Rusiya ilə Amerika İranın Suriyada hərbi mövcudluğuna son vermək barəsində razılığa gəliblər

SON XƏBƏRLƏR

Rusiya ilə Amerika İranın Suriyada hərbi mövcudluğuna son vermək barəsində razılığa gəliblər

2021.10.20, 07:36

Gunaz.tv

GünAz TV: Ərəbdilli “Əş-Şərq Əl-Əvsat” qəzeti Rusiya ilə Amerika Birləşmiş Ştatlarının İranın Suriyada hərbi mövcudluğuna son verilməsi istiqamətində razılığa gəldiyi barədə məlumat dərc edib.

Məlumata əsasən, Dövlət Departamentinin rəhbəri Mayk Pompeo may ayının ortalarında Rusiyaya etdiyi səfər çərçivəsində Vladimir Putin və Serqey Lavrovla keçirdiyi görüşlərdə ABŞ-ın Suriya üzrə xüsusi nümayəndəsi Ceyms Cefreyin də iştirak edib.

Görüşlər zamanı Pompeo Rusiya tərəfinə ABŞ-ın Suriyada münaqişəyə və İranın bu ölkədə hərbi mövcudluğuna son vermək kimi müddəaları da əhatə edən 8 maddədən ibarət layihəsini təqdim edib. Layihədə 8 ildir davam edən vətəndaş müharibəsini dayandırmaq, İŞİD kimi terror təşkilatları və Suriyada mövcud olan kütləvi qırğın silahlarını məhv etmək üçün siyasi həll yolları göstərilir.

Qəzetin yazdıqlarına əsasən, Rusiya tərəfi bu layihənin bütün müddəaları, eləcə də İranın Suriyada hərbi mövcudluğuna son verilməsi ilə razılaşıb. Razılaşmaya münasibət bildirən Avropa isə Rusiyanın bu layihənin şərtlərinin hamısına əməl edəcəyinə şübhə ilə yanaşırlar. Onlar təkcə İranın Suriyadan çıxarılması deyil, bəndlərdə nəzərdə tutulmuş bütün müddəaların həyata keçirilməsini istəyiblər.

Bu layihənin bir daha iyunun 24-də Amerika prezidentinin milli təhlükəsizlik məsələləri üzrə müşaviri Con Boltonun öz rusiyalı həmkarı Nikolay Patruşev ilə İsraildə keçirilməsi planlaşdırılan görüşündə bir daha irəli sürülməsi gözlənilir. Həmin günün səhəri onların öz israilli həmkarları Mayer bin Şabat ilə görüşü də nəzərdə tutulur.

Qeyd etmək lazımdır ki, son illər Rusiya ilə İran arasında Suriya məsələsində ixtilaflar nəzərə çarpır. Rusiya İsrailin Suriyada İrana qarşı həyata keçirdiyi hava hücumlarına heç bir reaksiya vermir. Mütəxəssislər bildirirlər ki, bunun səbəbi Moskvanın Tel-Əvivlə İranın Suriyadan çıxarılması ilə bağlı razılığa gəlməsidir. Hətta bu hücumlar zamanı Rusiya Suriyada yerləşdirdiyi S-300 hava hücumundan müdafiə sistemlərini söndürür.

Eləcə də, İranla Amerika arasında yaşanan son gərginliklər fonunda Rusiya prezidenti Vladimir Putin tərəflər arasında müharibə yaşanacağı təqdirdə, ölkəsinin bu müharibəyə qarışmayacağını demişdi.

Ə.A

GUNAZ.TV

SON XƏBƏRLƏR