“TÜRKİYƏ ÖZ TARİXİNDƏ HEÇ VAXT BELƏ TƏHLÜKƏ İLƏ ÜZLƏŞMƏYİB” MHP millət vəkili Atilla Kaya “Ergenekon” işi ilə bağlı “Yeni Müsavat”a danışdı Türkiyə gündəmi neçə vaxtdır dalğa-dalğa həyata keçirilən “Ergenekon” həbsləri ilə məşğuldur. Aralarında ordu generalları, PKK-ya qarşı mübarizəyə rəhbərlik edən nüfuzlu zabitlər də olmaqla çoxlu sayda tanınmış insan həbsdədir. Neçə vaxtdır Azərbaycanda da yaxından izlənən bu proseslərlə bağlı Türkiyənin Milliyyətçi Hərəkat Partiyasının sədr müavini, millət vəkili, Azərbaycanda çoxlarının tanıdığı Atilla Kaya ilə telefon vasitəsilə söhbətləşdik. - Atilla bəy, iki ilə yaxındır Türkiyə gündəmini məşğul edən “Ergenekon” işi ilə bağlı MHP-nin yanaşması necədir? Sizin partiya baş verənləri necə qiymətləndirir və bu prosesin sonunu necə görür? - Türkiyənin hüquq sisteminin prinsipi belədir ki, əgər hər hansı iddia ilə bağlı qanuni proses başlayıbsa və iş məhkəməyə çıxıbsa o zaman bununla bağlı hər hansı şərh vermək, qiymətləndirmələr aparmaq qanunlara ziddir. Yekunda qərarı türk məhkəmələri verməli və hər kəs də bu qərara hörmətlə yanaşmalıdır. “Ergenekon” işi ilə bağlı da bu cür olmalıydı. Lakin olmadı. Bir halda ki, ölkənin baş naziri bu davanın prokuroru olduğunu ictimaiyyət qarşısında deyir, o zaman qanuni prosesə hansı hörmətdən danışmaq olar? Baş nazir bunu edirsə, deməli prosesə müdaxilə edir və qanun pozulur. Digər tərəfdən, bu hadisələr Türkiyə cəmiyyətində ciddi parçalanmalara, qütbləşmələrə də yol açdı. Belə görüntü var ki, bütün bu proses sanki AKP-yə müxalif olanların zərərsizləşdirilməsi məqsədini daşıyır. MHP-nin mövqeyinə görə, əgər keçmişdə və ya indidə dövlətə xidmət edən, vəzifələr tutan şəxslərin əməllərində hansısa qanunsuzluqlar olubsa bunun üzərinə gedilməlidir. Hər kəs qanun qarşısında bərabərdir və etdiyi əmələ görə cavab verməlidir. Bir şərtlə ki, yuxarıda dediyim kimi, qanuni prosesə müdaxilə edilməsin və məhkəməyə təzyiq olmasın. MHP olaraq biz Türkiyədə iqtidarların hər hansı qeyri-demokratik, zorakı yollarla dəyişdirilməsinə qarşıyıq və inanırıq ki, iqtidarlar millətin səsləri ilə hakimiyyət başına gəlməli, millətin səsləri ilə də getməlidir. - Sizin də dediyiniz kimi belə fikirlər formalaşır ki, bütün bu həbslər, müxtəlif yönlü kampaniya sanki AKP-yə müxalifətdə olanları zərərsizləşdirmək, Atatürk cümhuriyyətinin təməl prinsiplərini müdafiə edənləri zəiflətmək məqsədi daşıyır. Saxlanılanların siyahısına nəzər salsaq orada vaxtilə PKK terroruna qarşı ciddi mübarizə aparmış nüfuzlu şəxsləri, habelə cümhuriyyət prinsiplərinin müdafiəçilərini, atatürkçüləri görmək olar. Bütün bunlar Atatürk cümhuriyyətinə təhlükə yaratmırmı? - Əlbəttə, belə təhlükə var. Hətta deyərdim ki, bu təhlükə çox böyükdür. Türkiyə öz tarixi boyu heç vaxt indiki kimi açıq və böyük təhlükə qarşısında qalmamışdı. Bu təhlükə içəridən və xaricdən qaynaqlanır. Ölkədə heç vaxt mümkün görünməyən hadisələr baş verir. Türkiyə Cümhuriyyəti tarixinin ən çətin dönəmini keçirməkdədir. Elə vəziyyət yaranıb ki, özünü “ziyalı” kimi təqdim edən bir qrup qalxıb ermənilərdən üzr istəmək üçün kampaniya başladır. O biri tərəfdən PKK-nın siyasi uzantısı olan partiyadan seçilən bələdiyyə başqanları