“Heyran gədiyi”ndə Gilan Əyalətinə aid lövhələrin asılması azərbaycanlı gəncləri hərəkətə gətirib

SON XƏBƏRLƏR

“Heyran gədiyi”ndə Gilan Əyalətinə aid lövhələrin asılması azərbaycanlı gəncləri hərəkətə gətirib

2021.10.20, 07:36

Gunaz.tv

GünAz TV: Güney Azərbaycanın Ərdəbil Əyalətində yerləşən “Heyran gədiyi”nin bu əyalətdən ayırıb Gilan Əyalətinə ilhaq edilməsi planı ilə bağlı cəhdlər səngimək bilmir.

Yerli əhalidən əldə olunan məlumata görə, Novruz bayramı günlərində “Heyran gədiyi” məntəqəsində turistlərə xidmət göstərmək bəhanəsi ilə təxminən 15 lövhə quraşdırılıb. Gilan Əyaləti rəhbərliyi tərəfindən quraşdırılan lövhələr “Heyran gədiyi”ni Gilan Əyalətinin ərazisi kimi göstərir. Lövhələrin üzərində “Astara heyranı”, “Gilan Əyaləti Xeyriyyə İşləri və Vəqflər İdarəsi” və “Astara Şəhəri Xeyriyyə İşləri və Vəqflər İdarəsi” kimi sözlər yazılıb.

Gilan Əyaləti rəhbərliyinin Ərdəbil Əyalətinə ərazi iddiası azərbaycanlı gənclərin kəskin etirazı ilə qarşılanıb. Məlumata görə, artıq əksər lövhələrin üzərindəki yazılar gənclər tərəfindən silinərək oxunulmaz hala salınıb.

Oxşar hadisələr son illərdə dəfələrlə baş verib, Ərdəbil və Azərbaycana qarşı yönəlmiş cəhdlər hər zaman yerli əhali və azərbaycanlı fəalların kəskin etirazına səbəb olub.

Bundan öncə İranın “Mehr” və “İrna” kimi rəsmi xəbər agentlikləri “Heyran gədiyini” dəfələrlə “Astara heyranı” adı ilə tədqim edərək onun Gilan Əyalətinə birləşdirilməsi üçün psixoloji zəmin yaratmağa çalışıblar.

Ötən günlərdə Astara Şəhər İcra Hakimiyyətinin başçısı Yunis Rənckeş Novruz bayramı günlərində “Heyran gədiyi”ndə 15 lövhənin asılacağı barədə açıqlama vermişdir.

O həmçinin bildirmişdir ki, yeni ildə (hicri-şəmsi təqvimi ilə 1397-ci il) Gilan Əyalətinə giriş lövhəsi Nəmin şəhərində quraşdırılacaq.

Hələlik Güney Azərbaycan, xüsusi ilə də Ərdəbil Əyalətinin millət vəkilləri “Heyran gədiyi” ilə bağlı baş verən son olaylara heç bir münasibət bildirməyiblər.

Deyilənlərə görə, hazırda Nəmin şəhərinin şərq tərəfində Niyarəq kəndinin yaxınlığında tikanlı məftil çəkilib. Tikanlı məftilin Nəminin şərq tərəfini ayırıb Gilan Əyalətinə ilhaq etmək məqsədi ilə çəkildiyi bildirilir.

Astara şəhəri Gilan Əyalətinin mərkəzi olan Rəşt şəhərinin 220, Ərdəbilin isə 79 kilometrliyində yerləşir. Bu şəhər vaxtı ilə Ərdəbil şəhəri və Şərqi Azərbaycan Əyalətinə bağlı olub. Sonralar ölkənin inzibati ərazi bölgüsündə müvəqqəti olaraq Gilan Əyalətinə ilhaq edilib. Şəhərin əhalisi Azərbaycan türkləridir, onlar bütün azərbaycanlılar kimi Astaranın yenidən Ərdəbil Əyalətinə ilhaq edilməsini tələb edir.

N.S