İSRAİL İRANDA ÜÇ HƏDƏFİ VURACAQ

SON XƏBƏRLƏR

İSRAİL İRANDA ÜÇ HƏDƏFİ VURACAQ

2021.10.20, 07:36

Gunaz.tv

İSRAİL İRANDA ÜÇ HƏDƏFİ VURACAQ “The Sunday Times” qəzetinin yazdığına görə, Buş bu əməliyyata yaşıl işıq yandırıb

İsraillə İran arasında müharibə təhlükəsinə dair xəbərlərə dünən yenisi əlavə olunub. Britaniyanın “The Sunday Times” qəzeti yazıb ki,İsrail tezliklə İranda üç əsas nüvə obyektinə hava zərbələri endirəcək. Pentaqondakı yüksək rütbəli mənbəyə istinad edən qəzet bildirir ki, ABŞ prezidenti Corc Buş İsrailin İrana aviazərbələri endirməsinə yaşıl işıq yandırıb. Amerikalı mənbənin sözlərinə görə, Buş İsrail rəhbərliyinə deyib ki, İranı vurmaq üçün bütün hazırlıqları görsünlər və başa çatdıran kimi ona məlumat versinlər. Eyni zamanda bildirilib ki, İsrail İranı vurmaq üçün ABŞ-ın bölgədə yerləşən 32 hərbi bazasından heç birini istifadə edə bilməyəcək və Birləşmiş Ştatlar hərbi baxımdan yəhudi dövlətinə yardım etməyəcək. Qəzetin yazdığına görə, Pentaqondakı bir çox generalların və ABŞ administrasiyasındakı mühüm şəxslərin etirazlarına baxmayaraq, Buş səlahiyyət müddəti başa çatmadan İsrailin İranın nüvə obyektlərini vurmaq planlarına razılıq verməyi nəzərdə tutur. Lakin İsrailin İranı vurması kağız üzərində olduğu qədər asan görünmür. Hətta Amerika administrasiyasındakı ən sərt mövqeli şəxslər də hesab edir ki, İsrail 60 illik tarixi boyu ən çətin hərbi əməliyyatla qarşı-qarşıya qalacaq. Bu əməliyyatın uğurlu olması üçün İranın 3 əsas nüvə obyekti məhv edilməlidir. Bura Natanz, İsfahan və Arak nüvə obyektləri daxildir. Məqalədə deyilir ki, İsrail aviasiyanın İranı vurmaq üçün Türkiyə hava sahəsindən istifadəsi variantı da nəzərdən keçirilir. Xəbər verildiyi kimi, İran İsrailin hərbi əməliyyatlara başlaya biləcəyi haqda deyilənlərə şübhə edir, ancaq eyni zamanda xəbərdarlıq edir ki, düşmən hücum etsə, sərt cavab alacaq. Bir gün əvvəl İran dini liderinin nümayəndəsi bəyan edib ki, İsrail zərbə endirsə, dərhal “düz ürəyindən” cavab zərbəsi alacaq, həmçinin ABŞ-ın bölgədəki 32 hərbi bazasına zərbə endiriləcək. İran ötən həftə hərbi təlimlər zamanı İsraili vura bilən ballistik raketləri sınaqdan keçirib. F.MƏMMƏDOV musavat

GUNAZ.TV

SON XƏBƏRLƏR