Erməni-gürcü münasibətləri sərinləşir Samtse-Cavaxetiyadakı separatçılığı qızışdıranların İrəvan və Moskvada əyləşdiyi üzə çıxır Erməni-gürcü münasibətlərində gərginlik artır. Ermənistanın "Yerkir" ictimai təşkilatı Gürcüstan hüquq-mühafizə orqanlarının silahlı hərbi birləşmə yaratmaqda və separatçılıqda şübhəli bilərək saxladığı Erməni Gənclər Mərkəzinin rəhbəri Qriqoryan Manisyan və "Şarl Aznavur" xeyriyyə cəmiyyətinin sədri Sergey Akopcanyanla bağlı bəyanat yayıb. "Yerkir" gürcü polisinin bu hərəkətini provokasiya sayır. Bəyanatda yazılır ki, gürcü hakimiyyəti şüurlu surətdə Samtse-Cavaxetiyada, gürcü-erməni münasibətlərini gərginləşdirir. "Yerkir" hesab edir ki, məqsəd beynəlxalq ictimaiyyətin diqqətini keçən il iyulun 21-də həbs olunmuş "Vahid Cavax" təşkilatının lideri Vahan Çaxalyanın məhkəmə prosesindən tədricən yayındırmağa nail olmaqdır. Ramiz Mikayıloğlu "Vahan Çaxalyan və tərəfdarları Cavaxetiya ermənilərini narahat edən problemləri qaldırıb və onların həllini tələb ediblər. Gürcüstan hakimiyyəti isə yeni qanunsuzluqlara yol verirlər". Bəyanatda iddia olunur ki, gürcü hakimiyyəti erməni separatizmi kartını ortaya ataraq insan hüquqlarının qorunması və milli azlıqlarla bağlı beynəlxalq təşkilatlar qarşısında götürülən öhdəlikləri bir kənara qoyurlar: "Gürcüstan hakimiyyəti separatizm kartıyla oynamaqla Samtse-Cavaxetiyada və Gürcüstanda yaşayan ermənilərin problemləriylə bağlı Ermənistanın yeni kompromislərə getməsinə çalışırlar. "Yerkir" beynəlxalq ictimaiyyəti böhranın aradan qaldırılması, Gürcüstandakı erməni azlığının sosial-iqtisadi, dil, təhsil və dini problemlərinin həll edilməsi üçün təcili addımlar atmağa çağırır. Beynəlxalq ictimaiyyət Gürcüstan hakimiyyətinə dəqiq mesaj göndərməlidir. Yalnız demokratik, etnik baxımdan zəngin Gürcüstanda gələcək qarşıdurmalardan qaçmaq və etnik azlıqların normal yaşayışını təmin etmək olar". Gürcüstanın daxili işlərinə qarışan tək Ermənistandakı ictimai təşkilatlar deyil. Yanvarın 22-də Qriqoryan Minasyan və Serjey Akopcanyanın həbsindən dərhal sonra hakim Respublika Partiyasının deputatı Şirak Torosyan məsələyə münasibət bildirmişdi. O, silahlı dəstə yaratmaqda və separatçılıqda günahlandırılan şəxslərin günahsız olduqlarını bəyanlamış, gürcü polisini təhqir edərək aşağılamışdı. Şirak Torosyana görə, Gürcüstanın mərkəzi televiziya kanallarının Samtse-Cavaxetiyada separatizmin baş qaldırmasıyla bağlı yayımları rəsmi Tiflisin siyasi vulqarlığının nəticəsidir. O hədələyərək demişdi ki, baş verənlərin daha ciddi nəticələri ola bilər və Samtse-Cavaxetiyada baş verənlər nəticədə Gürcüstan üçün bumeranqa çevrilər. Hakim partiyanın deputatından sonra "Yerkir"in də bəyanatının səslənməsi göstərir ki, əslində Gürcüstanın bu bölgəsindəki separatçılıq meyillərinin arxasında Ermənistan və onun havadarı Rusiya durur. Əks halda hakim partiyanın təmsilçisi başqa bir ölkənin daxili işlərinə qarışmağa cəsarət etməzdi. Yəqin ki, Samtse-Cavaxetiyadakı prosesləri Ermənistan və Rusiyanın məqsədyönlü şəkildə son dövrlər qızışdırmaqla bağlı planlarından məlumatlı olan rəsmi Tiflis addımlarını sərtləşdirməyə qərar verib. Çünki ermənilərlə yumşaq davranmağın acı nəticələri hər kəsə bəllidir... Ramiz Mikayıloğlu