Robert Köçəryanın həbsi üçün şans yaranıb "Onun həbsi hərbi cinayətkarlığın qarşısının alınmasında ciddi presedent olacaq" Ermənistanda keçmiş prezident Robert Köçəryanın Haaqa Tribunalına verilməsilə bağlı imza toplanılır. Səbəb isə Robert Köçəryanın martın 1-də nümayişçilərə atəş açmağı əmr etməsi və ölkədə siyasi həbslərin başlanmasıdır. Mütəxəssislər bildirirlər ki, Azərbaycana qarşı hərbi cinayətlərdə, Xocalı soyqırımının törədilməsində, torpaqlarımızın işğalında ittiham olunan Robert Köçəryanın və digər erməni siyasətçilərinə qarşı rəsmi Bakının ittihamlarla çıxış etməsi mümkündür. Tural Rasimoğlu Təkamül Partiyasını sədri Teyyub Qəni Dağlıq Qarabağ separatçıları haqda Azərbaycan hökumətinin kifayət qədər məlumatlı olduğunu vurğuladı: "Onların siyahısının hazırlanması, törətdikləri cinayətləri sübuta yetirən istintaq materiallarının toplanaraq beynəlxalq məhkəməyə verməyin zamanı çatıb. Bu addım həm də Qarabağ danışıqlarında əlavə təzyiq vasitəsi rolunu oynaya bilər. Belə məsələni biz erməni müxalifətinin təşəbbüsündən qabaq da qaldırmışıq. Ümumilikdə, partiyalarının müraciətlərindən sonra hərdən müvafiq hakimiyyət orqanlarının da açıqlamaları olub ki, Azərbaycanda ermənilərin hərbi cinayətləri barədə istintaq aparılır və kifayət qədər məlumatlar toplanılaraq işlər görüləcək, beynəlxalq məhkəməyə müraciət olunacaq. Təbii ki, biz Robert Köçəryan, Serj Sarkisyan və Seyran Ohanyanın, Azərbaycana qarşı hərbi cinayətlərdə iştirak etmiş bütün şəxslərin beynəlxalq məhkəməyə verilməsini tələb edirik. Bu tələb 20 Yanvar hadisələrinə də aid edilməlidir". Bu gün Azərbaycanın həmin hərbi cinayətkarları həbs etmək imkanlarının olmadığın deyən Teyyub Qəni real işlərə keçmək zamanının çatdığını vurğuladı: "Azərbaycan həmin şəxslərin cinayətini sübut etməklə ən azı onların Ermənistandan kənara çıxmalarının qarşısını ala bilər. Hesab edirəm ki, bu istiqamətdə rəsmi strukturlar fəaliyyət göstərməlidir. Partiyaların beynəlxalq məhkəmələrə müraciət etməsi simvolik xarakter daşıya bilər, çünki əlimizdə sənədləşdirilmiş məlumatlar yoxdur. Amma biz bunu siyasi qüvvələr olaraq daim hökumətdən tələb edəcəyik". Ədalət Partiyası sədrinin müavini Mütəllim Rəhimli Azərbaycanın Dağlıq Qarabağ məsələsini son dövrlər daha çox gündəmdə saxladığını xatırladaraq rəsmi Bakının müharibə barədə bəyanatlarının İrəvanda narahatlıq yaratdığını dedi. Mütəllim Rəhimli sivil dünyada hərbi canilərin həmişə cəzalandırıldığını xatırladaraq Azərbaycanın da narahatçılıq içində boğulan erməni siyasətçilərinə qarşı beynəlxalq məhkəmələr vasitəsiylə hücuma keçməni vacib saydı: "Hökumət Ermənistanda azərbaycanlıların hüquqlarının pozulması faktlarıyla bağlı Avropa Şurası İnsan Hüquqları Məhkəməcinə bir çox müraciətlər göndərib. Hazırda bu işlərdən bəziləri icraata götürülüb. Eyni zamanda azərbaycanlılara qarşı soyqırım siyayətində təkcə Robert Köçəryan və Serj Sarkisyan deyil, müxalifətin lideri Levon Ter-Petrosyan da məsuliyyət daşıyır. Mən də belə təşəbbüslə çıxış etməyin tərəfdarıyam. Belə təzyiq metodlarından istifadə etmək olar. Ən azı bu fəaliyyət Qarabağ probleminin həllində Ermənistana qarşı psixoloji təzyiq vasitəsi kimi istifadə oluna bilər". Azərbaycan Milli İstiqlar Partiyasının