O, müsahibədə son vaxtlar İranda türk milli fəallara qarşı çıxarılan ədalətsiz məhkəmə qərarlarından, həbs və şallaq hökmlərindən danışıb.

J.Təbrizli habelə BMT-nin İranda insan haqları üzrə xüsusi məruzəçisinin illik hesabatı haqqında məlumat verib.

“Bu yaxınlarda Ərdəbil şəhərində 12 vətəndaşın həbs və şallaq cəzasına məhkum edilməsi İran Azərbaycanında mədəni fəallar arasında geniş təpki yaradıb. Bu vətəndaşlar keçən ilin sentyabr ayında Azərbaycan Respublikasına dəstək mitinqləri ilə əlaqədar mühakimə ediliblər”-deyə, Jalə Təbrizi bildirib.

Jalə Təbrizli xüsusilə şallaq hökmünün milli fəallar arasında qorxu salmaq məqsədilə çıxarıldığını vurğulayıb:
“Eyni zamanda ki, İslam Cümhuriyyəti öz (hərbi) qüvvələrini orada sərhədə topladı, o tərəfdən də bunların mühakimələri başladı. Bu mühakimələrin hamısı qorxu yaratmaq üçündür. Şallaq hökmü ilə bizə həqarət edirlər. Yəni bir milləti təhqir edirlər".

Son aylarda GüneyAzərbaycanda təşkil olunan etiraz aksiyaları ilə əlaqədar nəzarət altına alınan bəzi fəalların həm İnqilab, həm də cəza məhkəmələrində mühakimə edildiyini vurğulayan hüquq müdafiəçisi hesab edir ki, bu, qanunsuzdur.

"Əvvəla bunu deyim ki, İnqilab Məhkəməsi inqilabın əvvəlində idi. İndiyə qədər ləğv edilməli idi. Amma, indi 43 ildir bunlar davam edir və əslində qanunsuz məhkəmələrdir.

Fəalları indi iki məhkəmədə mühakimə edirlər ki, birində hökm almasalar, o birində mütləq məhkum olsunlar"-deyə, hüquq müdafiəçisi bildirib.

O, bildirib ki, BMT-nin İranda insan haqları üzrə xüsusi məruzəçisi Cavid Rəhman oktyabrın 25-də BMT-nin Baş Məclisində illik hesabatını təqdim edərkən xüsusilə İranda edam cəzasından siyasi alət kimi istifadə edildiyini önə çəkib.

“Cavid Rəhmanın yeni hesabatı edamlar haqqında idi. İslam Cümhuriyyəti bugün yenə başlayıb insanları, hətta uşaqları edam etməyə, həbsxanalarda insanları yox etməyə. Bütün bunları Cavid Rəhman aşkar şəkildə deyib"-deyə, hüquq müdafiəçisi bildirib.

Qeyd edək ki, Jalə Təbrizlinin rəhbərlik etdiyi "Ərk"-Azərbaycan İnsan Haqları Cəmiyyətinə bir müddət əvvəl BMT-nın İqtisadi və Sosial Şurası (ECOSOC) yanında məsləhətçi statusu verilib.

J.Təbrizli bu status vasitəsilə İran Azərbaycanında insan haqları pozuntularını daha çox səsləndirəcəklərini söyləyib.

“Biz bu statusu almaq üçün çox mübarizə apardıq. Təkidimiz bu idi ki, bizim məsələlərimizin çoxu İranın insan haqları qismində gündəmə gəlmir.

Azərbaycanın problemlərini: ekologiya, ana dili və milli kimlik mübarizəsini, işçi, uşaq və qadın hüquqlarını, işsizlərin məsələsini, Urmiyə gölünün quruması və s. problemləri gündəmə gətirmək lazımdır.

Azərbaycanda müxtəlif məzhəbə inanan insanlar yaşayır və bunların çoxu basqı altındır. Yəni o qədər problemimiz var ki, bizim gərək öz qeyri-hökumət təşkilatımız, öz statusumuz olaydı ki, öz haqlarımızı müdafiə edə bilək”-deyə, Jalə Təbrizli vurğulayıb.

C.E