GünAz TV: Noyabrın 8-də Şərqi Azərbaycanda baş verən zəlzələ bölgəsində təbii fəlakətdən zərərçəkənlər olduqca ağır vəziyyətdə yaşayır.
Hadisədən sonra soyuq hava şəraitinin hökm sürdüyü təbii fəlakət bölgəsində qar yağdıqdan sonra vəziyyət daha da ağırlaşıb.
Şərqi Azərbaycanın Miyana, Sarab və Türkmənçay məntəqələrində yerləşən kəndlərdə təxminən bütün evlər dağılıb. Bölgə əhalisi hazırda çadırlarda gecələyir. Yetəri qədər qızınmaq vasitələri olmadığından çadırlarda çox sayda insan, o cümlədən uşaqların xəstələndiyi bildirilir.
Noyabrın 18-də Sarab və Miyana məntəqəsinə güclü qar yağmağa başlayıb, bəzi kəndlərdə hələ də qar yağıntısı davam edir.
Zəlzələdən zərərçəkənlərin əksəriyyəti kənd əhalisi olduğundan onların əsas işi heyvandarlıqdan ibarət olub. Çox sayda ailənin dolanışığını təmin edən mal-qara soyuq hava şəraitindən tələf olur, onları soyuqdan qorumaq üçün heç bir şərait yoxdur.
Xatırladaq ki, noyabrın 8-də Şərqi Azərbaycan Əyalətinin Miyana məntəqəsinin Tərk şəhəri ətrafında yerli vaxtla saat 02:17-də təxminən 6 bal gücündə zəlzələ baş verib. Hadisə nəticəsində Miyana və Sarab məntəqələrində yerləşən kəndlərdə minlərlə ev dağılıb, çox sayda insan ölüb və ya müxtəlif dərəcəli xəsarət alıb. Deyilənlərə görə, hökumət təbii fəlakətdə ölənlərin sayını gizlədir. Hazırda zəlzələ bölgəsində ağır vəziyyət hökm sürür, soyuq hava şəraiti vəziyyəti daha da ağırlaşdırıb. Bölgədə ərzaq məhsulları, qızınmaq vasitələri, tibbi ləvazimat və digər yardımlara ehtiyac olduğu bildirilir.
Zəlzələ bölgəsindəki son vəziyyəti əks etdirən video:
https://www.youtube.com/watch?time_continue=26&v=33sM-1thlqw&feature=emb_logo
N.S
