GünazTV: İranda qətldə və qəsdən adamöldürmədə günahlandırılaraq ölümə məhkum edilmiş daha 3 nəfər edam edilib.
İranlı hüquq-müdafiəçilərinin yaydığı xəbərə əsasən, beş il əvvəl naməlum səbəbə görə qətl törədən və həmin vaxtdan həbsdə saxlanılan Divandərə şəhər sakini, məhkum Faiq Şərifi aprelin 28-i sübh saatlarında Kürdüstan əyalətinin Sənəndəc şəhərinin zindanında dara çəkilib.
Həmin gün qətl ittihamı ilə daha 2 məhkum Qərbi Azərbaycan əyalətinin Urmiya şəhərinin zindanında dar ağacından asılıb. Üşnəviyyə şəhər sakini olan 53 yaşlı məhkum Zerar Peyğami qətldə, Bukan şəhər sakini olan digər məhkum Yasər Rəsuli isə qəsdən adamöldürmədə təqsirli bilinərək edam edilib.
Edam edilən hər üç şəxsin məhkəmə prosesləri barədə hər hansı bir məlumat yayılmayıb.
Qeyd edək ki, İran İslam Respublikası, əhalisinin sayına nisbətən ölkədə həyata keçirdiyi edamların sayına görə dünyada 1-ci yeri tutur.
A.M