Siyasi Şurasının üzvü Əli Orucov Serj Sarkisyanla Robert Köçəryanın daha çox cinayətlərdə iştirak etdiyini bildirərək erməni müxalifətinin təşəbbüsünün Azərbaycanda da fərqli formada tətbiq etməyi mümkün saydı: "Bu adamlar azərbaycanlılara qarşı törədilən cinayətlərin birbaşa təşkilatçısı və iştirakçısı olublar. Azərbaycan hökuməti Robert Köçəryan haqqında beynəlxalq axtarış verib. Amma sonradan göründüyü kimi bu axtarış tələbinin arxasında dayanılmadı. Əslində belə həbslər mümkündü və belə ideyanı gerçəkləşdirmək olar. Çünki adı çəkilən siyasətçilərin hər ikisi hərbi canidirlər. Sadəcə təşəbbüs azdır, ortaya çıxıb bu prosesləri həyata keçirən lazımdır. Yaxşı olardı ki, bu işdə hökumət də müəyyən dəstək göstərsin, cəmiyyəti fəallaşdırsın". Azərbaycan Demokrat Partiyası sədrinin müavini Taliyət Əliyev Robert Köçəryanın Azərbaycan vətəndaşı olduğunu xatırladaraq onun azərbaycanlılara qarşı soyqırımda aparıcı fiqurlardan olduğunu, özünün də bu faktları dolayısıyla təsdiqlədiyini bildirdi: "Baş prokurorluğun məlumatına görə də Robert Köçəryan axtarışda olan Azərbaycan vətəndaşıdır. Vaxtilə bu məsələ formal şəkildə qaldırılıb. Bu birbaşa hökumətin üzərinə düşən bir vəzifədir ki, belə hərbi caniləri Haaqa Məhkəməsinə versin. Düzdür cəmiyyət də müəyyən təşəbbüslərdə bulunmalıdır. İndi Haaqa Tribunalına müraciətlə bağlı hüquqi prosedurları həyata keçirmək üçün şans da yaranıb. Robert Köçəryan Köçəryan Ermənistanda, həm də Azərbaycan ərazisində hərbi cinayətə yol verib. Bütün hallarda Robert Köçəryanın həbsi üçün ciddi hüquqi motivlərin olduğunu deyən Taliyət Əliyev ermənilərin imza toplamasına başlamasından sonra Azərbaycan hökumət və cəmiyyətinin də vacib hüquqi addımlar atması şansının yarandığını vurğuladı: "Bu beynəlxalq aləmdə hərbi cinayətkarlığın qarşısının alınması istiqamətində ciddi bir presedent olacaq". Hüquqşünas Ələsgər Məmmədli Haaqa Tribunalının Azərbaycanın lehinə qərar verəcəyini düşünmür: "Avropa Birliyi Azərbaycan və Ermənistan arasında münaqişənin olduğunu qəbul edirlər. Amma çox vaxt bizim əleyhimizə qərarlar çıxarırlar. Məsələn, Ermənistanın Azərbaycan ərazilərini işğal etməsi faktını və Xocalıda baş vermiş soyqırımı ermənilərin törətməsini birbaşa tanımırlar. Bizim Robert Köçəryanı məhkəməyə vermə hüququmuz var. Amma inanmıram ki, Haaqa Tribunalı bizim ittihamları qəbul etsin. Yaxın tariximizə baxanda bütün dünyanın birmənalı olaraq tanıdığı Bosniya qətliamı haqqında Haqqa Tribunalının qərarını xatırlayırıq. Yəni yeni bir şokun olacağı inandırıcı deyil". Ermənistan müxalifətinin Haaqa Tribunalına müraciətinin də hüquqi baxımdan doğru olmadığın deyən Ələsgər Məmmədli beynəlxalq məhkəmənin bir millətin başqasına qarşı təcavüzü, genosid məsələlərinə baxdığını bildirdi: "Bir ölkə daxilində baş verənlər özünün daxili hüquqi qaydalarıyla tənzimlənir. Hər hansı ölkədə ədalətli mühakimə olmasa, beynəlxalq məhkəmələrə müraciət oluna bilər. Ona görə də Haaqa Məhkəməsinin erməni müxalifətinin iddialarının qəbul edəcəyi real görünmür. Azərbaycanın isə belə təşəbbüsünün reallaşması mümkündür. Amma ərazi bütövlüyümüz məsələsində konkret qərarlar verməyən avropalılar haqlı tələbimiz barədə də ədalətli qərarlar verməyəcəklər". xalqcebhesi