«HƏMAS» Türkiyənin vasitəçiliyini qəbul etdi Yaralı fələstinlilər Ankaraya gətirildi İsrail ordusu Qəzza zolağının cənubunda yerləşən 3 rayonunda mövqelərini möhkəmləndirərək əraziləri aramsız bombardman edir. İsrail tankları ilk dəfə olaraq Tal əl-Hava, əş-Şeyx Ajlin və Zeytun rayonlarına daxil olub. Quru qoşunlarının ərazi üzrə hərəkəti havadan aviasiya dəstəyi ilə təmin olunub. APA-nın məlumatına görə, əməliyyata rəhbərlik edən briqada generalı Eyyal Eyzenberq mühasirə çevrəsinin daraldığını bildirib. İsrail ordusu Qəzza zolağında keçirdiyi hərbi əməliyyat nəticəsində 900 fələstinlinin öldürüldüyünü açıqlayıb. Komandanlıq öldürülən şəxslərin 650 nəfərinin «HƏMAS» döyüşçüsü olduğunu bildirib. Bu rəqəmlər Fələstin tərəfinin açıqladığı rəqəmlərlə üst-üstə düşür. Fələstin mənbələri öldürülən şəxslərin 277 nəfərinin azyaşlı uşaq olduğunu bəyan edib. Ümumilikdə əməliyyat zamanı yaralananların sayı 4 min nəfərdən artıqdır. Hazırda döyüşlər Qəzza zolağının mərkəzində gedir. Dünən İsrail ordusu 25 hədəfə zərbə endirib. Zərbələr nəticəsində bir neçə yeraltı tunel dağıdılıb və “Kassam” raketlərinin olduğu anbar ələ keçirilib. «HƏMAS» liderindən absurd bəyanat Qəzza zolağında fəaliyyət göstərən «HƏMAS» hökumətinin rəhbəri İsmayıl Haniyə İsrail üzərində tezliklə qələbə qazanılacağını bildirib. İsmayıl Xaniyə fələstinlilərin axan qanının qisasının artıqlaması ilə alınacağını və İsrail ordusunun «HƏMAS»-ın müqavimətini sındıra bilməyəcəyini deyib. İsrail hərbçisi Qəzza zolağında keçirilən əməliyyatda iştirakdan imtina edib İsrailin Qəzza zolağında həyata keçirdiyi əməliyyatlarda iştirakdan boyun qaçıran ehtiyatda olan hərbçi tribunalın hökmü ilə iki həftə müddətinə azadlıqdan məhrum edilib. 35 yaşlı ehtiyatda olan hərbçi Tseelim hərbi bazasındakı mühəndis qoşunlarının tərkibində təlim keçib. Onun xidmət keçdiyi hərbi birləşmənin Qəzza zolağına daxil olmasına əmr verilən zaman hərbçi əməliyyatda iştirakdan imtina edib. Hərbçi bəyan edib ki, bu əməliyyatı qanunsuz hesab etdiyi üçün ona qatılmaq niyyətində deyil. «HƏMAS» Qəzzada Türkiyə hərbi kontingentinin yerləşdirilməsinə razı olduğunu açıqlayıb «HƏMAS» Hərəkatının rəhbərliyi Qəzza sektorunda Türkiyə sülhməramlılarının yerləşdirilməsinə razıdırBunu Londonda ərəb dilində nəşr olunan “Əl-Həyat” qəzeti yazıb. Adı açıqlanmayan «HƏMAS» rəhbərlərindən biri qəzetə “Türkiyə Silahlı Qüvvələrinin Qəzza zolağı sərhədində yerləşdirilməsinə etiraz etmirik” deyib. Amma təşkilat yalnız Qəzzanın mühasirəsinin aradan qaldırılması və bütün nəzarət-buraxılış məntəqələrinin açılması şərti ilə türk kontingentini qəbul etməyə hazırdır. Xatırladaq ki, Türkiyənin baş naziri Rəcəb Tayyib Ərdoğan bu yaxınlarda Suriyaya səfəri zamanı «HƏMAS»-ın Siyasi Bürosunun sədri Xalid Maşalla görüşüb. Bir qrup yaralı fələstinli müalicə məqsədilə Türkiyəyə gətirilib İsrailin hücumları zamanı yaralanan bir qrup fələstinli müalicə məqsədilə Türkiyəyə gətirilib. Türkiyə hökumətinin Misirə göndərdiyi təyyarə 10 yaralını və onları müşayiət edən şəxsləri Ankaraya gətirib. Təyyarədə olan türkiyəli həkimlər yaralılara ilkin tibbi yardım göstəriblər. Vəziyyəti ağır olan fələstinlilər Ankaradakı Atatürk Araşdırma Xəstəxanasına aparılıb. Qəzzada baş verənlərə Türkiyə vətəndaşı özünü yandırdı Türkiyənin İstanbul şəhərinin mərkəzində - Taksim meydanında bir nəfər İsrailin Fələstində keçirdiyi hərbi əməliyyata etiraz əlaməti olaraq özünü yandırıb. Gümüşhanə bölgəsindən İstanbula gələn 62 yaşlı İbrahim Ulucan boynundan İsrail əleyhinə şüarlar yazılmış kağızlar asaraq yerli vaxtla saat 14.30-da Taksim meydanına yollanıb. Burada o, üstünə benzin tökərək özünə od vurub. Ətrafdakı vətəndaşların və polis əməkdaşlarının təcili müdaxiləsi ilə yanğını tezliklə söndürmək mümkün olub. Əlində, üzündə və dizlərində yanıq yaraları olan İ.Ulucan polis tərəfindən yaxınlıqdakı xəstəxanaya aparılıb. İ.Ulucan avtomobilə mindirilərkən “Fələstin yandı. Mən yansam, nə olacaq ki?!” deyə qışqırıb.