstanın hüquq-mühafizə sistemi, kütləvi informasiya vasitələri, parlament və məhkəmələrdə, habelə iqtisadi strukturlarda təmsilçiliyinin hansı səviyyədə olduğunu sadəcə, bir rəqəm səciyyələndirir: "Rezonansi" qəzetinin bu yaxınlarda apardığı reytinq-sorğu nəticəsində məlum olub ki, Gürcüstanın "Ən nüfuzlu 500 vətəndaş" siyahısında 231, "Ən nüfuzlu siyasətçilər"də - 12, "Ən zəngin iş adamları" reytinqində isə 78 erməni var. Həmin reytinq siyahılarının heç birində azərbaycanlıların adları çəkilmir. Halbuki Gürcüstan İş Adamları Assosiasiyası və Maliyyə Nazirliyinin açıqlamalarına görə, Azərbaycanın şirkətləri ölkə iqtisadiyyatında yetərincə önəmli yer tutmağa başlayıblar. "Azpetrol" şirkətinin Gürcüstandakı nümayəndəliyi, habelə ARDNŞ-a məxsus "SOCAR Georgia"nın Gürcüstanın yanacaq-energetika bazarında oynadığı rolu nəzərə alanda, iş adamlarımızın Tiflisdə hələ də təsir imkanlarını gücləndirə bilməmələri yalnız təəsüf hissi doğura bilər. Gürcü dilini bilmədiklərinə görə azərbaycanlıların yerli cəmiyyətə zəif inteqrasiya olmalarına gəldikdə isə, soydaşlarımız hesab edirlər ki, Tiflisin hakimiyyət dairələrinin arqumentləri əsassızdır. "Samstxe-Cavaxetiyadakı ermənilərin 89%-i gürcü dilini bilmirsə, bizdə bu göstərici 78%-ə bərabərdir. Amma hakimiyyət strukturlarında ermənilərlə azərbaycanlıların təmsil olunmaları səviyyəsini müqayisə edəndə artıq sözə ehtiyac qalmır. Gürcüstanın hakimiyyət dairələri milli azlıqların, xüsusilə də azərbaycanlıların problemlərini həll etmək əvəzinə ümumi ibarələrlə zəngin bəyanat və çıxışlar edir, xalqlarımızın qardaşlığından danışırlar. Anlayırıq ki, bu sözlərin arxasında duran məqamlardan biri də Azərbaycanın Gürcüstana çox ucuz qiymətə verdiyi enerji daşıyıcılarıdır. Amma belə də davam edə bilməz. Tiflis bizi eşitmir", - Gürcüstan Azərbaycanlıların Milli Mərkəzinin sədri Nofəl Səidov əməkdaşımıza bildirdi. Həsən AĞACAN express