Tramp niyə bu dəfə İranın raket proqramına diqqət yetirib?- Təhlil

SON XƏBƏRLƏR

Tramp niyə bu dəfə İranın raket proqramına diqqət yetirib?- Təhlil

2026.02.25, 16:06

Donald Tramp Konqresdəki son çıxışında bir daha İranı ritorik hücumlarının mərkəzinə qoyaraq Tehranın raket təhdidindən danışıb.

Gunaz.tv

O, iki tərəfin Cenevrədə ikitərəfli danışıqların həssas bir hissəsi çərçivəsində görüşmək üzrə olduğu bir vaxta Tehranın tezliklə ABŞ-a çata biləcək raketlər hazırladığını iddia edib.

Tramp bu dəfə əvvəlkilərdən fərqli olaraq uranın zənginləşdirilməsinə diqqət yetirmək əvəzinə, İranın raket proqramına daha çox diqqət ayırıb. Tehran hökumətinin artıq Avropanı və ABŞ-ın xaricdəki bazalarını təhdid edən raketlərə sahib olduğunu söyləyib.

ABŞ Prezidenti İranın ABŞ-a çatacaq sistemlər üzərində işlədiyini söyləyib. O, həmçinin iddia edib ki, ötən il ABŞ-ın nüvə obyektlərinə hücumlarına baxmayaraq, İran yenidən mənfur nüvə ambisiyalarını davam etdirir.

Ancaq Trampın bu iddiaları coğrafi məlumatlar və rəsmi hesabatlarla uyğun gəlmir. İrandan ABŞ-ın qərb sahillərinə qədər olan məsafə 10 min kilometrdən çoxdur. ABŞ Konqres Tədqiqat Xidmətinin dərc etdiyi hesabatlara görə, İranın raket arsenalı əsasən maksimum mənzili təxminən iki min kilometr olan qısa və orta mənzilli raketlərdən ibarətdir.

İranın özünün də təbliğatı və şişirtmələrinin əksinə olaraq, indiyə qədər ABŞ ərazisini təhdid edəcək qədər mənzilli qitələrarası raketlərə sahib olduğuna dair heç bir etibarlı dəlil yoxdur.

ABŞ Prezidentinin bu çıxışı dəqiq hərbi məlumatlardan daha çox daxili mülahizələrə əsaslanır. Ola bilsin Amerika ictimaiyyətini İrana qarşı hərbi əməliyyatların zəruriliyinə inandırmaqda çətinlik çəkən Tramp, təhdidi birbaşa ABŞ-a yönəlmiş kimi qələmə verməklə İrana hücumu əsaslandırmağa çalışır.

Məlumdur ki, İranın mövcud raket imkanları ABŞ-ın materik hissəsinə və ya Avropaya deyil, əsasən İsrailə yönəlib.

Bununla yanaşı onun nüvə məsələsinə az diqqət yetirməsi həm də İranın nüvənin zənginləşdirilməsi ilə bağlı ABŞ-ın şərtllərini qəbul etməsindən qaynaqlana bilər.

Ehtimal olunur ki, birinci məsələdən arxayın olan Tramp, bu dəfə başqa şərt, yəni raket proqramının məhdudlaşdırılmasını önə çəkə, İranın bununla da razılaşacağı təqdirdə proksi qüvvələrinə yardımın dayadırılmasını, Çinlə ticarət əlaqələrinin məhdudlaşdırılmasını və ən sonda İsrailin tanınması şərtlərini irəli sürə bilər.

Bunların hər birinin qəbul edilməsi isə ağır məğlubiyyət olduğundan Tehranın bütün bu şərtlərlə razışalacağı gözlənilmir. Bu isə Donald Trampın hücum əmri verməsi üçün əsaslı bəhanə ola bilər.

Cenevrə danışıqlarının inamsızlıq və qarşılıqlı təzyiq atmosferində keçdiyini, Vaşinqtonun diplomatiyaya təkid etməsinə baxmayaraq, bölgədə hərbi mövcudluğunu artırması və sərt tonla danışmasını da nəzərə alsaq, danışıqların uğursuz olacağı təqdirdə bu atmosfer asanlıqla qarşıdurmanın şiddətlənməsi ilə nəticələnəcək.

GünazTV

GUNAZ.TV

SON XƏBƏRLƏR