Koronavirusun yayılması Qərbi Azərbaycanda zəlzələdən xəsarət alanlara yardımı ləngidir

SON XƏBƏRLƏR

Koronavirusun yayılması Qərbi Azərbaycanda zəlzələdən xəsarət alanlara yardımı ləngidir - VİDEO

2021.10.20, 07:36

Gunaz.tv

GünAz TV: Koronavirus infeksiyasının İranda geniş yayılması Qərbi Azərbaycan əyalətinin Qotur şəhərində baş verən zəlzələ nəticəsində xəsarət alanlara yardımı ciddi şəkildə çətinləşdirib.

İran rəsmiləri koronavirusun daha geniş yayılmasının qarşısını almaq məqsədilə vətəndaşlara evdə qalmalarını tövsiyə edirlər, bu səbəbdən də zəlzələdə xəsarət alan bölgədə yardım və bərpa işləri ilə məşğul olan qurumların əməkdaşlarının bir çoxu əraziyə getməkdən imtina edir və fəaliyyətini dayandırıb.

Fevralın 23-də sübh və axşam saatlarında Qotur şəhərində 5.7 və 5.9 gücündə iki zəlzələ baş vermişdir. Zəlzələnin xəsarətləri ilə bağlı dəqiq məlumat verilməsə də “Sepaha” bağlı “Təsnim” Xəbər Agentliyi mart 2-də ətraf kəndlərdə 6137 evə ziyan dəydiyini dərc etmişdi.

Qeyri-rəsmi mediada yayılan məlumatlara görə, Qotur zəlzələsi nəticəsində 300-dən çox insan yaralanıb, 1 nəfər canını itirib, 21,000-ə yaxın insan isə evsiz qalıb.

Zərərçəkənlərin bir hissəsi bölgədə şiddətli soyuq havanın hökm sürdüyü və istilik və sığınacaq ehtiyaclarının qarşılanmadığına görə yaşayış məntəqələrini naməlum məqsədə tərk ediblər.

Başqa yerlərə köçmək imkanı olmayıb, kəndlərində qalanlar isə Qızıl Aypara cəmiyyətinin verdiyi məntəqənin şəraitinə uyğun olmayan nazik çadırlarda yaşayırlar. Əhali özü bu çadırları plastik və parça ilə möhkəmləndiriblər.

Xoy məntəqəsinin İcra Başçısı Məhəmməd Abedi zəlzələdən üç gün sonra 43 kənddə 4000 ailənin xəsarət aldığını, zərərçəkənlərin hamısının lazımı imkanlar, o cümlədən qida və isitmə avadanlıqları ilə təmin olunduğunu iddia etmişdi. Lakin ictimai şəbəkələrdə yayılan görüntülər bu iddianın doğru olmadığını , zərərçəkənlərin çox ağır və acınacaqlı şəraitdə yaşadığını göstərir.

Aşağıdakı videoda Qotur sakini olan vətəndaş lazımı imkanların olmamasından, zərərçəkənlərin zəruri yardımlar, o cümlədən çadırla təmin olunmamasından danışır.

Qərbi Azərbaycan Kənd Təsərrüfatı Təşkilatının rəisi Rəsul Cəlili mart 4-də məntəqədən görüşü zamanı zəlzələnin heyvanların saxlanıldığı tikintilərə və əhalinin mal-qarasına təxminən 56 milyard tümən dəyərində ziyan vurduğunu deyib.

Ü.F

GUNAZ.TV

SON XƏBƏRLƏR