İsrail ordusu “Hizbullah”ın simvolik bazasını məhv etdi

SON XƏBƏRLƏR

İsrail ordusu “Hizbullah”ın simvolik bazasını məhv etdi

2026.04.13, 20:56

Gunaz.tv

Gunaz.tv-nin məlumatına görə; İsrail ordusu Livanın cənubundakı Bint Cbeyl stadionunu — “Hizbullah”ın öldürülmüş lideri Həsən Nəsrullahın çıxış etdiyi məkanı — tamamilə dağıtdığını və bölgəyə nəzarəti ələ keçirdiyini açıqlayıb.

İsrail ordusunun 98-ci diviziyasının komandiri general Qay Levi əsgərlərinə müraciətində 2000-ci ildə Nəsrullahın həmin məkandakı çıxışına istinad edərək bildirib: “Bir vaxtlar burada hörümçək torundan danışan biri var idi; bu gün nə o var, nə stadion, nə də o iddiaların bir dəyəri qalıb.”

O vurğulayıb ki, İsrail qüvvələri hazırda əraziyə tam nəzarət edir və “Hizbullah”ın terror infrastrukturlarını və silahlı üzvlərini məhv edir.

“Times of Israel” nəşrinin məlumatına görə, İsrail ordusu əməliyyatdan sonra stadionu tam nəzarətə götürüb; bu məkan əvvəllər “Hizbullah”ın təbliğat simvollarından biri hesab olunurdu.

İsrail ordusunun açıqlamasına əsasən, əməliyyat 98-ci diviziya, paraşütçü və komando briqadaları, eləcə də piyada briqadasının iştirakı ilə həyata keçirilib və ilkin mərhələdə şəhər tam mühasirəyə alınıb, “Hizbullah” üzvlərinin qaçışı və əlavə qüvvələrin daxil olması qarşısı alınıb.

Rəsmi bəyanatda qeyd olunub: “Son bir həftə ərzində qüvvələr mühasirəni tamamladı və hücum əməliyyatlarına başladı. Yaxın döyüşlər və hava zərbələri nəticəsində ‘Hizbullah’ terror təşkilatının 100-dən çox üzvü məhv edildi, onlarla infrastruktur dağıdıldı və yüzlərlə silah aşkarlandı.”

İsrail ordusunun qiymətləndirməsinə görə, əməliyyat başlamazdan əvvəl bölgədə ən azı 150 “Hizbullah” üzvü, o cümlədən elit “Rizvan” bölməsinin döyüşçüləri mövcud olub.

Bir hərbi mənbə bildirib ki, 98-ci diviziya şəhərə nəzarəti möhkəmləndirmək üçün bir neçə komando əməliyyatı həyata keçirib.

İsrail ordusu həmçinin vurğulayıb ki, əvvəllər Bint Cbeyl İsrailə qarşı hücumlar üçün istifadə olunan nöqtələrdən biri idi, lakin əməliyyat başladıqdan sonra bu ərazidən heç bir hücum qeydə alınmayıb.

Qeyd edək ki, Bint Cbeyl 2006-cı ildə baş verən 33 günlük müharibə zamanı da ağır döyüşlərin mərkəzində olub, lakin həmin dövrdə İsrail ordusu şəhəri tam nəzarətə ala bilməmişdi; hazırda isə bu strateji məntəqənin İranın dəstəklədiyi qüvvələrin nəzarətindən çıxarıldığı bildirilir.

GUNAZ.TV

SON XƏBƏRLƏR