BBQ təmsilçisi: “Ermənilər işğal etdikləri yeddi rayonu boşaltmalıdırlar”

SON XƏBƏRLƏR

BBQ təmsilçisi: “Ermənilər işğal etdikləri yeddi rayonu boşaltmalıdırlar”

2021.10.20, 07:36

Gunaz.tv

BBQ təmsilçisi: “Ermənilər işğal etdikləri yeddi rayonu boşaltmalıdırlar”

“Əgər Ərdoğanın hərəkətində siyasi məqsəd olubsa, o da Türkiyədə milli lider mövqeyini gücləndirməkdən qaynaqlanıb”. Bu eksklüziv açıqlamanı APA-nın ABŞ bürosuna Beynəlxalq Böhran Qrupunun Türkiyə layihəsinin direktoru Hüq Pop verib. O, Türkiyə baş nazirinin Davosda keçirilən Ümumdünya İqtisadi Forumunda İsrail prezidenti Şimon Peresin ünvanına sərt ittihamlar səsləndirməsini bələdiyyə seçkilərində partiyasının mövqeyini gücləndirmək istəyi ilə izah edib: “Qarşıdan bələdiyyə seçkiləri gəlir və Ərdoğan öz mövqeyini möhkəmləndirməli idi. Baş nazirin Davos Forumunda söylədiyi sözləri yanvarın 19-da Brüsseldə etdiyi çıxışdan o qədər də fərqlənmirdi. Cənab Ərdoğan öz siyasi mövqeyini elan edib və bu, onun seçimidir. Hesab etmirəm ki, Davosdakı çıxış Ərdoğanın İslam dünyasında lider olmaq niyyəti ilə bağlıdır. Nəzərə alın ki, ərəb dünyasının liderləri Ərdoğanın çıxışını alqışlamırlar. Ona görə də belə çıxışlar ikibaşlı effekt verə bilər. Baş nazirin çıxışını təhlil edərkən ilk növbədə cənab Ərdoğanın bəyanatının Türkiyə üçün nəzərdə tutulduğu nəzərə alıb, daha sonra isə bütün digər faktorlar barədə fikirləşməyi məsləhət bilərdim. Türkiyənin baş naziri istəyir ki, onu sadəcə dar ərəb və ya islam dünyasının lideri kimi yox, ümumiyyətlə dünya lideri kimi görsünlər”. Hüq Pop Türkiyə-Ermənistan münasibətlərində yaxınlaşmanın Azərbaycanda doğura biləcəyi reaksiyanı belə şərh edib: “Azərbaycanla Türkiyə bir-birinə lazımdırlar. Amma azərbaycanlıların bir çoxu Türkiyənin ermənilərlə danışığa başlamaq faktından artıq məyus olublar. Əlbəttə ki, Azərbaycanda emosional reaksiya olacaq. Bu danışıqların necə sona çatacağını bilmirəm, lakin Türkiyə son nəticədə öz maraqlarına uyğun qərar qəbul edəcək. Bildiyimə görə, Ankarada çoxlu sayda insan Azərbaycanı yaxın dost hesab edir və Azərbaycanın marağını son məqama kimi hər şeydən üstün tutacaqlar. Lakin sonda sərhədləri açmaq Türkiyənin maraqlarına cavab versə, türklər bu addımı atacaqlar”. Hüq Pop bildirib ki, nəticə etibarı ilə Türkiyə ilə Ermənistanın yaxınlaşması Azərbaycana kömək edə bilər: “Yəni bu yaxınlaşma ümumi atmosferi sakitləşdirə bilər, əməkdaşlığın münaqişədən daha yaxşı olmasını göstərə bilər. Demirəm ki, 100 faiz belə olacaq. Amma gəlin, bu mövzu barədə çox dar çərçivədə fikirləşməyək”. Hüq Pop Ermənistan Dağlıq Qarabağ ətrafında yerləşən yeddi rayondan çıxacağı təqdirdə Türkiyənin sərhədləri aça biləcəyi ilə bağlı fikirlərə də aydınlıq gətirib: “Bu iki məsələ arasında bağlılıq olub-olmadığını heç kəs bilmir. Hətta bağlılıq olsa belə, bunun adi anlaşma olacağı, yaxud rəsmi sənədlərdə öz əksini tapacağı da bilinmir. Lakin münaqişəyə son qoymaq üçün Ermənistan Dağlıq Qarabağ ətrafında yerləşən rayonlardan çıxmalıdır. Bu, aydın məsələdir. Lakin bu prosesin nə vaxt və hansı formada aparılması müəyyən olunmalıdır. Ehtimal edirəm ki, diplomatlar məhz bu səbəbdən məxfi danışıq aparırlar. Hər bir adam anlayır ki, münaqişə həll olunmalıdır. Bu bir növ çox əziz bəstələdiyimiz körpə deyil ki, onu daim öz yanımızda saxlayaq. Münaqişə çürüyən yara kimi qalmamalıdır”. Qeyd edək ki, Hüq Pop 20 ildən artıqdır, Yaxın Şərq bölgəsi üzrə araşdırmalar aparır. Uzun illər “The Wall Street Journal”, “The Independent” nəşrlərinin “Reuters” agentliyinin Yaxın Şərq və Türkiyə üzrə müxbiri olub. 2005-ci ildə çap etdiyi “Qaliblərin oğulları: Türk Dünyasının Oyanışı” (“Sons of the Conquerors: the Rise of the Turkic World”) kitabında həmçinin Azərbaycan ərazisindən keçərək Ağdam və Fizuli rayonlarına etdiyi səfər barədə də yazıb. Türk, fars, ərəb və fransız dillərində danışır.