Contact Us

SON XƏBƏRLƏR

Heydər Əliyev özü də gözəl bilirdi ki, bu dilin adı Azərbaycan türkcəsidir

2021.10.20, 07:36
Heydər Əliyev özü də gözəl bilirdi ki, bu dilin adı Azərbaycan türkcəsidir

Gunaz.tv
“Heydər Əliyev özü də gözəl bilirdi ki, bu dilin adı Azərbaycan türkcəsidir” 1234118734_zelimxan.81.jpg Zəlimxan Yaqub: “Əminəm ki, o sağ olsaydı, Türkiyə türkcəsindən Azərbaycan türkcəsinə tərcümə edilməsinə razı olmazdı» Milli Teleradio Şurasının Azərbaycan televiziyalarında xarici film və serialların dublyajsız yayımını qadağan edən qərarının Türkiyə filmlərinə də şamil olunması ətrafında müzakirələr davam edir. Milli Teleradio Şurası konstitusiyaya, bəzi deputatlar və tanınmış şəxslər isə «bir millət-iki dövlət» şüarına əsaslanır. Məsələ burasındadır ki, konstitusiyaya görə, Azərbaycanın dövlət dili Azərbaycan dilidir. Bu halda türk dilinin xarici dil sayılması tam qanunidir. O biri yandan da Türkiyə türkcəsi ilə Azərbaycan türkcəsi arasında doğmalıq və bizim dilin hazırkı vəziyyətdə qeyri-rəsmi statusda qalan bir adının türk dili olduğu bəllidir. Milli Teleradio Şurasının yaratdığı ziddiyətin kökükndə əslində Azərbaycanın dövlət dilinin Azərbaycan dili adlandırılması qərarı durmurmu? Dövlət dilimizin adının yenidən türk dili adlandırılmasına ehtiyac varmı? Xalq şairi Zəlimxan Yaqub deyir ki, ortada heç bir ziddiyət yoxdur: «Konstitusiya bizim əsas kitabımızdır. Ona hörmət etmək hamımızın müqəddəs borcudur. Düzdür, konstitusiyada yazılıb ki, dilimizin adı Azərbaycan dilidir. Amma həmin konstitusiyanın memarı olan Heydər Əliyev onu da deyib ki, biz bir millət, iki dövlətik. Mənim qanuna hörmətim qalır, amma həm də Heydər Əliyevin sözünü əsas götürərək bu adamlardan soruşuram ki, bir millətin necə iki dili ola bilər?» Z.Yaqub 1995-ci ildə konstitusiya qəbul olunanda dilimizin adı ilə bağlı müzakirələr zamanı dövlət dilinin əsas qanunda türk dili kimi adlandırılmasına tərəfdar çıxdığını vurğulayıb. Bəs şair indi necə düşünür? Z.Yaqubun cavabı belə olub: «Heydər Əliyev deyəndə ki, dilimizin adı Azərbaycan dilidir, başqa şərait vardı. O bilirdi ki, dilimizin adı türk dili kimi yazılsa, ölkədə hərc-mərclik yaranar. Amma dövr inkişaf edir, bütün millətlər öz yaddaşına sədaqətini dərk edir. Mən inanıram ki, Heydər Əliyev bu gün yaşasaydı, yenə deyərdi ki, dilimizin adı Azərbaycan dilidir. Amma Heydər Əliyev özü də gözəl bilirdi ki, bu dilin adı Azərbaycan türkcəsidir». Xalq şairi yenə də o fikrində qalır ki, Milli Teleradio Şurasının qərarı dəyişməlidir: «Biz 10 dəfə qurultay keçirmişik ki, ortaq dil yaradaq. Bu halda necə yaradacağıq ortaq dili? Mən əminəm ki, Heydər Əliyev sağ olsaydı, Türkiyə türkcəsindən Azərbaycan türkcəsinə tərcümə edilməsinə razı olmazdı»

SEÇİLMİŞ XƏBƏRLƏR

Çox oxunanlar