"Ergenekon" əməliyyatı, yoxsa siyasi linç? Türkiyədə hakimiyyətdə olan Ədalət və İnkişaf Partiyasının (AKP) göstərişi ilə gündəmə gətirilmiş "Ergenekon" əməliyyatı davam edir. Baş nazir və AKP lideri Rəcəb Tayyib Ərdoğan dünən mühafizəsi gücləndirilmiş halda ictimaiyyət qarşısında peyda olub. Türkiyə Futbol Federasiyasının prezidenti Həsən Doğanın dəfn mərasiminə qatılan Ərdoğanın dövlət başçısı Abdulla Güldən də güclü mühaifzə edildiyi gözdən qaçmayıb. AKP meylli media bunu ""Ergekon"la bağlı aparılan həbslərdən sinirlənmiş millətçilərin sui-qəsd təşkil edə biləcəklərinin istisna olunmaması" ilə izah edir. İyulun 1-də polisin həyat keçirdiyi istefada olan ordu generalları Şənər Əruyğur və Xurşid Tolon isə İstanbuldakı Metris istintaq təcridxanasına aparılıb. Onlarla birlikdə Sinan Aygün, Həsən Atilla Uğur, Osman Gürbüz, İbrahim Özcan, Birol Başaran, Kamal Aydın, Durmuş Əli Özoğlu, Barbaros Hayrettin Altıntaş istefada olan polkovnik, Ankara Ticarət Palatasının sədri Sinan Aygün də Metrisə salınıb. Dünən isə generallara qarşı rəsmi ittiham irəli sürülüb. Onlar "güc tətbiq etməklə hökuməti devirmək və ya hökumətin öz vəzifəsini yerinə yetirməsini tam, yaxud qismən əngəlləmək cəhdləri, həmçinin "silahlı təşkilat qurmaq və idarə etmək"də suçlanırlar. Ordu generalı, Atatürkçü Düşüncə Dərnəklərinin rəhbəri Ş. Əruyğurun vəkili Filiz Esen həbs qərarına etiraz edəcəklərini bildirib: "İllər boyu vətəninə sədaqətlə xidmət etmiş komandanımız yalan ittihamlarla tutulub. Bu ittihamların heç birini qəbul etmirik". X. Tolonun vəkili Özgür Meriç Turan isə həbs qərarının Türkiyə Konstitusiyanın 90 və 19-cu maddələrinə, həmçinin Avropa İnsan Haqları Konvensiyasının 6-cı bəndinə zidd olduğunu deyib. Xurşid Tolonun xanımı Aylan Tolon dünən Metris həbsxanasına yollanaraq 3 saat gözləyib və əri ilə görüşüb. Ordu generalı, Türkiyənin terrorla mübarizə üzrə sabiq koordinatoru Edip Başər isə bildirib ki, hazırda həbsdə olan Şənər Əruyğurla Xurşid Tolonu çox yaxından tanıyır. İkisinin də ürəklərində Türkiyəyə, türk millətinə, Atatürkə sevgi, hörmət, bağlılıq və sədaqətdən başqa heç nə yoxdur: "Bu günə qədər ikisinin də əyriliklərini görməmişəm". "Milliyet" qəzetinə verdiyi müsahibəsində o, siyasətin məhkəmə-hüquq sisteminə müdaxilə etdiyini və bundan çox böyük üzüntü duyduğunu bildirib: "İndiyə qədər türk ədliyyəsi ilə bağlı belə bir durum yaşanmayıb. İnsanlarımızın istər demokratiya, istərsə də hüquqa inamlarının azaldığını təəssüflə izləməkdəyik. Mən bu səbəblə şokdayam. Xalqın içində ən çox yayılan fikir bu həbslərin siyasi linç olmasıdır". Türkiyədə bəzi dairələrin və mətbuat orqanlarının son illərə qədər toxunulmaz sayılan generalların həbsini demokratikləşmə istiqamətində atılan ciddi