İRAN DİPLOMATINDAN SƏRT AÇIQLAMA Məcid Feyzollahi: “İsrail İrana qarşı əməliyyatlara başlamağa cürət etməz” İran ətrafında vəziyyət yenidən dünyanın aparıcı mətbuat orqanlarının baş mövzusuna çevrilib. Xüsusilə də Tehranın hərbi hazırlıqları və bir sıra uzaqmənzilli raketlərin sınağını keçirməsindən sonra müharibənin qaçılmaz olması barədə fikirlər ardıcıl dərc olunmağa başlayıb. İran İsraili ürəyindən vuracağını bəyan etdikdən sonra İsrailin İranı üç istiqamətdən vurmasına hətta Corc Buşun razılıq verdiyi qəzetlərdə yer alıb. Ancaq qarşılıqlı sərt bəyanatlara, həmçinin Tehrana qarşı tətbiq olunan iqtisadi sanksiyalara rəğmən, İran prezidenti Mahmud Əhmədinejadın öz ölkəsində ABŞ-ın diplomatik korpusunun fəaliyyətinin bərpasına hazır olduğunu bəyan etməsi maraq doğurdu. Bəzi ekspertlər bunu Tehranın artıq müharibənin reallığını qəbul etməsindən doğan çəkingənlik əlaməti kimi yozurlar. Mövcud vəziyyətin dəyərləndirilməsi, həmçinin bir sıra versiyalara münasibət öyrənmək üçün İranın Azərbaycandakı səfirliyinin mətbuat katibi Məcid Feyzollahi ilə söhbət etdik. Diplomat bildirdi ki, İranın keçirdiyi hərbi təlimlər ənənəvi xarakter daşıyıb: “Müdafiə hazırlığını həmişə qorumaq hər ölkənin haqqıdır. İran da İsrail tərəfindən vaxtaşırı hədələr eşidir. Ona görə də müdafiə niyyətilə təlimlər keçirmək bizim öz haqqımızdır”. İsraildən gələn hədələrə münasibət bildirən diplomat bildirdi ki, bütün bunlar psixoloji müharibənin tərkib hissəsidir: “Aydındır ki, sionist rejimin o cürəti yoxdur ki, İrana qarşı hərbi əməliyyatlara başlasın. Bu bəyanatlar sadəcə, İranı öz mövqeyindən geri döndərmək üçün bir təzyiq vasitəsidir. Ancaq bizim mövqeyimiz haqdır və öz haqqımızı müdafiə etməkdə, müdafiə yolu ilə getməkdə davam edəcəyik”. İran diplomatı müharibənin hər an başlaya biləcəyi barədə şərhlərə cavabında dedi ki, əksinə, ABŞ İranla müzakirələrə başlamaq istəyir: “Digər məsələlər psixoloji müharibənin tərkib hissəsidir. Bununla da nəticə əldə etmək istəyirlər. Biz son vaxtlar Amerikanın müzakirələrə rəğbət göstərməsini görürük ki, bu da normal qarşılanır. Biz dəfələrlə demişik ki, şərt qoymadan, bərabər, ədalətli müzakirələrə hazırıq. İnanırıq ki, müzakirə əsasında biz öz haqqımızı qoruyub istədiklərimizi reallaşdıra biləcəyik. Ümumiyyətlə, hiss olunur ki, qarşı tərəflər yavaş-yavaş İranın haqq mövqeyini qəbul etmək istiqamətində addımlar atırlar. Biz Amerikanın da daxil olduğu “altılıq”ın təqdim etdiyi paketə cavab göndərmişik. Gələcəkdə müzakirələr olacaq və ümid edirik ki, müsbət nəticələr əldə ediləcək. Havyer Solana da onların nümayəndəsi kimi danışıqlar aparır və yaxın zamanlarda İranın Ali Təhlükəsizlik Şurasının müdiri cənab Cəlili ilə görüşləri olmalıdır”. Mətbuat katibi İran prezidentinin ABŞ-a ölkəsində səfirliyini açmaq təklifi verməsi haqda hər hansı təklif etmədiyini bildirdi: “Bu barədə dərc olunanlar yanlışdır. İrana Amerika tərəfindən səfirlik, ya konsulluğun açılması barədə rəsmi məktub göndərilməyib ki, ona da reaksiya verilsin. Amma hər halda qeyri-dövlət səviyyəsində əvvəllər də İranla Amerika arasında əlaqələr olub. Biz heç vaxt belə əlaqələrdən qaçmamışıq. Hətta bizim prezidentimiz BMT-nin iclasında Corc Buşla görüşə hazır olduğunu bildirdi. Qarşı tərəf isə bu görüşdən yayındı. Bəlkə də İranın ədalətə söykənən, haqlı mövqeyindən qorxduqları üçün dünyanın gözü qarşısında müzakirə açmaq istəmirlər. İndi də bəzi mətbuatda yayılıb ki, Amerikanın İranda səfirlik açmaq istəyi var. Lakin əvvəl gərək rəsmi şəkildə bir istək olsun ki, sonra onu araşdıraq”. Yeri gəlmişkən, ötən həftə İran tərəfdən belə bir təhdid eşidildi ki, hərb variantının reallaşacağı təqdirdə Tehran Amerikanın bütün maraqlarını hədəfə alacaq. ABŞ-ın maraqları olan ölkələrdən biri kimi Azərbaycanın da “qara siyahı”ya salındığını təxmin etmək olarmı? M.Feyzollahi bunu istisna etdi: “Amerika səfirinin “İran Azərbaycana təhlükədir” sözlərini bir lətifə sayıram və hesab edirəm ki, Azərbaycan xalqı bu lətifəyə doyunca gülüb. Ötən günlər Azərbaycan xarici siyasət idarəsinin təmsilçisi Xəzər İbrahim də bu kimi fikirlərin cavabını verib. Azərbaycanla İranın münasibətləri dostluq münasibətdir. Bu dostluğu gözü götürməyən ölkələr başqa ifadələrdən istifadə etməklə münasibətləri pozmaq istəyirlər. Amerika səfirinin sözlərindən görünür ki, onlar Azərbaycan - İran xalqlarının dostluq münasibətlərinin sıx olmasından narahatdırlar”. Elşad PAŞASOY musavat