Rusiyanın Milli Məclis Ermənistana silah ötürməsini araşdıracaq "Azərbaycanda xarici hərbi bazanın yaradılmasına icazə verilməlidir" Dünən Milli Məclisin yaz sessiyasının ilk iclası keçirildi. Spiker Oqtay Əsədov Rusiyanın Ermənistana 800 milyon dollar dəyərində silah və sursat ötürməsilə bağlı məsələnin müzakirəsi məqsədilə deputatların çoxsaylı müraciətlərinin daxil olduğunu nəzərə çatdırdı. Onun sözlərinə görə, bu məsələ ilə bağlı Xarici İşlər Nazirliyi münasibətini bildirib, Rusiya və Azərbaycan müdafiə nazirlərinin görüşü olub: "Mən də hesab edirəm ki, Milli Məclis bu məsələni diqqət mərkəzində saxlamalıdır. Azərbaycan və Rusiya parlamentlərində dostluq qrupları fəaliyyət göstərir. Təklif edirəm ki, öncə Azərbaycan-Rusiya dostluq qrupları arasında görüş, müzakirə olsun. Tələskənlik olmasın, sonra məsələni Milli Məclisdə müzakirə edərik". Ramiz Mikayıloğlu "Belədirsə, Sabirabadda narkomafiyanın başında ya icra başçısı, ya da mən dayanıram" Cari məsələlər üçün ayrılmış vaxtda çıxış edən millət vəkili İqbal Ağazadə "Siyasi partiyalar haqqında" yeni qanun layihəsinin müzakirəyə çıxarılıb qəbul edilməsini, parlamentdə Qarabağ dinləmələrinin keçirilməsini istəyir. BQP sədri Fazil Qəzənfəroğlu da "Siyasi partiyalar haqqında" yeni qanunun qəbulunun gecikməsindən narahatdır. Düşünür ki, bu qanun partiyaları siyasətdən kənarda saxlamaq niyyəti olduğu üçün müzakirəyə çıxarılmır. Fazil Qəzənfəroğlu iqtisadi böhran və Azərbaycanın atmasını planlaşdırdığı addımlarla bağlı Milli Məclisin qapalı toplantısının keçirilməsini də zəruri sayır. O da Qarabağ dinləmələrinin keçirilməsinə tərəfdardır: "Elə silah məsələsi də Qarabağla bağlıdır. Bu danışıqlardan millət vəkillərinin xəbəri yoxdur". BQP sədri referendum əleyhinə imza vərəqələri toplayanların həbsini də yolverilməz hesab edir. Müsavat deptat qrupunun üzvü İltizam Əkbərli yerlərdə icra orqanlarının referendum əleyhinə imza toplayanlara mane olduqlarını dilə gətirdi: "Seçki komissiyaları iqtidarın nəzarətindən çıxarılmalıdır". Millət vəkili Pənah Hüseyn Türkiyənin baş naziri Rəcəb Tayyib Ərdoğanın Davos forumunda "Türkiyə Qarabağ məsələsində Azərbaycanın yanındadır" sözlərini dilə gətirməsini və Ərdoğanın İsrail prezidentilə debatında baş verənləri xatırlatdı: "Mənim seçicilərim debatda baş verənlərlə bağlı Azərbaycanın Türkiyənin yanında olması məqsədilə parlamentin fikir səsləndirməsini istəyirlər". Referendum əleyhinə imza toplayanların narkoman adıyla həbsə atıldığını iddia edən Pənah Hüseyn dedi ki, son illər Sabirabadda narkomanların sayının artması ciddi araşdırılmalıdır: "Belədirsə, Sabirabadda narkomafiyanın başında ya icra başçısı, ya da mən dayanıram. Hüquq-mühafizə orqanları bu məsələni araşdırsınlar". Spiker gülərək "Pənah Hüseyn çox şübhəli danışdı",-dedi. Daha sonra BAXCP sədri, millət vəkili Qüdrət Həsənquliyev çıxış etdi.