Gürcüstandakı soydaşlarımız kənd adlarının bərpasını istəyirlər Qənirə Paşayeva: "Ümid edirəm ki, Gürcüstan rəsmiləri televiziya açılmasıyla bağlı soydaşlarımızın müraciətlərinə müsbət cavab verəcəklər Bir neçə gün əvvəl bir qrup millət vəkili və ziyalı Gürcüstanla azərbaycanlılar yaşayan bölgələrdə olub. Milli Məclisin Azərbaycan-Gürcüstan Parlamentlərarası Dostluq Qrupunun sədri Qənirə Paşayeva deyir ki, soydaşlarımız hər bir görüşdə Azərbaycan xalqına aid toponimlərin dəyişdirilməsi məsələsini qaldırdırır və məsələnin həlli istiqamətdə bizim dəstək verməyimizi istəyirlər. Onun sözlərinə görə, Gürcüstanda yaşayan azərbaycanlılar diaspora deyil, onlar həmin yerin aborigen əhalisidir. Min illərlədir o torpaqlarda yaşayırlar. Bu baxımdan, təbii ki, Gürcüstandakı Azərbaycan kəndlərinin tarixi adlarının dəyişdirilərək gürcüləşdirilməsi soydaşlarımızı çox ciddi şəkildə narahat edir: "Keçmiş hakimiyyətlər dövründə xeyli sayda Azərbaycan kəndlərinin adları dəyişdirilərək gürcüləşdirilib. Rəvan Məmmədli Soydaşlarımızın müraciətlərinə baxmayaraq, tarixi adların bərpası istiqamətində addımlar atılmayıb. Mixail Saakaşvilinin hakimiyyətə gəlməsindən sonra da soydaşlarımız dəfələrlə bu məsələ ilə bağlı müvafiq qurumlara müraciətlər edib, bu ədalətsizliyin aradan qaldırılmasını istəyiblər. Amma çox təəssüf ki, indiyədək bu məsələ öz həllini tapmayıb. Biz də görüşlərimiz zamanı həm parlamentdəki həmkarlarımıza, həm regionun rəhbərliyinə, həm də hökumət rəsmilərinə bu məsələni çatdırmışıq. Bildirmişik ki, bu kimi problemlərin öz həllini tapmaması insanlara çox pis təsir edir. Ümidvaram ki, gec-tez bu problemi aradan qaldırmaq mümkün olacaq". Onu da qeyd edək ki, bəzi məlumatlara görə, Gürcüstanın Samtsxe-Cavaxetiya bölgəsində erməni dilində telekanalların yayımlanmasına icazə verilib. Bu baxımdan, görəsən, Gürcüstanda Azərbaycan dilində yayımlanan televiziya kanalının yaradılması da mümkündürmü? Qənirə Paşayeva bunun çox vacib məsələ olduğunu bildirdi: "Cavaxetiya bölgəsində ermənilərin televiziya kanalları var. Özü də iki kanal fəaliyyət göstərir. Çox təəssüf ki, Gürcüstan azərbaycanlılarının kanal yaradılması ilə bağlı müraciətləri hələ də cavabsız qalır. Televiziya kanalının açılmasıyla bağlı problem sadəcə, rəsmi icazə ilə bağlıdır. Bu icazə olarsa, layihənin reallaşması üçün ciddi problem yoxdur. Hətta bu məsələyə maddi dəstək verəcəyini vəd edən insanlarımız da var. Ümid etmək istəyirəm ki, Gürcüstan rəsmiləri televiziya açılması ilə bağlı soydaşlarımızın müraciətlərinə yaxın zamanlarda müsbət cavab verəcəklər". Yeri gəlmişkən, Tbilisi şəhərində Azərbaycanın xalqının görkəmli xadimlərinin ev muzeyləri yerləşir, lakin onların vəziyyət o qədər də ürəkaçan deyil. Qənirə Paşayeva dedi ki, bu yaxınlarda Tiflisin mərkəzində yerləşən Mirzə Fətəli Axundov muzeyini Dövlət Neft Şirkətinin Gürcüstan nümayəndəliyi alıb və artıq o muzey Azərbaycanın mülkiyyətidir. Artıq ev muzeyində təmir işləri başlayıb: "Muzeyin çox yüksək səviyyədə fəaliyyət göstərən mədəniyyət mərkəzinə, insanlarımız üçün bir ocağa çevrilməsi çox vacibdir. İnanıram ki, bu, belə də olacaq. Cəlil Məmmədquluzadənin ev muzeyinin də yüksək səviyyədə bərpası çox vacibdir və yaxın vaxtlarda bu istiqamətdə də işlərə başlanacaq. Bu gün soydaşlarımızın yaşadığı bölgələrdən olan, indi isə Gürcüstandan kənarda yaşayan bəzi imkanlı insanlar var ki, öz kəndlərində, bölgələrində müəyyən işlərə dəstək verirlər. Amma bu dəstəyin artması üçün böyük potensial var. Mən hamını çağırıram ki, oradakı soydaşlarımızın problemlərinin həlli istiqamətində əllərindən gələn dəstəyi əsirgəməsinlər".