Övladlarımız yenə ana dillərini evdə qoyub getdilər...!

SON XƏBƏRLƏR

Övladlarımız yenə ana dillərini evdə qoyub getdilər...!

2026.09.23, 14:40

1 Mehr gəldi. Yenə yeddi yaşlı övladlarımız savadlanmaq üçün sevgi və ana məhəbbətinin dili olan ana dillərini evdə qoymağa məcbur oldular!

Gunaz.tv

Dünyanın heç bir yerində insan inana bilməz ki, əhalisinin ən azı 40 faizini təşkil etdiyin bir ölkədə öz dilində hətta ibtidai təhsil səviyyəsində belə təhsil almaq hüququna malik olmayasan, halbuki həmin ölkədə əhalisinin onda bir faizindən də azını təşkil edən başqa bir etnik qrup ibtidai məktəbdən universitetin sonuna qədər öz ana dilində təhsil almaq hüququna malik olsun?!

Yaxud, məsələn, bir mədəniyyət akademiyasının rəhbəri İran İslam Respublikasının Konstitusiyasının 15-ci maddəsini tapdalayaraq Azərbaycan türkcəsinin hətta həftədə iki saat rəsmi dilin yanında tədris olunmasına qarşı çıxsın və desin ki, yaxşı olar, bu 40 faiz evlərində belə öz ana dillərində danışmasın, dövlət dilində danışsın. Amma eyni şəxs gəlib desin ki, sizin üçün «Türk Dili Akademiyası» yaratmaq istəyirik!

Peşəsi məddahlıq və mərsiyəxanlıq olan, siyasətdən isə başı çıxmayan bir şəxs də prezidentə siyasət öyrətməyə çalışsın, seçilmiş prezidentə ağzına gələn hər cür təhqiri yağdırsın və onu ölümlə hədələsin, amma küçədə rahat şəkildə dolaşsın və heç kim, o cümlədən məhkəmə hakimiyyəti, ona «gözünün üstündə qaşın var» belə deməsin!

Hətta Azərbaycanın ən böyük şəhəri olan Təbrizdə 5–6 yaşlı uşaqlar üçün guya şən əyləncə tamaşası təşkil etsinlər və bu tamaşada yalnız ana dili olan türkcə danışan həmin uşaqlara təlqin, məcburiyyət və təbliğ yolu ilə aşılansın ki, sizin ana diliniz fars dilidir!

Ölkənin məktəbləri bu gündən — 1 Mehr 1405-dən — fəaliyyətə başlayır. Lakin bizim yeddi yaşlı türk uşaqlarımız məktəbə daxil olduqda sevgi və ana məhəbbətinin dili olan ana dillərini evdə qoymağa, savadlanmaq üçün isə cansız kitabların arasından zor, məcburiyyət və alçaltma yolu ilə «ögey ana dilini» axtarmağa məcbur edilirlər!

İranın «möcüzələr ölkəsi» olduğunu deyəndə məhz bunlar nəzərdə tutulur. Bir neçə nümunəsini burada qeyd etdiyimiz bu hadisələrə gəlincə, on milyardlarla maliyyələşən «Dil və Fars Ədəbiyyatı Akademiyası» rəhbərinin sözləri ilə desək, ölkədə çoxlu «möcüzələr» baş verir və biz onların bir çoxundan xəbərsizik!

Həsən Raşidi — 1 Mehr, 1405 (23 sentyabr, 2026)

GUNAZ.TV

SON XƏBƏRLƏR