Ustad Həsən Dəmirçinin 40 mərasimindən VİDEO

SON XƏBƏRLƏR

Ustad Həsən Dəmirçinin 40 mərasimindən VİDEO

2021.10.20, 07:36

Gunaz.tv

GünAz TV: Tanınmış azərbaycanlı milli-mədəni fəal, musiqi ustadı mərhum Həsən Dəmirçinin (Həsən Azərbaycan) 40 mərasimi Təbrizdə keçirilib.

Çərşənbə günü baş tutan mərasimdə mərhumun ailə üzvləri və yaxınları ilə birlikdə çox sayda azərbaycanlı fəal iştirak edib. Mərasimin birinci hissəsi “Vadi Rəhmət” qəbiristanlığında mərhumun məzarı üstündə baş tutub. Mərasim zamanı fəallar Azərbaycan türkcəsində şeirlər oxuyub, ustad H.Dəmirçinin vətən uğrunda apardığı mübarizə barədə çıxışlar ediblər.

Həmin gün günortadan sonra Təbrizin “Cavad-ul Əemmə” məscidində mərasim davam etdirilib.

https://www.youtube.com/watch?time_continue=4&v=D1mBq06tveU

Həsən Dəmirçi iyunun 24-ü sübh saatlarında Təbrizdə müalicə aldığı “Ali nəsəb” xəstəxanasında vəfat edib, bir gün sonra Təbrizin “Vadi Rəhmət” qəbiristanlığında dəfn edilib. Mərhumun dəfn mərasimi böyük izdihamla müşayiət olunub.

Həsən Dəmirçi 1941-ci ildə Təbrizdə dünyaya göz açıb. O şair, yazıçı və musiqi ustadı kimi bütün ömrünü vətəni Azərbaycan, onun musiqisi və ictimai-siyasi məsələlərinə həsr etmişdir. Azərbaycan türk milləti bu xidmətlərinə görə ona “Həsən Azərbaycan” ləqəbi verib.

H.Dəmirçi Güney Azərbaycanın klassik və muğan musiqisi üzrə ən tanınmış incəsənət xadimlərindən biri olub.

Azərbaycanlı fəal, mərhum Prof. Zehtabi ilə birlikdə 1986-cı ildə Təbrizdə “Azərbaycan Mədəniyət Ocağı” Dərnəyinin qurucularından biri olub. O həmin zaman dərnəyin musiqi bölümü üzrə məsul seçilib.

“Azərbaycan Mədəniyət Ocağı” Dərnəyi musiqi sahəsində böyük uğurlara imza atıb. Bu dərnəyin sayəsində Əli Səlimi kimi böyük ustadlar musiqi sahəsində addımlamağa imkan tapıblar.

Dərnəyin kurslarında tar, kamança, qarmon, qara zurna, qaval və s. kimi Azərbaycan musiqi alətləri öyrədilir. Dərnəkdə həmçinin türk dilində avaz oxumaq və Azərbaycan rəqsi kusrları təşkil olunur.

H.Dəmirçi muğam musiqisi haqda bir neçə cild kitabın müəllifidir.

“Həsən Azərbaycan” adı ilə tanınan mərhum Həsən Dərmirçi Azərbaycan türk millətinin demokratik və milli hüquqları uğrunda apardığı mədəni mübarizəyə görə dəfələrlə təhlükəsizlik qüvvələri tərəfindən saxlanılıb, həbs edilib və müxtəlif təzyiqlərə məruz qalmışdır.

N.S