Azadi stadionunda səsləndirilən təhqiramiz şüarlarla bağlı “Perspolis” klubuna etirazlar davam edir

SON XƏBƏRLƏR

Azadi stadionunda səsləndirilən təhqiramiz şüarlarla bağlı “Perspolis” klubuna etirazlar davam edir

2021.10.20, 07:36

Gunaz.tv

GünAz TV: Dekabrın 29-da Tehranın “Azadi” stadionunda bu şəhərin “Perspolis” və Təbrizin “Traxtur” komandaları arasında görüş keçirilib, görüş zamanı “Perspolis”in tərəfdarları əvvəldən planlaşdırılmış şəkildə Azərbaycan türk millətinin ünvanına ağır söyüş və şüarlar səsləndiriblər.

Bundan sonra azərbaycanlıların “Pesrpolis” klubuna qarşı etiraz səsləri yüksəldi, “Traxtur” klubunun məsulları stadionda baş verən hadisələrin əvvəldən planlaşdırıldığını bildirdilər.

Təbriz, Urmiyə və Ərdəbilin bir neçə millət vəkili irqçilərin bu hərəkətini qınadıqdan sonra Təbriz Şəhər Şurasının üzvü Şəhram Dəbiri də stadionda olub-bitənlərə öz kəskin etirazını bildirib.

“Tehranda keçirilən görüşdə “Perspolis” tərəfdarları Azərbaycan əhalisinə qarşı öncədən düşünülmüş şüarlar səsləndiriblər. Belə hərəkətlər qövmlər arasında nifaq yaradır. Ona görə də ilk öncə “Perspolis” klubu bu işi planlaşdıranlara qarşı tədbir almalıdır. “Traxtur” klubu da öz növbəsində bu məsələnin kökünü aydınlaşdırdıqdan sonra ciddi mövqe sərgiləməlidir”- deyə o Şura üzvlərinin keçirdiyi iclasda bildirib.

Ş.Dəbiri sözlərinin sonunda səlahiyyətli orqanları Azərbaycanın ünvanına təhqiramiz şüarlar səsləndirən “Perspolis” tərəfdarlarına qarşı ciddi tədbir almağa çağırıb.

Şərqi Azərbaycan Futbol Heyətinin rəisi isə Futbol Federasiyasına məktub yazaraq baş verən hadisəyə rəsmən etiraz bildirib. Azərbaycan türklərinin türkdilli qövm adlandırıldığı məktubda “Perspolis” tərəfdarlarının irqçi davranışları olduqca bayağı, ağıldan uzaq və öncədən planlaşdırılmış hərəkət kimi qiymətləndirilib. “Azərbaycanın şərif əhalisinin mənsub olduğu qövmü aşağılamaq etikadan kənar və şəriətə ziddir. Təhqirə yol verən “Perspolis” tərəfdarlarına qarşı ciddi tədbir alınmalıdır”- deyə məktubda vurğulanıb.

Şərqi Azərbaycan valisinin təhlükəsizlik və siyasi məsələlər üzrə müavini Rəhim Şöhrətifər isə “İsna” xəbər agentliyi ilə danışıqda Tehran klubunu azərbaycanlılardan üzr istəməyə çağırıb.

“Biz Futbol Federasiyasından bu məsələyə təcili reaksiya verməsini, görüşə ev sahibliyi edən klubdan isə üzr istəməsini tələb edirik. Mən Futbol Federasiyasının rəisi Mehdi Taca məktub yazaraq baş verən hadisəyə kəskin etirazımı bildirmişəm. Belə hadisələrin bir daha təkrar olunmaması üçün onun səbəbkarları müəyyən edilməli, onlara qarşı tədbir alınmalıdır”- deyə valilik rəsmisi vurğulayıb.

Azərbaycanlıların sözügedən hadisəyə etirazı haqda daha çox məlumat almaq üçün aşağıdakı xəbəri oxuya bilərsiniz:

Azərbaycanlı millət vəkillərindən Tehranın Azadi stadionunda türklərin təhqir edilməsinə reaksiya – VİDEO

N.S

GUNAZ.TV

SON XƏBƏRLƏR