Mayk Pens: “Amerika hökuməti İranla imzalanmış faciəli nüvə sazişini bir daha təsdiq etməyəcək”

SON XƏBƏRLƏR

Mayk Pens: “Amerika hökuməti İranla imzalanmış faciəli nüvə sazişini bir daha təsdiq etməyəcək”

2021.10.20, 07:36

Gunaz.tv

GünAzTV: ABŞ vitse-prezidenti Mayk Pens fevralın 22-də amerikalı mühafizəkarların konfransında çıxış edərək, İranın regionda yürütdüyü təxribat xarakterli siyasətindən və 5+1 qrupunun Tehranla imzaladığı nüvə sazişindən danışıb.

Pens bildirib ki, Amerika hökuməti və onun prezidenti Donald Tramp, İranın bölgənin sabitliyinə qarşı yönəlmiş təxribatçı fəaliyyətinə göz yummayacaq: “Amerika hökuməti, İranın bütün bölgənin sabitliyini pozan dağıdıcı fəaliyyətinə dözməyəcək və Qərblə İran arasında imzalanmış faciəli nüvə sazişini bir daha təsdiq etməyəcək”.

Həmin gün, İran xarici işlər nazirinin müavini Abbas Əraqçi jurnalistlərlə görüşündə, Amerika hökumətini nüvə sazişinin şərtlərini pozmaqda günahlandırıb. O deyib ki, əgər nüvə sazişi (“Bərcam”) maddi baxımdan İrana sərfəli olmasa və xarici banklar İranla sövdələşmədən imtina etsələr, ölkəsi həmin sazişdən çıxacaq: “Hesab edirik ki, bu saziş, uğurlu olmayıb. Çünki, sanksiyalar tamamilə aradan qaldırılmadığına görə, biz bu sazişin iqtisadi nəticələrini bu günə qədər görməmiik. Amerika hökuməti də hər gün, bu razılaşmanın şərtlərini pozur. Düşünürük ki, bu razılaşma indiki vəziyyətlə çox sürə bilməz. Əgər xarici banklar və şirkətlər bizimlə işləməsələr, biz, ölkəmizə xeyri və faydası olmayan bu sazişdə qala bilməyəcəyik”.

Abbas Əraqçi

Prezident Tramp, yanvarın 12-də bəyanat yayaraq, İranın 2015-ci ildə Qərb dövlətləri ilə imzaladığı nüvə sazişinin şərtləri çərçivəsində bu ölkəyə qarşı tətbiq edilən sanksiyaların aradan qaldırılması müddətini 120 günlüyə uzatdığını bildirib.

O bildirib ki, o, sonuncu dəfə olaraq İrana güzəştə gedir və əgər qarşıdan gələn 4 ay müddətində, nüvə sazişinə düzəlişlər edilməsi və Tehranın raket proqramı barədə danışıqlar aparılması ilə bağlı Amerikanın tələbləri yerinə yetirilməsə, İrana qarşı tətbiq edilmiş əvvəlki sanksiyalar yenidən bərpa ediləcək: “Hesab edirik ki, İranla imzalanmış nüvə sazişinin ciddi iradları aradan qaldırılmalı, ona düzəlişlər edilməlidir. Bu, İran üçün sonuncu bir fürsət və şansdır. Nüvə sazişindəki kobud iradlar aradan qaldırılmalıdır. Mən, Tehranla həqiqi bir razılaşmanın mümkün olmadığı qənaətinə gəlsəm, dərhal bu sazişdən çıxacağam".

A.M

GUNAZ.TV

SON XƏBƏRLƏR