Təbrizin millət vəkili Azərbaycan Mis Şirkətinin yaradılmasını təklif edib

SON XƏBƏRLƏR

Təbrizin millət vəkili Azərbaycan Mis Şirkətinin yaradılmasını təklif edib

2022.01.10, 09:46

Gunaz.tv

O, bunun Azərbaycan xalqının qanuni və təbii haqqı olduğunu deyib.

Əhməd Əlirzabeygi uzun illərdir müxtəlif bəhanələrlə bunun qarşısının alındığını və azərbaycanlıların öz sərvətlərindən pay götürmələrinə imkan verilmədiyini söyləyib.

“İran Milli Mis Şirkətinin gəlirlərinin üçdə biri Şərqi Azərbaycana məxsusdur. Ancaq bu günə kimi bundan Azərbaycana heç nə ödənilməyib. 2020-ci ildə Milli Mis Şirkəti 50 min milyard gəlir əldə edib.

Ancaq bunun qarşılığında Şərqi Azərbaycanın infrastrukturunun qurulması və yenilənməsi üçün heç bir vəsait ayrılmayıb”-deyə, Əlirzabeygi bildirib.

Millət vəkili deyib ki, Milli Mis Şirkəti əldə etdiyi gəlirlərdən Şərqi Azərbaycanın magistral və dəmir yolları, təbiətin bərpası və başqa bu kimi məsələlərə vəsait ayırmalıdır.

Onun sözlərinə görə, bu istiqamətdə heç bir iş görməyib.

O, Şərqi Azərbaycandan əldə edilən gəlirlə Kirman infrastrukturuna böyük məbləğdə vəsait ayırılmasını ədalətsizlik adlandırıb.

“Kirman nümayəndələrinin çıxışları cavab verməyə layiq deyil. Onlar qeyri-ciddi, məntiqsiz danışırlar. Çıxarılan qərar qanunidir və Azərbaycannın haqqıdır”-deyə, Əhməd Əlirzabeygi Kirman və Rəfsəncan şəhərlərinin nümayəndələrinin Təbrizin “Traxtur” və “Maşinsazi” futbol komandalarının Milli Mis Şirkətinin malikiyyətinə verilməsi ilə bağlı etirazlarına cavab olaraq bildirib.

Təbrizin İran parlamentindəki nümayəndəsi deyib ki, istəkləri Şərqi Azərbaycanın haqqının əldə edilməsidir və Sənaye, Mədən və Ticarət naziri adı çəkilən iki futbol komandasına maddi dəstəklə bağlı qəti münasibət bildirməlidir.

Milət vəkili bir sıra qrup və cərəyanların aranı qarışdıraraq Azərbaycan Mis Şirkətinin qurulması məsələsini kölgədə qoymağa çalışdıqlarını deyib və onların məqsədlərinə çatmaması üçün mövzudan qırağa çıxmamağı tövsiyə edib.

Bununla yanaşı Əhər şəhərinin İran parlamenindəki nümayəndəsi Əhməd Məhərrəmzadə də Azərbaycan Mis Şirkətinin qurulmasının vacib olduğunu deyib.

“Haqq alınmalıdır, kimsə onu bizə pay verməyəcək. Azərbaycanlılar başqasının haqqına göz dikməyiblər, sadəcə özlərinə məxsus olanı təlb edirlər. Bu günə kimi Azərbaycan sərvətləri Kirmana daşınırdı.

Bundan sonra buna imkan vermək niyyətində deyilik”-deyə, Əhərin nümayəndəsi həkmarı Əlrzabeyginin mövqeyini dəstəkləyib.

Qeyd edək ki, yanvarın 4-ü, axşam saatlarında Təbrizin İran parlamentindəki bir neçə nümayəndəsi, Milli Mis Şirkətinin rəhbəri, İranın Sənaye, Mədən və Ticarət nazirinin iştirakı ilə keçirilən toplantıda klubların “Süngün” mis mədəni şirkətinin himayəsinə verilməsi barədə andlaşma imzalanıb və şirkət klublara dəstək verəcəyini vəd edib.

Bundan sonra Kirmanın İran parlamentindəki nümayəndəsi Məhəmmədrza Puribrahimi və Rəfsəncan nümayəndəsi Hüseyn Cəlali buna etiraz edib, mis şirkətinin gəlirlərinin Kirmana aid olduğunu iddia ediblər.

C.E

GUNAZ.TV

SON XƏBƏRLƏR