Sərkisyan Gülü gözləyə-gözləyə qalacaq Ekspertlər erməni "diplomatiyasının" yeni tarixi səhifə açmaq niyyətinin uğursuz nəticələnəcəyini bildirir Son günlərdə Ermənistanın uzurpator prezidenti Serj Sərkisyanın Türkiyə prezidenti Abdulla Gülü İrəvana dəvət etməsi haqqında informasiya dönə-dönə gündjəmə gətirilir, Sərkisyanın özü bu fikrini təkrarlayır. Ermənistan prezidentinin Türk həmkarını dialoqa çağırması və bunun üçün sentyabrda İrəvanda yığma komandaların oyununa birgə tamaşa etməyin əla şans olmasını bəyanlaması Türkiyəyə mesaj kimi dəyərləndirilir. Tural "Atlas" Araşdırmalar Mərkəzinin rəhbəri Elxan Şahinoğlu erməni "diplomatiyasının" yeni tarixi səhifə açmağa çalışmasının uğursuz nəticələnəcəyini proqnozlaşdırdı: "İndi beynəlxalq aləmdə özünü sülhpərvər kimi göstərmək üçün Sərkisyan yenidən bəyanatlar verməyə başlayıb ki, guya onlar iki ölkə arasında dost münasibətlərin qurulmasında maraqlıdı və Abdulla Gülün onunla birgə futbol oyununu seyr etməsi, bu münasibətlərə təkan verə bilər. Ermənistan prezidenti bu addımıyla sanki topu Türkiyə və Qərbə tərəf atmış oldu. Əslində Abdulla Gülün İrəvana getməsi elə də qeyri-mümkün olan şey deyil. Əgər üç tələb yerinə yetirilsə, Türkiyə prezidenti bu cür təkliflərə həmişə cavab verə bilər. Bu tələblər də Azərbaycanın işğal olunmuş torpaqlarının boşaldılması, Türkiyəyə qarşı ərazi iddialarına son qoyulması və qondarma erməni soyqırımıyla bağlı iddialardan əl çəkməkdir. Bu məsələlər yoluna qoyulduqdan sonra Türkiyə prezidenti İrəvana gedib Ermənistanla diplomatik əlaqələri qura və digər əməkdaşlıq haqqında danışıqlar apara bilər". Elxan Şahinoğlu bu məsələlərin həllini tapmamış Serj Sərkisyanın reklam kampaniyası kimi hər dəfə eyni bəyanatlar verməsinin Ermənistanın Türkiyənin imicinə kölgə salmaq istəyindən xəbər verdiyini düşünür: "Çünki bu ölkənin rəhbərlərinə də bəllidir ki, sadalanan şərtlər yerinə yetirilmədən Abdulla Gülün İrəvana gəlməsi mümkün deyil. Burada maraqlı məqam isə odur ki, Türkiyə-Ermənistan münasibətlərinin qurulmasında ABŞ-la Çin arasında 30 il öncə yaşanan oxşar vəziyyət misal kimi çəkilir. Bu da soyuq münasibətlərin ABŞ tennis komandasının Çinə getməsindən sonra idman yolu ilə istiləşməsidir. Amma bu, Türkiyə-Ermənistan münasibətlrinə örnək ola bilməz. Ankara-İrəvan münasibətlərinin kəskinləşməsində konkret olaraq Azərbaycan torpaqlarının işğalı, qondarma soyqırım və sərhədləri tanımamaq faktı var". Siyasi şərhçi Aydın Quliyev belə təklifin meydana çıxmasını Ermənistanın blokadadan çıxmaq üçün alternativ variantlarının olmamasıyla əlaqələndirdi: "Rəsmi İrəvanın blokadadan çıxması üçün az-çox ümid gələn yolu Türkiyə ilə münasibətlərin tənzimlənməsidir. İkinci bir tərəfdən, erməni diplomatiyası çox yaxşı anlayır ki, hazırkı şəraitdə istər Avropa Birliyi, istərsə də ABŞ israrlı bir formada Türkiyəni bu ölkəylə münasibətləri tənzimləməsinə sövq etmək istəyirlər. Burada söhbət bəzilərinin dediyi kimi xristian həmrəyliyindən doğan isti münasibətdən getmir. Sadəcə bu məsələdə əsas rol oynayan mətləb ondan ibarətdir ki, Avropa və ABŞ Cənubi Qafqaza üç dövlətin mövcud olduğu coğrafi məkan kimi yox, daxili sərhədlərinin onun üçün o qədər də əhəmiyyəti olmayan vahid bir region kimi baxır. Yəni bu qüvvələr bütün Cənubi Qafqazın Avropa və ABŞ-la daha sıx inteqrasiyasında maraqlıdırlar. Çünki Avropada başa düşürlər ki, hər üç Qafqaz dövlətinin Qərbə inteqrasiyası lazımi səviyyədə getməsə, Ermənistan Rusiyanın təsir dairəsində qalmaqda davam etsə, Qafqazda təminatlı təhlükəsizliyə imkan olmayacaq. Bu regionun enerji daşıyıcılarını təhlükəsiz şəkildə qərbə daşımaqla bərabər, sözügedən dövlətlərdə tam demokratik sistemləri bərqərar etmək də mümkün olmayacaq. Ona görə də çalışırlar ki, Cənubi Qafqaz dövlətləri içərisində yeganə izolyasiyada olan və Rusiyanın daha çox təsir dairəsinə düşən Ermənistanı Avroatlantika məkanına daha sıx bağlasınlar. Nəticədə bu onlara Cənubi Qafqazda özünün siyasi iqtisadi, diplomatik təsirlərinin nüfuzlarını genişləndirməyə imkan verəcək". Ekspertin fikrincə, Ermənistan və Türkiyə kimi aralarında tarixi ziddiyəti olan iki dövlət başçılarının bir yerdə olması üçün sadəcə bir futbol oyunu bəhanə və əsas ola bilməz: "Əgər Abdulla Gül Sərkisyanın dəvətini həyata keçirsə, bu, heç də futbola baxmaq məqsədi daşımayacaq. İrəvana gedişin arxasında başqa mətləblər var. Ona görə də Türkiyənin belə addım atacağını gözləmirəm. Hətta səfər simvolik yaxınlaşma kimi də ortaya qoyulsa, Türkiyə prezidentinin bu addıma razılıq verəcəyi gözlənilən deyil. Çünki Abdulla Gülün də təmsil olunduğu AKP-də çox ciddi problem var". Aydın Quliyev ikinci bir tərəfdən, Türkiyənin ortaq tariz, soy, dil amilləri ilə yanaşı, birgə nəhəng enerji-nəqliyyat layihələri həyata keçirdiyi Azərbaycanla münasibətlərin ciddi şəkildə nəzərə alacağını bildirdi. xalqcebhesi