açıq-aşkar Türkiyə Cümhuriyyətinin bölünməz bütövlüyünə yönələn təhdidlər səsləndirir, “Kürdüstan”dan bəhs edir. Təbii ki, bütün bunların baş verməsində ölkədə iş başında olan AKP iqtidarının təslimçi siyasətinin rolu var. Cümhuriyyəti sarsıtmağa çalışanlar bu siyasətdən ruhlanır, şirniklənir. “Ergenekon” işi ilə bağlı baş verənlər isə ciddi şübhələrə yol açmaqdadır. Gəlin baxaq, bir çox nüfuzlu insanlar şübhəli adı altında, alçaldıcı formada prokurorun əmri ilə yaxalanır, ancaq iki gün sonra elə həmin prokurorun əmri ilə buraxılır. Sual yaranır: əgər bu şəxslərin haqqında ciddi dəlil varsa o zaman nədən buraxılır? Təhlükə yox idisə nədən o cür alçaldıcı formada, cinayətkar və terrorçu kimi yaxalanırdılar? Bəlkə məqsəd onları ictimaiyyətin gözündə aşağılamaq idi? Bu suallara cavab verilməlidir. - Bir çox yerli və xarici təhlilçilərə görə Atatürk Cümhuriyyətinin qoruyucusu olaraq bilinən Silahlı Qüvvələr heç vaxt olmamış kimi nüfuzdan salınır və zəiflədilir. Ona görə də hesab edilir ki, ordu proseslərin bu cür davam etməsinə dözməz və müdaxilə edər, hətta çevriliş həyat keçirər. Bu mümkündürmü və ümumiyyətlə siz baş verənlərə ordunun yanaşmasını necə qiymətləndirirsiniz? - Türkiyə yalnız 1950-ci illərdə çoxpartiyalı demokratik sistemə keçib. 60-cı, 70-ci, 80-ci illərdə ordu çevriliş həyata keçirib, 28 fevral mərhələsi deyilən proses yaşanıb. Amma sübut olundu ki, bu müdaxilələrin heç bir xeyri olmayıb. Çevrilişlər Türkiyəni daha da geriyə salıb. Ona görə də iqtidarların demokratik yolla dəyişməsi ən düzgün yoldur. MHP olaraq biz hər zaman antidemokratik yollara qarşı çıxmışıq və bu gün də həmin mövqedəyik. O ki, qaldı ordunun nüfuzdan salınması kampaniyasına, Silahlı Qüvvələr bu gün Türkiyədə ən çox etibar edilən qurumdur. Bunu ictimai rəy sorğuları da sübut edir. Hər bir dövlət qurumunun, o cümlədən ordunun içərisindən bir sıra qanunsuz əməllərə yol vermiş şəxslər çıxa bilər. Ancaq belələrinin əməllərinə görə bütöv bir qurumun nüfuzdan salınması düzgün deyil. Yəni bu gün keçmişdə və ya indidə Silahlı Qüvvələrdə xidmət edərkən kimlərsə hansısa əməllərə yol veribsə, bunlar bütövükdə orduya aid edilə bilməz. - “Ergenekon” işi ilə bağlı Türkiyənin bəzi media orqanlarında yer alan iddialarda son vaxtlar tez-tez Azərbaycanın da adı çəkilir. İddia edilir ki, bu təşkilatın bir qolu da Azərbaycanda olub. Siz Azərbaycanı kifayət qədər tanıyan biri kimi bu iddialarla bağlı nə deyərdiniz? - Əvvəlcə gəlin baxaq görək “Ergenekon” adında bir qurum varmı və ya olubmu? Şəxsən mənim buna şübhəm var. Əlbəttə ki, bütün iddialara məhkəmə cavab verməlidir. Azərbaycana gəldikdə isə mən bu ölkəni tanıyan biri kimi səslənən iddialara inanmıram. Bir daha deyirəm ki, bu istintaqa inamı azaldan işlər baş verir, mətbuatda davamlı olaraq saysız-hesabsız iddialar yer alır, şübhəli hesab edilən şəxs yaxalanıb istintaqa ifadə verir, cəmi bir neçə saat sonra onun ifadələrinin tam mətni bəlli media qurumlarına ötürülür. Bu isə sanki kimlərinsə istintaqı bəlli hədəfə yönləndirməyə çalışdığını göstərir. İnanıram ki, sonda Türkiyə məhkəməsi öz sözünü deyəcək və kimin günahkar olduğu, kimin olmadığı üzə çıxacaq. Fərhad MƏMMƏDOV musavat