"Ermənistan uçurumun astanasındadır" Ölkənin sabiq baş naziri erməniləri gözləyən fəlakətdən danışır Separatçı rejimin təmsilçisi: "Dağlıq Qarabağ nəinki danışıqlarda tərəf deyil, hətta faktor kimi də əhəmiyyətini itirib" Ermənistan iqtisadiyyatı iflasın son mərhələsinə yaxınlaşır və ölkədə baş verənlərin beynəlxalq maliyyə böhranıyla heç bir ciddi bağlılığı yoxdur. Bu sözləri "A1+" internet qəzetinə müsahibəsində Ermənistanın sabiq baş naziri Qrant Baqratyan deyib. Rəsmi məlumatlara istinad edən sabiq baş nazir bildirib ki, ötən il Ermənistanda ÜDM-in həcmi 2007-ci illə müqayisədə 45 faiz azalıb: "Biz 2008-ci ili 1 milyad dollarlıq ixracla başa vurduq. Bu isə hətta 1996-cı illə müqayisədə kifayət qədər aşağı göstəricidir. Hazırda isə ölkə ixrac qabiliyyəti demək olar ki, yox dərəcəsindədir. Biz bir millət kimi məhsul istehsal etmək və satmaq iqtidarında deyilik. Ona görə də mövcud hakimiyyət xalqa xidmət səhəsilə bağlı nağıllar danışır". Azər Beynəlxalq maliyyə böhranının Ermənistan iqtisadiyyatına hətta cüzi təsirinin də olmadığını bildirən Qrant Baqratyanın sözlərinə görə, onun ölkəsində struktur böhranı baş verir: "Beynəlxalq maliyyə böhranı Ermənistan iqtisadiyyatında baş verən iflas prosesinin üzə çıxmasına zəmin yaradıb. Müqayisə üçün deyirəm: Ötən il Fransada ÜDM-in həcmi cəmi 1 faiz aşağı düşüb. Ümumiyyətlə isə Avropada 2008-ci ildə infilyasiya ən aşağı səviyyədə (1,5 faiz) olub. Ermənistanda isə son on ilin ən yüksək infilyasiyası baş verib". Ötən il Ermənistandan 1 milyard dollardan artıq vəsaitin çıxarıldığını deyən eks baş nazir ölkəyə daxil olan vəsaitlərin bundan xeyli az olduğunu deyib. Onun proqnozlarına görə, 2009-cu ildə dramın (Ermənistanın milli valyutası-red.) dəyərdən düşməsi prosesi sürətlənəcək: "Hakimiyyət isə onsuz da kifayət qədər az olan valyuta ehtiyatlarını dramın kursunun saxlanmasına sərf edəcək ki, bu da miqtisadiyyatın ölümü ilə nəticələnə bilər. Hazırda ölkədə dağ-mədən metallurgiyası, zərgərlik sahəsindəki müəssisələr tamamilə fəaliyyətlərini dayandırıblar. Konyak istehsalı isə getdikdə aşağı düşür". Onu da qeyd edək ki, Ermənistan iqtisadiyyatında baş verən böhranlı vəziyyət, təcavüzkar ölkənin himayəsində olan Dağlıq Qarabağın separatçı rejiminə də təsir göstərib. Belə ki, qondarma rejimin təmsilçiləri artıq rəsmi İrəvana "buynuz" göstərməkdən də çəkinmirlər. Eyni proses işğal olunmuş Azərbaycan ərazilərində yaşayan və məskunlaşdırılan etnik ermənilər və hərbi-cinayətkar xunta arasında da gedir. Qondarma rejiminin sabiq rəhbərlərindən biri olan Manvel Sarqsyan dünən İrəvanda keçirdiyi mətbuat konfransında deyib ki, "Dağlıq Qarabağ əhalisi" hərbi birləşmələrin təzyiqləri altında əzilməkdədir: "Əhalinin alternativ informasiya əldə etmək, həqiqəti bilmək imkanları yoxdur. Onlar hərbi qrupların girovuna çevriliblər". Sarqsyan Dağlıq Qarabağ rejiminin nə zamansa münaqişənin tənzimlənməsində tərəf kimi danışıqlara cəlb edilə biləcəyini də mümkünsüz sayır: "Dağlıq Qarabağ nəinki danışıqlarda tərəf deyil, hətta faktor kimi də əhəmiyyətini itirib".