Elçibəy İnstitutunun direktoru Oktay Qasımov Günaz.TV-yə açıqlamasında bildirib ki, seçkidən sonra ciddi gərginliyin olacağı gözlənilmir:

“Bazar günü keçiriləcək prezident seçkilərininin ikinci turunda böyük ölçüdə sürpriz gözləmirəm. Baxmayaraq ki, hər iki namizəd ciddi mübarizə aparır, öz tərəfdarlarını seçkidə aktiv iştirak etməyə çağırır.

Seçkidə iştirak etməyən 8 milyon nəfər də hər iki tərəfin diqqət mərkəzində olan seçici kütləsidir.

Hər iki tərəf bu seçki təbəqəsini seçkiyə dəvət etmək, onun seçkidə iştirakını təmin etmək üçün müxtəlif üsullara əl atırlar. 

Mənim ehtimalıma görə, Türkiyə prezidenti Rəcəb Tayyib Ərdoğanın səsləri artacaq. Bunu keçirilən rəy sorğuları da göstərir. Sorğuların nəticələrinə görə, hazırkı prezident 52, 54 faiz səs yığacaq”. 

Ərdoğan qalib gələcəyi təqdirdə müxalifət narazıları meydana çağıra, “Gəzi parkı” olayları təkrarlana bilərmi? Politioloq hesab edir ki, hansısa ciddi insidentin baş verəcəyi proqnozlaşdırılmır:

“Mayın 14-də Türkiyədə parlament seçkiləri keçirilirdi, ciddi rəqabət var idi. Tərəflər bir-birinə qarşı sərt ritorikadan istifadə edirdilər.

Amma seçki günü səsvermə zamanı biz həm seçicilər tərəfindən, həm də namizədlər tərəfindən kifayət qədər mütəşəkillik və siyasi davranış müşahidə etdik.

Bu baxımdan birinci turda heç bir kiçik bir insident belə baş vermədi. İkinci turda da hansısa qarşıdurmanın, gərginliyin olacağını düşünmürəm”. 

“Böyük mitinqlərin olacağını düşünmürəm”-Turan Rzayev

Politoloq Turan Rzayev isə bildirib ki, ikinci turun da ən az birinci tur qədər maraqlı keçəcəyini demək olar: 

“Namizədlər arasında əslində səs fərqi çox deyil: “Cümhur İttifaqı” 49,4%,“Millət İttifaqı” 44,9% səs toplayıb.

Gözlənildiyi kimi prezident seçkisinin II turu fonunda Sinan Oğan Ərdoğanı dəstəkləsə də Zəfər Partiyasının lideri Ümid Özdağ prezident seçkilərinin ikinci turunda “Millət İttifaqı”nın namizədi Kamal Kılıçdaroğlunu dəstəkləyəcəyini açıqladı.

Oğanın səsləri Ərdoğanı qələbəyə bir az daha yaxınlaşdırsa da Özdağın Kılıçdaroğlunu dəstəkləməsi çətin ki, ikinci turda nəyisə dəyişsin. 

Məsələ ondadır ki, “Millət İttifaqı” və Kılıçdaroğlu ilk turda gücünü böyük ölçüdə tükədib. Hətta “Millət İttifaqı”nı təşkil edən 6 müxalif partiya Kılıçdaroğlunun nəticəsindən razı olmadığını açıq şəkildə bildirir. Kılıçdaroğlunun ikinci turda qələbə qazanacağını düşünmürəm. Partiyaların nəticədən narazı qalması “Millət İttifaqı”nın siyasi xəzan dövrünə qədəm qoyması ilə nəticələnə bilər. Ərdoğanın seçkinin II turunda qələbə qazanacağı daha realdır”. 

Müxalifətin kütləni meydanlara çağıracağı ehtimalına gəlincə isə politoloq deyib ki, bu mümkündür, lakin effektiv olmayacaq: 

“Ən yaxşı halda Kılıçdaroğlunun çağırışına yalnız CHP-lər cavab verəcək. Məsələ ondadır ki, Kılıçdaroğlu “Millət İttifaqı”nı təşkil edən 6 müxalif partiyanın seçkidəki vahid namizədi olsa da seçki bitəndən sonra bu birlik davam etməyəcək. 

Çünki həmin müxalif partiyalar parlament seçkilərində istədiyi nəticəni əldə edib. CHP çox böyük güzəştlər edib. Bundan başqa seçkiyə bir ay qalanadək heç müxalif partiyalar vahid namizəd kimi Kılıçdaroğlunu deyil, Mansur Yavaş və Əkrəm İmamoğlunu görmək istəyirdilər. Bu baxımdan mən böyük mitinqlərin olacağını düşünmürəm”.

Ayxan