addım kimi qiymətləndirməsinə dair sualı cavablandıran E.Başer "belə demokratiya olmaz" deyib: "Belə demokratikləşmə olmaz. Bir yandan siz demokratiyanın bəzi divarlarını yıxacaq, o biri tərəfdə mən buradan çıxardığım daşlarla, kərpiclərlə divar hörürəm deyəcəksiniz. Belə sarsaq iş olmaz. Məhkəmənin hökmündən əvvəl bəzi qəzet səhifələrində günah və günahkar barədə oxuyuram. Bu necə demokratiyadır?" Onun sözlərinə görə, bəzi siyasət və hakimiyyət dairələrinin nəzarətində olan medianın hədəfi Türkiyədə demokratiya, dünyəvilik və atatürkçülüyün əsas mühafizi olan ordudur. "Əgər bu problemlər çözülməsə, cəmiyyətin qütbləşməsinə yönəlmiş addımlara son qoyulmasa, böhranlar dalbadal davam edərsə Türkiyə Livana bənzəyə bilər. Bildiyiniz kimi, Livan Yaxın Şərqin sürəkli qanayan yaralırndan birilir. Orada bir ara böhran durulan kimi olur, sonra ara yenə qarışır. Düşünürəm ki, türk ulusu ölkənin belə vəziyyətə düşməsinə imkan verməz. Lakin problemlər və böhranlar belə davam edərsə, Türkiyə Silahlı Qüvvələri ölkənin Livana dönməsinə izn verər, ya verməz? Açıq deyim ki, mən bunun baş verməyəcəyini düşünürəm", - E.Başer deyib. Edip paşa daha sonra bildirib ki, həyata keçirilən əməliyyata "Ergenekon" adının verilməsinə qətiyyətlə etiraz edir. "İş o yerə çatıb ki, litseydə oxuyan gənclərdən "Törə nədir?" soruşanda "Cinayət!", "Ergenekon nədir?" deyəndə də "mütəşəkkil cinayətkar dəstə" cavabı alırsan. İndi də türk ulusunun yaranış dastanı olan Ergenekon kəlməsini "terror təşkilatı" kəlmələriylə eyniləşdirəcəklər. Bu kəlmədən nə üçün belə düşüncəsizcəsinə istifadə olundu, millətin həssas nöqtəsi nədən belə tapdandı - bilmirəm. Bildiyim sadəcə odur ki, olanlar fövqəladə dərəcə yanlış işlərdir", - E.Başer söyləyib. "Ergenekon" əməliyyatı çərçivəsində həbs olunanlardan biri, "Cumhuriyet" qəzetinin Ankara bürosunun rəhbəri Mustafa Balbay isə artıq azadlığa buraxılıb. "Avrasiya TV" (ART) telekanalının "Ankara rüzgarı" proqramında məşhur jurnalist Emin Çölaşanın suallarını cavablayarkən Balbay bildirib ki, ona istintaq zamanı əcaib suallar verilib. "Hər biri 4 dəfə çap edilmiş kitablarını "əşyayi-dəlil" kimi qeydə almışdılar. Məndən ""Ergenekon necə təşkilatdır?" soruşdular, "sizdən öyrəncəyəm" dedim. Telefon danışıqlarıma görə gələn ödəniş qəbzlərində məbləğlərin niyə çox olduğunu soruşdular, Xurşid Tolon və Şənər Əruyğurla bağlı bildiyim hər şeyi danışmağımı istədilər. Sonra general Əruyğur Jandarma Qüvvələri Komandanı olarkən onunla iş otağında görüşümün səbəblərini, nədən danışdığımı soruşdular. Jurnalistəm, kimlə nə zaman istəsəm görüşə bilərəm - burada əcaib nə var ki?! ABŞ səfiri ilə nahar yeməyində bir yerdə olmağımın səbəbləri soruşdular", - M.Balbay söyləyib. H.Bakuvi butovaz