New York Times: İran İsrailin mümkün hücumuna cavab vermək üçün hərbi plan hazırlayır

SON XƏBƏRLƏR

New York Times: İran İsrailin mümkün hücumuna cavab vermək üçün hərbi plan hazırlayır

2024.10.25, 11:13

“New York Times” qəzeti yazır ki, İsrailin İrana qarşı gözlənilən cavab hücumuna görə İslam Respublikasının silahlı qüvvələri bu mümkün hücuma cavab vermək üçün bir sıra hərbi planlar hazırlayır.

Gunaz.tv

“The New York Times” anonim dörd İran rəsmisinə, o cümlədən, İnqilab Keşikçiləri Korpusunun iki üzvünə istinadən yazıb ki, İranın cavabının intensivliyi İsrailin hansı növ hücumu həyata keçirəcəyindən asılıdır.

Bu hesabata görə, İsrail İranın neft və nüvə obyektlərini hədəfə almaq kimi böyük bir hücum təşkil edərsə, İslam Respublikası sərt reaksiya verəcək.

Bu qəzetin yazdığına görə, belə bir ssenari reallaşarsa, İran İsrailə min ballistik raket atmağı, bölgədə İrana bağlı proksi qruplarının hücumlarını gücləndirməyi, Hörmüz boğazı və Ərəb körfəzində gəmilərin hərəkətini dayandırmağı düşünəcək.

“The New York Times” yazıb ki, İsrail bir neçə anbara və məhdud hərbi bazaya hücum etsə, İranın bu hücumlara cavab belə verməməsi mümkündür, çünki bu ölkə müharibə istəmir.

ABŞ-ın dövlət katibi Entoni Blinken İranın İsrailə qarşı hər hansı növbəti hücumun onun maraqlarını əsaslı şəkildə təhlükə altına alacağına dair aydın mesaj almasına ümid etdiyini deyib.

CNN-in məsələ ilə bağlı məlumatlı mənbəyə istinadən verdiyi məlumata görə, İsrail rəsmiləri, o cümlədən baş nazir Benyamin Netanyahu ABŞ-ı əmin ediblər ki, İrana cavab hücumu yalnız hərbi hədəflərlə məhdudlaşacaq və neft və nüvə obyektlərini əhatə etməyəcək.

GUNAZ.TV

SON XƏBƏRLƏR