"Azərbaycan Rusiyanın həmsədrlikdən kənarlaşdırılması məsələsini qaldırmalıdır" Teyyub Qənioğlu: "Rusiya Xarici İşlər Nazirliyinin cavabından görünür ki, Moskva öz əməllərindən əl çəkən deyil" Dünən Milli Demokratik Qüvvələr Birliyi (MDQB) Sədrlər Şurasının toplantısı keçirilib. Qərarların icra vəziyyəti qənaətbəxş sayılıb, ölkədəki ictimai-siyasi durum müzakirə olunub. Bu barədə məlumat verən Təkamül Partiyasının sədri Teyyub Qənioğlu dedi ki, Sədrlər Şurası daha çox Qarabağ problemi ətrafında baş verən proseslərə diqqət yetirib. Bir müddət əvvəl Rusiya işğalçı Ermənistana 800 milyon dollar civarında silah və sursat ötürüb. Bununla bağlı məsələ öncəki toplantıda da müzakirə olunb və bəyanat verilib. Azərbaycan hökuməti də məsələyə kifayət qədər ciddi münasibət ortaya qoyub. Teyyub Qənioğlu bildirdi ki, MDQB-ni ən çox narahat edən Rusiya Xarici İşlər Nazirliyinin Azərbaycan Xarici İşlər Nazirliyinin sorğusuna cavabıdır. Silah və sursat ötürüldüyü inkar olunan bu cavab əslində daha çox təhdid xarakterli bir yazışmaya oxşayır. Ramiz Mikayıloğlu Əslində cavabdan şimal qonşumuzun az qala "yaxşı etmişik" jesti duyulur. Həmin cavabda o da yazılıb ki, Rusiya Ermənistanla birgə Kollektiv Təhlükəsizlik Müqaviləsi Təşkilatında təmsil olunur və bu müqaviləyə uyğun olaraq həmin ölkəyə silah verilə bilər: "Yəni cavabdan "əcəb etmişik" mahiyyəti ortaya çıxır. MDQB bunu hiddət doğuran cavab sayır. Biz dəfələrlə vurğulamışıq ki, Azərbaycan torpaqlarının Ermənistanın adıyla Rusiyanın işğal etməsini, Moskvanın İrəvana münasibətini nəzərə alaraq rəsmi Bakı ATƏT-in Minsk qrupunda şimal qonşumuzun həmsədrliyindən imtina etməlidir. Ümumiyyətlə, Minsk qrupundan imtina olunmalıdır. Ən azı Azərbaycan Rusiyanın ATƏT-in Minsk qrupunda həmsədrlikdən kənarlaşdırılması məsələsini qaldırmalıdır. İndi bunun üçün məqam yaranıb". Təkamül Partiyasının sədri xatırlatdı ki, 11 il əvvəl də Rusiya Ermənistana əvəzsiz olaraq 1 milyard dollarlıq silah və sursat ötürüb. İndi də 800 milyon dollarlıq silah və sursat verib. O cümlədən Ermənistan Kollektiv Təhlükəsizlik Müqaviləsi Təşkilatında olduğu üçün Rusiya bu ölkəyə güzəştli qiymətlərlə də silah və sursat satır. Başqa sözlə, Moskva bütün vasitələrlə Ermənistanı silahlandırır. Bu silahların da Azərbaycan ədeyhinə yönəldiyi hər kəsə bəllidir: "Ona görə də Azərbaycan dövləti bu məsələni gündəmə gətirməlidir. Başqa tərəfdən, Türkiyəylə qarşılıqlı hərbi yardım haqqında müqaviləmiz olmaya-olmaya Ermənistan bu ölkənin ATƏT-in Minsk qrupunun həmsədri postunu tutmağa razılıq verməyib. Ermənilər hesab edir ki, Türkiyə Azərbaycana yaxın dövlətdir, kömək edə bilər. Rusiya Ermənistanın əliylə Azərbaycan torpaqlarını işğal etdiyi, müttəfiq olduğu, ermənilərə əvəzsiz bir neçə milyard dollar dəyərində silah və sursat ötürdüyü halda nədən rəsmi Bakı özündə güc tapmır ki, şimal qonşumuzun həmsədrlikdən uzaqlaşdırılmasını gündəmə gətirsin? Bəlkə də əvvəllər müəyyən nüanslara