Tehran və Vaşinqtonu danışıqlar masasına qaytarmaq cəhdləri davam edir

SON XƏBƏRLƏR

Tehran və Vaşinqtonu danışıqlar masasına qaytarmaq cəhdləri davam edir

2026.04.04, 21:10

Gunaz.tv

ABŞ ilə İran arasında müharibə həssas mərhələyə daxil olduğu bir vaxtda, regional vasitəçilər iki tərəfi yenidən danışıqlar masasına qaytarmaq üçün səylərini gücləndiriblər.

Gunaz TV-nin məlumatına görə, diplomatik mənbələr və mötəbər media qurumları bildirir ki, Pakistan, Türkiyə və Misir ABŞ ilə İran arasında atəşkəs planını irəli aparmaq üçün fəaliyyətlərini davam etdirir, baxmayaraq ki, son danışıqlar raundu dalana dirənib.

Wall Street Journal-ın 3 Aprel tarixində yaydığı məlumata əsasən, İran vasitəçilərə rəsmi şəkildə bildirib ki, yaxın günlərdə İslamabadda ABŞ rəsmiləri ilə görüşə hazır deyil və Vaşinqtonun 15 maddəlik tələblərini «qəbuledilməz» hesab edir.

Buna baxmayaraq, səylər dayandırılmayıb. Türkiyə və Misir danışıqların davamı üçün yeni variantları, o cümlədən görüşlərin Dohaya və ya İstanbula köçürülməsini nəzərdən keçirir və dalanı aradan qaldırmaq üçün yeni təkliflər təqdim edir.

Bu prosesdə Pakistan əsas rol oynayır və Tehran ilə Vaşinqton arasında mesajların ötürülməsi üçün əsas kanal kimi çıxış edir. Pakistanın xarici işlər naziri də təsdiqləyib ki, bu ölkə Türkiyə və Misirlə birlikdə danışıqların irəliləməsi üçün pərdəarxası fəaliyyət göstərir.

ABŞ-ın təklif etdiyi planda atəşkəs, Hörmüz boğazının tam açılması, nüvə məhdudiyyətləri və İranla bağlı qüvvələrin bəzi bölgələrdən çıxarılması kimi məsələlər yer alır. Buna qarşılıq İran kompensasiya ödənilməsi, ABŞ qüvvələrinin regiondan tam çıxarılması və yenidən hücum edilməyəcəyinə zəmanət verilməsi kimi şərtlər irəli sürüb və hətta 48 saatlıq atəşkəs təklifini də rədd edib.

Bu fikir ayrılıqlarına baxmayaraq, diplomatlar danışıqlar yolunun hələ də açıq olduğunu və mövqelərin yaxınlaşdırılması istiqamətində işlərin davam etdiyini bildirir. Bəzi mənbələr yaxın günlərdə dolayı görüşlərin keçirilə biləcəyini də istisna etmir.

Eyni zamanda hərbi təzyiqlər davam edir. Donald Tramp xəbərdarlıq edib ki, danışıqlarda irəliləyiş olmasa, enerji infrastrukturlarına hücumlar gücləndiriləcək. İran isə öz növbəsində şərtləri qəbul olunmayana qədər müharibəni davam etdirəcəyini bəyan edib.

Ekspertlər hesab edir ki, bu vasitəçilik səylərinin uğuru tərəflərin nə dərəcədə çevik davranacağından asılıdır.

GünAzTV
R.G

GUNAZ.TV

SON XƏBƏRLƏR