Ermənistan Gürcüstanı parçalamağa çalışır Gürcü polisi Cavahetiyada separatçılıqda və silahlı dəstə yaratmaqda təqsirləndirdiyi erməniləri həbs edib Ötən saylarımızda gürcülərlə ermənilər arasında kilsələrin kimə məxsus olması haqqında mübahisənin şiddətləndiyini xəbər vermişdik. Mübahisələr həm Tiflisin mərkəzində yerləşən erməni kilsəsinin ərazisi, həm də Samtse-Cavahetiyadakı kilsələrlə bağlıdır. Ermənilər rəsmi Tiflisi bu kilsələri özəlləşdirməkdə təqsirləndirir. Qarşılıqlı ittihamlar o qədər dərinləşib ki, məsələyə hər iki ölkə prezidentləri və baş nazirləri səviyyəsində münasibət bildirilib. Məsələn, Ermənistanın baş naziri Tiqran Sərkisyan Tiflisə son səfəri zamanı kilsələrlə bağlı məsələni növbəti dəfə xatırladıb. Gürcüstanın baş naziri bu məsələnin tezliklə həlini tapacağını bildirsə də vəziyyət dəyişməyib. Son məlumatlara görə, kilsə münaqişəsi yeni xarakter alır. Rəsmi İrəvan müxtəlif ekspertlərin, tarixçilərin dilindən həmin kilsələrə iddialar irəli sürməkdədir. Yazılarımızda da bildirmişdik ki, yaxın dövrlərdə Ermənistan və Gürcüstan arasında ziddiyyətlərin daha da kəskinləşməsinin şahidi olacağıq. Ziddiyyətlərin kökündə isə Ermənistanın Rusiyanın forpostu olması durur. Bayram Ötən ilin avqustunda Gürcüstanı növbəti dəfə işğala məruz qoyan Moskva Tiflisə təzyiq imkanlarını müəyyən qədər itirib. Buna görə də məhz Ermənistan və Gürcüstandakı etnik ermənilər vasitəsiylə nəzarəti əldə saxlamağa çalışır. Əslinə qalsa, faktiki olaraq blokadada olan Ermənistan rəhbərliyi Gürcüstanla münasibətləri pozmamaqda maraqlı olmalıdır. Amma həm Rusiyanın təzyiqi, həm də şantaj yolu ilə Gürcüstanı güzəştə məcbur etmək niyyəti rəsmi İrəvanı Cavahetiyada erməni separatizmini gücləndirməyə sövq edir. Yəqin ki, təsadüfi deyil ki, yanvarın 22-də Gürcüstan polisi silahlı hərbi birləşmə yaratmaqda, separatçılıqda şübhəli bilinən ermənilərin həbsinə başlayıb. Polis Axalkələkdə fəaliyyət göstərən Erməni Gənclər Mərkəzinin binasında axtarış aparıb. Axtarış zamanı mərkəzdəki bəzi kompüterlər müsadirə olunub. Günorta saatlarında isə Tiflisdən gəlmiş hüquq-mühafizə orqanlarının nümayəndələri Aspinza rayonunda marşrut avtobusu saxlayıb, Erməni Gənclər Mərkəzinin rəhbəri Qriqoryan Minasyanı düşürüb, qollarını bağlayıblar. Həbs olunanlar arasında "Şarl Aznavur" xeyriyyə cəmiyyətinin rəhbəri Sergey Akopcanyan da var. Həbs olunan şəxslərin iş yerlərində və evlərində axtarış aparıldıqdan sonra həmin şəxslər Tiflisə aparılıb. Həm Qriqoryan Minasyan, həm Sergey Akopcanyan Tiflisə aparılıb. Erməni mətbuatı isə gürcü polisinin guya erməni rəqs qrupunun məşqi zamanı əməliyyat keçirməsindən yazır. Erməni teleşirkəti "Erkir Media"nın verdiyi məlumata görə, polislər kompüterlərin yaddaş hissələrini söküblər, rəqs qrupu üzvlərinin mobil telefonlarını götürüblər. Xatırladaq ki, ötən ilin iyulun 18-də də Axalkələk polis idarəsinin rəisinin evinin parladılmasından sonra polis şübhəlilərin, daha dəqiq desək ermənilərdən ibarət silahlı dəstənin saxlanılması üçün bir neçə əməliyyat keçirib. İyulun 20-də "Vahid Cavax" təşkilatının üzvü Qurgen Şirinyanın evində axtarış aparılan zaman bir polis əməkdaşı öldürülüb. Bir neçə gün sonra Qurgen Şirinyanı həbs eləmək üçün şəhərdəki evlərin birində keçirilən əməliyyatda da bir polis əməkdaşı öldürülüb. Qurgen Şirinyan isə hələ də saxlanmayıb, onun Ermənistana qaçdığı güman olunur. İyulun 21-də cinayət işləriilə əlaqədar "Vahid Cavax" təşkilatının lideri Vahan Çaxalyan tutulub. O, Gürcüstan Cinayət Məcəlləsinin bir neçə maddəsilə ittiham olunur, istintaq davam edir. Ermənilər isə Gürcüstanın hakimiyyət dairələrini Fransadan olan vəkil Patrik Arabyana maneçilik törətməkdə günahlandırırlar. Prosesin siyasi xarakterli olduğunu əsas gətirərək Avropa Şurasının İnsan Hüquqları üzrə Komissarı Tomas Hammerberqə, "Amnesti İnternational"a müraciət ediblər. Məsələyə Ermənistanın ombudsmanı qarışıb. Bu ərəfədə isə Ermənistan parlamentinin deputatları Gürcüstan hakimiyyət dairələrini ermənilərə qarşı sərt siyasət yürütməkdə, repressiya aparmaqda günahlandırıblar. Hakim Respublika Partiyasının deputatı Şirak Torosyan yanvarın 22-də iki erməninin həbs olunmasına münasibət bildirərək, salahlı dəstə yaratmaqda günahlandırılan şəxslərin günahsız olduqlarını bəyanlayıb, gürcü polisini təhqir edərək aşağılayıb. Onun sözlərinə görə, Gürcüstanın mərkəzi televiziya kanallarının Samtse- Cavahetiyada separatizmin baş qaldırmasıyla bağlı yayımları rəsmi Tiflisin siyasi vulqarlığının nəticəsidir. Erməni deputatının sözlərinə görə, baş verənlərin daha ciddi nəticələri ola bilər və Samtse-Cavahetiyada baş verənlər nəticədə Gürcüstan üçün bumeranqa çevrilər.