Türkiyədə seçkilər: “Ərdoğan onunla sövdələşməyə gedə bilər”-Politoloq

SON XƏBƏRLƏR

Türkiyədə seçkilər: “Ərdoğan onunla sövdələşməyə gedə bilər”-Politoloq

2023.05.15, 15:43

Gunaz.tv

Politoloq Turan Rzayev Günaz.TV-yə açıqlamasında bildirib ki, seçkidə sürpriz nəticəni isə “ATA İttifaqı”nın namizədi Sinan Oğan göstərib.

“Hər kəs ondan 2 faiz civarında səs gözlədiyi halda, Sinan Oğan 5,2 faizdən yuxarı səs toplamağı bacardı. Namizədlərin heç biri 50+ səs faizi toplamadığından, 28 mayda ikinci tur olacaq. O ki qaldı İstanbul, Ankara və İzmir kimi böyük şəhərlərdə müxalifətin üstünlük qazanmasına əlbəttə, bu şəhərlərdə müxalifətin üstün olması AKP-in ciddi itkisidir.

Ümumiyyətlə qeyd etdiyim bu üç şəhər hazırda CHP nəzarətindədir. İzmir hər zaman CHP-nin sarsılmaz qalası olub. İstanbul və Ankara gəldikdə isə bu da daha çox Əkrəm İmamoğlu və Mansur Yavaş faktoruna görədir.

Lakin bu o demək deyil ki AKP və ümumilikdə “Cumhur ittifaqı” səs ala bilməyib. Xeyr. Sadəcə səslərin 50 faizdən çoxu bu şəhərlərdə Kılıçdaroğlu və müxalifətə verildi”-deyə, Turan Rzayev bildirib.

Politoloq əlavə edib ki, iri şəhərlərdə AKP-nin səs itkisi Ərdoğan iqtidarının yanlış siyasəti ilə bağlı deyil:

“Düşünmürəm ki AKP-in yanlış siyasəti bu şəhərləri CHP-in nəzarətinə keçməsi ilə nəticələnib.

Məsələ ondadır ki, xarici təsirlər səbəbindən Türkiyə iqtisadiyyatının geriləməsi, TL-dollar balansının kəskin pozulması, miqrant böhranı, baş verən ardıcıl dəhşətli zəlzələ və s. səbəblər Ərdoğanın nüfuzuna müəyyən qədər zərbə vurmuşdu. Bu da öz növbəsində CHP-in İstanbul və Ankara kimi şəhərlərdə nüfuzunu artırdı.

Əgər konkret bir səhvdən danışırıqsa Ərdoğanın vaxtından öncə ABŞ-la gərginliyə girməsini bir səhv kimi götürmək olar. Onun “Ey Amerika” deməsi, İsrail və ərəb ölkələri ilə gərginliyə girməsi hesab edirəm hakimiyyəti dövrünün ən ciddi yanlışları oldu. Əlbəttə ki bu da daxili siyasətə təsirsiz ötüşmədi. Məhz bundan sonra TL-dollar balansı kəskin pozuldu”.

Politoloq hesab edir ki, seçkilərin ikinci turunda Sinan Oğanın verəcəyi qərar həlledici olacaq:

“İkinci turda Rəcəb Tayyib Ərdoğanın Sinan Oğanın dəstəyini ala biləcəyini düşünürəm. Çünki onun dəstəkçilərinin böyük bir qismi milliyyətçidir və Ərdoğan Oğanla sövdələşməyə gedə bilər”.

Ayxan

GUNAZ.TV

SON XƏBƏRLƏR