görə bu məsələni qaldırmaq mümkün olmurdu. Amma indi bunun üçün fürsət yaranıb. Rusiya Xarici İşlər Nazirliyinin cavab notasından da belə görünür ki, Moskva öz əməllərindən əl çəkən deyil. Ola bilər ki, Rusiya Gürcüstan variantının oxşarını yaxın gələcəkdə Azərbaycanın üzərində sınaqdan keçirməyə də hazırlaşır". Teyyub Qənioğlu dedi ki, əgər yanvarın 27-də Davosda həmsədrlərin iştirakıyla Azərbaycan və Ermənistan prezidentlərinin görüşü baş tutacaqsa, dövlət başçımız ciddi şəkildə bu məsələni qaldırmalıdır: "Rusiyanın Ermənistanı qeyri-qanuni silahlandırmasını əsas götürüb bu görüşdən imtina etməyin də bir anlamı olar. Atəşkəs rejimi 14 ildən çoxdur ki, hökm sürür, prezidentlər dəfələrlə görüşüblər, heç bir nəticə yoxdur. Növbətçi görüşlər yalnız baş aldatmaqdır. Zaman keçir, Azərbaycanda da, Qarabağda da yeni nəsillər formalaşır. Dünya ictimaiyyəti də məsələyə başqa cür yanaşmaq yolunu tutub. Azərbaycan öz məsələsini özünün həll etmək iqtidarında olduğunu dünya ictimaiyyətinin nəzərinə çatdırmalıdır. Bu məsələni kəskin şəkildə qoymağın zamanı çatıb. Artıq dünyada yalnız gücə stayiş edirlər". Təkamül Partiyasının sədri vurğuladı ki, sülh danışıqlarıyla Qarabağ problemi həllini tapmayacaq. MDQB dəfələrlə bəyanlayıb ki, sülh danışıqları ya Qarabağ ermənilərinin "müstəqilliyinin" tanınması, ya da Ermənistana birləşdirilməsi fonundə hər hansı nəticə verə bilər: "Sülh yolu ayrı bir şeyi vəd etmir. Azərbaycan xalqı da heç vaxt buna getməyəcək. Sözdə deyirik, əməldə bunu etməyin vaxtı çatıb". MDQB-nin Sədrlər Şurasının ötən iclasında müzakirəyə çıxarılmış, Qarabağ probleminin ədalətli həlli prinsiplərini özündə ehtiva edən sənəd növbəti dəfə də diqqət mərkəzində olub. Həmin sənədi MDQB Sədrlər Şurasının üzvü, VAMBP sədri Hacıbaba Əzimov hazırlayıb: "Ötən dəfə sənədi müzakirə etmişdik. Bu iclasda yenidən baxdıq. Hesab etdik ki, artıq sənədi ictimai müzakirəyə çıxarmaq olar. Burada Dağlıq Qarabağ münaqişəsinin baş verməsinin səbəbləri açıqlanır və problemin hansı prinsiplər əsasında həllinin vacibliyi vurğulanır. Bu sənədin partiyalarla, QHT-lərlə birgə müzakirəsini nəzərdə tuturuq. Müzakirə nəticəsində sənədə qoşulacaq partiyaların imzalarıyla onun BMT, ATƏT-ə, Minsk qrupunun həmsədrlərinə, Avropa Şurasına, böyük dövlətlərə, ölkəmizdə fəaliyyət göstərən səfirliklərə göndərilməsini planlaşdırırıq. Fevralın 3-də partiyalarla, QHT-lərlə sənədin müzakirsinə həsr olunacaq dəyirmi masanın keçirilməsi qərarına gəldik. Tədbirin yeri, dəvət olunacaq partiya və QHT-lərlə bağlı da mətbuata məlumat veriləcək. Hesab edirik ki, sənədin indiki formada qəbulu, ora partiyaların qoşulması bir daha Azərbaycan xalqının bu məsələyə münasibətini beynəlxalq ictimaiyyətin diqqətinə çatdıracaq. Bir daha göstərəcək ki, xalqımız torpaqlarının kiməsə bağışlanmasıyla heç vaxt razılaşmayacaq. Sənəddə Dağlıq Qarabağ münaqişəsinin beynəlxalq hüquq normalarına və ədalətə uyğun həlli yolları əksini tapıb".