Ermənilər ikinci Qarabağ yaradır Gürcüstanda iki erməninin həbsi gözlənildiyi kimi erməni təbliğat maşının işinə təkan verdi. Artıq Ermənistanda Gürcüstan əleyhinə bəyanatlar səslənir. Ermənilərin Gürcüstana qarşı ərazi iddiaları, ikinci Qarabağ yaratmaq arzuları yenə gündəmin əsas mövzularındandır. Qanunsuz hərbi qruplaşma yaratmaqda və casusluqda ittiham olunan Qriqol Minasyan və Sarkis Akopcanyanın həbsi əslində ermənilərin çoxdan ürəklərində qalan ərazi iddialarını yenidən gündəmə gətirməsi üçün bir vasitə oldu. Bu, Ermənistanda səslənən bəyanatlarda da özünü biruzə verir. Gürcüstanda güclü antirus və antierməni təbliğatı getdiyini iddia edən politoloq Levon Melik-Şahnazaryan deyir ki, Rusiyaya xüsusi simpatiya ilə yanaşan erməni əhalisi mənəvi cəhətdən əziyyət çəkir. Üstəlik Tbilisinin ABŞ, Azərbaycan və Türkiyəylə dostluq münasibətləri onların əhvalını daha da pozur. Digər erməni analitik Eduard Abramyan isə hesab edir ki, Gürcüstan rəhbərliyi erməni məsələsini birdəfəlik, - aqresiv yolla həll etməyə qərar verib və bu cür həbslər Abramyana görə, əzəli erməni regionu olan Samsxe Cavaxetiyanın əsl sahiblərindən tamamilə təmizlənənədək davam edəcək. Ermənilərin öz dırnaqarası torpaqlarında hər şeyə göz yummaları isə 1915-ci il hadisələrinin təkrarlanması ilə nəticəlnəcək. Bu bəyanat məsələnin əsl mahiyyətini üzə çıxarır. Ermənilər hər vəchlə Gürcüstana qarşı ərazi iddiaları və ikinci Qarabağ yaratmaq arzularını reallaşdırmaq istəyir. Əslində bunun kökü 1918-ci ildə baş vermiş və indi az – az xatırlanan erməni gürcü toqquşmalarına gedib çıxır. Tarixdən o da bəllidir ki, erməni əhalisinin Qarabağda olduğu kimi Cavaxetiyada da yerləşdirilməsi 19-cu əsrin birinci yarısında Rusiya-İran və Rusiya-Türkiyə müharibələrindən sonra başlayıb. Vaxtilə Osmanlının tərkibində olmuş Cavaxetiyada Ahıska türkləri çoxluq təşkil edirdi və ermənilərin köçürülməsi onların sıxışdırılması ilə müşaiyət olunurdu. İkinci dünya mühzaribəsi dövründə ahıskalıların stalin tərəfindən sürgün edilməsi Cavaxetiya ermənilərini bölgədə hökmran etdi. 1948-ci ildə azərbaycanlıların Ermənistandan deportasiyasına dair Moskvanın razılığını alan Mikoyanın köməyilə Cavaxetiyada da muxtariyyat statusu əldə etmək niyyətində idilər. Lakin Stalin ermənilərin bu təşəbbüsünün də qarşısını almışdı. Ötən əsrin 80-ci illərinin sonunda bu dəfə Qarbaçovun razılığı ilə dağlıq Qarabağda uğur qazanan ermənilər Cavaxetiyada da ayağa qalxmağa hazır idilər. Lakin millətçi Qamsaxurdiya hakimiyyəti bu cəhdin qarşısını aldı. Bununla belə ermənilər Gürcüstanı parçalamaq niyyətindən əl çəkmirlər. İndi Cavaxetiyada cərəyan edənlər 20 il əvvəl Dağlıq Qarabağda baş verənlərin təkrarıdır. Hələ 2000-ci ildə prezident Şevarnadzeyə müraciət göndərən Cavaxetiya erməniləri bölgənin iqtisadi və coğrafi baxımdan daha çox Ermənistana bağlı olduğunu iddia edirdilər. Yada salaq ki, ermənilər Qarabağın Ermənistana birləşdirilməsini əsaslandırmaq üçün də məhz bu məqamı önə çəkirdilər. Fərq bircə ondadır ki, ermənilər qarabağı Azərbaycandan birdəfəlik qoparmağı, Cavaxetiyaya isə hələlik muxtariyyat statusunun verilməsini tələb edirlər.