Contact Us

SON XƏBƏRLƏR

Döyülərək tutulan iranlı tələbə Əli Yunisinin ailəsi onun həbsi ilə bağlı rəsmilərdən izahat tələb edib

2021.10.20, 07:36
Döyülərək tutulan iranlı tələbə Əli Yunisinin ailəsi onun həbsi ilə bağlı rəsmilərdən izahat tələb edib

Gunaz.tv

GünAz TV: Ailəsinin gözü qarşısında təhlükəsizlik qüvvələri tərəfindən vəhşicəsinə döyülərək həbs edilən tələbə fəal Əli Yunisinin bacısı Aidə Yunisi video müraciət yayaraq, rəsmilərdən bu xüsusda izahat tələb edib.

 

Aprelin 10-da həbs edilmiş Əli Yunisi 2016-ci ildə İranda keçirilmiş Astronomiya üzrə ölkə çempionatının gümüş, 2017-ci ildə isə Astronomiya üzrə Dünya Çempionatının qızıl medalını qazanıb.

 

Ailəsinin sözlərinə görə, tələbəni tutmaq üçün evlərinə 12 təhlükəsizlik işçisi gəlib. Onlar Əlini tutarkən ailə üzvlərinin gözünün qarşısında onu vəhşicəsinə döyüblər. Üz-gözü al qana boyanmış tələbəni gözləri qarşısında görən ailə hadisədən və təhlükəsizlik işçilərinin qəddarlığından şoka düşüb.

 

Qardaşı Rza bildirir ki, onların Əlini vəhşicəsinə döyməsi nəticəsində o, baş və alın nahiyəsindən ciddi xəsarətlər alıb və üz-gözü al-qana boyanıb.

 

Hələlik hüquq mühafizə orqanları tələbə fəalın saxlanma səbəbini açıqlamayıblar. Bununla belə, Şərif Texnologiya Universitetinin "Bəsic" rəhbəri Əlirza Qadiri tələbənin həbs səbəbinin onun universitetdəki fəaliyyətləri ilə bağlı əlaqəsinin olmadığını iddia edib.

 

Aidə Yunisi Qadirinin sözlərinə verdiyi cavabda bildirib ki, ya açılmış cinayət işinin detallarını doğru olaraq Əlinin ailəsinə bəyan etməlisiniz, ya da yalan danışdığınıza görə üzr istəməlisiniz.

 

"Hansı qanunda 20 yaşlı bir gənci vəhşicəsinə döyərək, üz-gözünü al-qana boyayaraq həbs etməyə və bununla da onun ata- anasını şoka salmağa icazə verilir?"- deyə xanım Yunisi universitetin "Bəsic" rəhbəri Əlirza Qadiriyə xitabən əlavə edib.

 

Təhlükəsizlik orqanları işçiləri Əli Yunisi ilə eyni gündə digər tələbə fəal Əmirhüseyn Muradini də həbs ediblər. Hər iki gəncin harada və necə saxlandığı, eləcə də səhhətləri ilə bağlı heç bir məlumat yoxdur. Ailələri hazırda onların ağır işgəncələrə məruz qaldığını düşünürlər.

 

Fizika fakültəsində təhsil alan Əmirhüseyn Muradi İranın 2017-ci ildə ölkə üzrə keçirilmiş Astronomiya Olimpiada gümüş medal qazanıb.

 

Ə.A

 

Açar Sözlər :

SEÇİLMİŞ XƏBƏRLƏR

Çox oxunanlar