Obama Azərbaycana nə verəcək? Dünya mətbuatı bunu araşdırmağa çalışır «Los Angeles Times»: «Demokratiyaya can atan, amma döyülən, həbs edilən, səsləri oğurlanan və sabah ümidlərini itirən insanlara ümid, inam və qətiyyət verməliyik» «Business Week»: «Azərbaycan vətəndaşlarının ABŞ-la bağlı gözləntiləri qulaqardına vurulmamalıdır» «Berliner Zeitung»: «Azərbaycanda demokratlar və müxalifət ABŞ-ın hakimiyyətə sərt təzyiqlər göstərəcəyini düşünməməlidir» Fransanın «L'Express» qəzeti Avropa Birliyinin xarici əlaqələr üzrə komissarı Benita Ferrero-Valdnerin Baıya rəsmi səfərindən bəhs edərək bildirib ki, Avropa nə yolla olursa-olsun, Dağlıq Qarabağ münaqişəsinin dinc yolla nizamlanması prosesində Rusiyanın fəallığının və ən başlıcası, hadisələrə təsir imkanlarının artmasına yol verməməlidir: «Azərbaycanın xarici işlər naziri Elmar Məmmədyarov deyir ki, Dağlıq Qarabağ münaqişəsi regionda stabilliyə və cənub dəhlizinə təhlükədir. O haqlıdır. Əgər Avropa bundan sonra da hadisələri yalançı aktivlik nümayiş etdirməklə seyr edərsə və işini də bununla bitmiş sayarsa, Cənubi Qafqaz bütünlüklə Rusiyanın təsir dairəsinə çevrilə bilər». «Rheinishe Post» hesab edir ki, dünyanın əksər yerlərində olduğu kimi, postsovet məkanında da ABŞ-ın yeni prezidenti Barak Obama ilə bağlı gözləntilər böyükdür: «Həmin ölkələr arasında Azərbaycan da var. Lakin azərbaycanlılar unutmamalıdır ki, Corc Buşdan fərqli olaraq, Barak Obama xarici siyasətlə bağlı ciddi vədlər verməyib. Məsələn, əgər Corc Buş 2005-ci ildə keçirilən prezident seçkilərində demokratiyanı bütün dünyaya yayacağını vəd edirdisə, Barak Obama qarşısında duran əsas məsələnin ABŞ iqtisadiyyatının dirçəldilməsi olduğunu deyir». «Berliner Zeitung» isə əks mövqe tutub: «Kimsə unutmamalıdır ki, Barak Obama ilk öncə demokratdır. İnsan haqları, vətəndaş cəmiyyəti, qlobal insani dəyərlər onun üçün prioritet məsələlərdir. O, Buşdan fərqli olaraq, insan haqları və demokratiya məsələlərində daha həssas, hətta sərt siyasət yürüdəcək. Bununla belə, neft ölkələri kimi, Azərbaycanda da demokratlar və müxalifət ABŞ-ın hakimiyyətə sərt təzyiqlər göstərəcəyini düşünməməlidir. Onlarda belə düşüncə varsa, sadəlövhlükdür. Həyatımızın reallıqlarından biri də Qərbin enerjidaşıyıcılarına və karbohidrogen yataqlarına olan münasibəti, daha doğrusu, asılılığıdır. Belə asılılıq davam etdikcə, Qərbin aparıcı dövlətləri azadlığı məhdudlaşdıran, insan haqlarını pozan, azad və ədalətli seçkilərin keçirilməsini təmin etməyən dövlətlərin volüntarist hakimiyyətlərinə dözəcəklər». «La Stampa»nın fikrincə, Avropa Birliyinin yüksək çinli məmurlarının İrəvan və Bakıya səfərlərinin gerçək məqsədi heç də yalnız Dağlıq Qarabağ münaqişəsinin həlli, bu ölkələrin avrointeqrasiya siyasətlərini gücləndirməyə sövq edilməsi deyil: «Xeyr, cənablar, həqiqət fərqlidir və gerçəkləri söyləməyin vaxtı çatıb. Azərbaycanla Ermənistan münaqişəni dinc danışıqlar, sülh yolu ilə həll etməli, mümkün kompromis yollarını axtarıb tapmalı və ya həmsədrlərin onlara təklif etdikləri variantlardan biri ilə razılaşmalıdırlar». ABŞ-ın yeni prezidenti Barak Obamanın «demokratiya Birləşmiş Ştatların ixrac etdiyi ən yaxşı məhsuldur» ifadəsini xatırladan «Los Angeles Times» hesab edir ki, Vaşinqtonun bütün səylərinə rəğmən, postsovet ölkələrini, xüsusilə də Xəzəryanı dövlətləri demokratiya, insan haqlarına tam riayət, ədalətli seçkilər yoluna çıxarmaq heç də asan olmayacaq: «Həmin ölkələr hesab edirlər ki, biz demokratiyadan danışanda söz oyununa varırıq və onları aldadırıq. O dövlətlər düşünürlər ki, neft, qaz, təbii resurslar, enerjidaşıyıcıları, geostrateji və siyasi maraqlar, regional mənafelər, habelə güc siyasəti Qərbin davranışı şərtləndirən əsas ünsürlərdir. Biz bilirik ki, belə deyil. Amma nə etməli ki, Xəzəryanı dövlətlər bizə inansın, onların demokratik, açıq, azad seçkili və daim inkişaf edən cəmiyyətdə yaşamalarını istədiyimizi bilsinlər?! Çətin sualdır. O suala cavab tapmalı, indi demokratiyaya can atan, amma döyülən, həbs edilən, səsləri oğurlanan və sabah ümidlərini itirən insanlara ümid, inam və qətiyyət verməliyik». «Business Week» ABŞ-ın Misirdə demokratiya tələb edənlərə və azad seçkilərin keçirilməsinə çalışanlara Vaşinqtonun əvvəlcə bol vədlər verməsi, sonra isə onları Hüsni Mübarəkin sivil diktaturasına «keçməsi»ni xatırladaraq bildirir ki, Barak Obamanın administrasiyası insan haqları və demokratiya məsələlərində tənqidlərə varacaq, amma o haqların pozulduğu ölkələrlə də əməkdaşlıq edəcək: «Dünya siyasətində emosiyalara yer qalmayıb, «real siyasət» anlamı hər yerdə ağırlığını göstərməyə başlayıb. Azərbaycan kimi ölkələrlə münasibətlərdə ABŞ düşünülmüş, maraq və mənafelərinin tam təmin olunması ilə müşayiət edilən siyasət yürütməlidir. Bununla yanaşı, Azərbaycan vətəndaşlarının ABŞ-la bağlı gözləntiləri də qulaqardına vurulmamalıdır». Hüseyn BAKUVİ bizimyol