Contact Us

SON XƏBƏRLƏR

Zərif: “ İranın strateji səbri artıq bitdi”

2021.10.20, 07:36
Zərif: “ İranın strateji səbri artıq bitdi”

Gunaz.tv

GünazTV: İranın xarici işlər naziri Məhəmmədcavad Zərif oktyabrın 16-da Tehranda keçirilən İran İslam Respublikası ilə Cənubi Afrikanın müştərək komissiyasının 14-cü iclasında çıxış edərək, nüvə sazişindən, regional məsələlərdən və ölkəsinin Avropa qarşısında “strateji səbr”inin tükənməsindən danışıb.

 

Öz çıxışında İranın 5+1 qrupu ilə həssas və mürəkkəb danışıqlar apardığına toxunan Zərif deyib ki, Amerikanın həmin razılaşmadan çıxması BMT Təhlükəsizlik Şurasının 2231 saylı qətnaməsinə və BMT üzvü olan bütün ölkələrin istək və iradəsinə qarşı zidd addım idi: “Amerikanın nüvə sazişindən çıxmasından sonra Avropa da razılaşma ilə bağlı üzərinə götürdüyü öhdəlikləri yerinə yetirmədi. Halbuki bunun üçün 1 il fürsəti var idi. Lakin təəssüflər olsun ki, həmin müddətdə biz Avropanın öhdəliklərinin səmərəli icrası ilə bağlı hər hansı bir addımının  şahidi olmadıq.

 

Avropa bir daha göstərdi ki, o, üzərinə götürdüyü öhdəlikləri yerinə yetirməkdə acizdir. İranın isə strateji səbri artıq bitdi. Məhz buna görə də, biz nüvə razılaşmasının (“Bərcam”ın) şərtlərini və onun 26-cı və 27-ci bəndlərinə əsaslanaraq, razılaşmanın icrası ilə bağlı üzərimizə götürdüyümüz öhdəlikləri azaltmağa başladıq və bunu üç mərhələdə etdik. Bildiririk ki, nüvə razılaşmasını imzalayan qarşı tərəflər öz öhdəliklərini yerinə yetirməkdən imtina etsələr, biz öhdəliklərimizi daha da azaltmaq üçün növbəti addımlar atacağıq” –deyə, İranın xarici işlər naziri Məhəmmədcavad Zərif bəyan edib.  

 

 

Xatırladaq ki, Amerika prezidenti Donald Tramp 2018-ci il, mayın 8-də Ağ Evdə çıxış edərək Vaşinqtonun İranla Qərb arasında imzalanmış nüvə sazişindən çıxdığını rəsmən elan edib: “İran rejimi terrorizmin əsas himayədarı olaraq qalır. Bu rejim, bölgənin müxtəlif ölkələrinə və terrorçu qruplara raket göndərir, bütün Orta Şərqdə yaşanan çaxnaşma və qarşıdurmaları qızışdırır, od-alov üstünə benzin səpir, “Hizbullah”, “Həmas”, “Taliban” və “Əl-Qaidə” kimi terrorçu qruplaşmalara dəstək verir” –deyə, ABŞ prezidenti Donald Tramp bildirib.

 

A.M

Açar Sözlər :

SEÇİLMİŞ XƏBƏRLƏR

Çox oxunanlar