Rusiyanın notası ikinci dəfə təqdim olunub "Şimal qonşumuz bu canfəşanlığıyla özünü bitərəf, Azərbaycana düşmən olmayan ölkə kimi göstərmək istəyir" Rusiya Xarici İşlər Nazirliyi Ermənistana ötürülən 800 milyon dollarlıq silah qalmaqalıyla bağlı Azərbaycanın notasına verdiyi cavabı ikinci dəfə təqdim edib. Xatırladaq ki, birinci dəfə rəsmi cavab yanvarın 21-də Azərbaycanın Rusiyadakı səfirliyinin müşaviri Baxış Zeynalova təqdim olunub. Yanvarın 22-də isə Rusiyanın ölkəmizdəki səfiri Vasili İstratov Azərbaycan Xarici İşlər Nazirliyinə gəlib. Xarici işlər naziri səfiri qəbul edib. Nazirliyin yaydığı pres-relizdə bildirilir ki, səfir Ermənistanın Gümrü şəhərində yerləşən 102 saylı Rusiya hərbi bazasından Ermənistana təxminən 800 milyon dollar həcmində hərbi silah və sursatın verilməsinə dair məlumatla əlaqədar yanvarın 15-də Azərbaycan Respublikasının Xarici İşlər Nazirliyinin verdiyi rəsmi notaya Rusiyanın cavab notasını təqdim edib. Ramiz Mikayıloğlu Hələ yanvarın 21-də mətni məlum olan cavab notasında yazılır ki, Rusiyanın Müdafiə Nazirliyi 2008-ci ildə Ermənistana Azərbaycanda geniş neqativ rezonans doğurmuş "sənəd"də göstərilən sayda və nomenklaturada silah və hərbi texnika verməyib və satmayıb. Rusiya iddia edir ki, çap olunmuş material dezinformasiyadır, açıq antirusiya xarakteri daşıyır və Rusiya-Azərbaycan dostluq münasibətlərinin pozitiv inkişafına xidmət etmir. Azərbaycan Müdafiə Nazirliyinin mətbuat xidmətinin rəhbəri, polkovnik-leytenant Eldar Sabiroğlu bildirib ki, nazirlik Rusiyanın Ermənistana 800 milyon dollar dəyərində silah-sursat ötürməsilə bağlı məlumatları araşdırmaqda davam edir. Rusiya Xarici İşlər Nazirliyinin cavab notasında silah ötürülməsi xəbərlərini dezinformasiya adlandırmasına gəlincə, Eldar Sabiroğlu deyib ki, Azərbaycanın Müdafiə Nazirliyi hələ ki, Xarici İşlər Nazirliyinin yanvarın 15-də yaydığı rəsmi bəyanatla kifayətlənir. Bəs birinci dəfə Rusiyadakı səfirliyimizin müşavirinə təqdim olunmuş notanın ikinci dəfə səfir Vasili İstratov Elmar Məmmədyarova çatdırması nə anlam verir? Məsələylə bağlı fikirlərini öyrəndiyimiz Azərbaycanın Rusiyadakı sabiq səfiri Hikmət Hacızadəyə hesab edir ki, şimal qonşumuz bu canfəşanlığıyla özünü bitərəf, Azərbaycana düşmən olmayan ölkə kimi göstərmək istəyir. Çünki silah və sursat ötürməklə Moskva yenidən tərəf, Azərbaycana düşmən imicini qazanır. Onun sözlərinə görə, əslində Rusiyanın Ermənistana silah verməsi mütəmadi baş verir. Məsələn, prezident Boris Yeltsinin dövründə işğalçı ölkəyə 1 milyard dollar dəyərində silah və sursat əvəzsiz olaraq ötürülüb: "Ola bilər ki, Gürcüstan hadisələri, yaxud Azərbaycanın sərt bəyanatları bu silah və silah ötürülməsinin məhz həmin məqamda baş verməsini şərtləndirib. Digər tərəfdən, bu, "Nabucco" qaz layihəsinin aktuallaşmasıyla da bağlı ola bilər. Çünki Rusiya bu layihəni istəmir. Moskva çalışır ki, neft-qaz ölkəsi kimi özü üçün məqbul şərait yaratsın". Politoloqa görə, onu da istisna saymaq olmaz ki, bu silah və sursat üçüncü ölkələr-Rusiyanın müttəfiqləri olan İran, Suriya, yaxud hər hansı ərəb ölkəsi üçün nəzərdə tutulub: "Adətən, belə silah ötürmələriylə Moskva məsələni malalayır. Guya kiməsə verir, o da kiməsə ötürür. Bu ehtimal da var". Ermənistana 800 milyon dollar dəyərində silah və sursat ötürülməsinə münasibət bildirən Beynəlxalq Böhran Qrupunun Qafqaz üzrə proqram direktoru Lorens Şits düşünür ki, tələsik nəticə çıxarmamaq və informasiyanı yaxşı araşdırmaq lazımdır. Onun sözlərinə görə, əgər məlumat təsdiqlənsə, bu, Rusiyanın Ermənistanı silahlandırması sülh danışıqlarını pozan və Moskvanın münaqişədə vasitəçilik rolunu sual altında qoyan addım kimi dəyərləndirilə bilər. Həm də Ermənistana silah ötürülməsi bu ölkəylə Azərbaycan arasında silahlanma yarışının başlanmasına və sosial sahə üçün zəruri vəsaitlərin hərbi xərclərə yönəldilməsinə yol açar. Moskva bəyannaməsinə toxunan Lorens Şitsə görə, bu, Gürcüstanla avqust müharibəsindən sonra Rusiyanın Cənubi Qafqazda güclənmək, beynəlxalq aləmə özünü sülhpərvər statusda təqdim etmək cəhdi olub. Silah qalmaqalından sonra Azərbaycanda Rusiyanın Minsk qrupunun həmsədrliyindən uzaqlaşdırılmasının gərəkliyi yönündə fikirlər daha tez-tez səslənməyə başlayıb. Buna da münasibətini bildirən Beynəlxalq Böhran Qrupunun Qafqaz proqram direktoru vurğulayır ki, Minsk qrupundan uzaqlaşdırılmaq Rusiyanın maraqlarına cavab vermir: "Azərbaycan faktiki olaraq Rusiyanı danışıqlardan uzaqlaşdıra bilmir. Rusiya Qafqazda öz maraqları olan güclü region dövlətidir. O da doğrudur ki, Azərbaycan və Ermənistanın konfliktin davam etdirilməsində məsuliyyəti nəzərə alınmasa, Qarabağ probleminin açarı Kremldədir. Moskva həqiqətən tarixən və coğrafi baxımdan təsirində olmuş ölkələrin suverenliyini məhdudlaşdırmağa yönəlik xarici siyasət həyata keçirir. Həm də Rusiya beynəlxalq oyunçu statusuna yiyələnməyə can atır. Ən yaxşı variant ABŞ, Avropa Birliyi və Rusiyanı regionda adekvat siyasət yürütməyə çağırmaqdır. Cənubi Qafqazda stabillik Rusiyanın maraqlarına uyğundur. Stabil və sülhün olduğu Cənubi Qafqaz həm də Rusiyanın Şimali Qafqaz regionundakı situasiyaya təsir edə bilər".