“ERGENEKON”çu ORDU GENERALLARININ BİRİ BURAXILDI Məhkəmə Milli Təhlükəsizlik Şurasının keçmiş katibi Tuncer Kılıcın həbsinə əsas görməyib Türkiyədə “Ergenekon” əməliyyatı ilə bağlı proseslər gərgin olaraq qalır. Ötən həftə aralarında iki ordu generalı, bir neçə polkovnik və digər orta rütbəli zabitlər də olmaqla həbs edilən 40-a yaxın adam qruplar halında məhkəmə qarşısına çıxarılıb. Son iki gündə məhkəmə saxlanılanlardan 13-ü haqda həbs qərarı çıxarıb. Onlara qarşı “Ergenekon” terror təşkilatına üzv olmaq ittihamı irəli sürülüb. Həbs qərarı çıxarılanlar arasında xüsusi təyinatlı polisin keçmiş komandiri İbrahim Şahin də var. İstefada olan ordu generalı, Milli Təhlükəsizlik Şurasının keçmiş katibi Tuncer Kılıc da daxil olmaqla 8 nəfər isə azadlığa buraxılıb. Məhkəmə onların barəsində irəli sürülən ittihamların araşdırılması müddətində həbsdə saxlanmasına ehtiyac görməyib. Məhkəmə Türkiyənin Yedditəpə Universitetinin professoru Bədrəddin Dalanın oğlu Barış Dalanı da azad edib. Xatırladaq ki, Dalanın evində axtarış aparılıb, lakin professor özü ABŞ-da olduğu üçün həsb edilməyib. Dünən İstanbul əmniyyəti “Ergenekon” əməliyyatının son dalğasında həbs edilənlərə aid silah-sursatın sərgisini təşkil edib. Sakarya, Ankara və digər bölgələrdə ələ keçirilən silahlar arasında 22 əl qumbarası, çoxlu sayda avtomat silah, müxtəlif tip tapançalar, raket qurğusu və digər silahlar var. Silah-sursatın əhəmiyyətli hissəsinin quru qoşunlarının komandanlığında xidmət edən polkovnik Mustafa Dönməzə aid olduğu bildirilir. Onun Sakaryadakı evində aparılan axtarış zamanı “Kalaşnikov” avtomatları, onlara aid daraqlar, durbinlər və digər ləvazimat tapılıb. İddialara görə, polkovnikin “Ergenekon” əməliyyatında həbs edilən general Vəli Kiçiklə və İbrahim Şahinlə bağlantıları var. Bu arada İ.Şahin məhkəməyə ifadəsində bildirib ki, “Ergenekon” terror təşkilatının məqsəd və niyyətlərinə uyğun təşkilat qurub idarə etməkdə günahlandırılır. O özünə qarşı bütün ittihamları rədd edib və evinin yaxınlığındakı meşədən tapılan silah-sursatla heç bir bağlılığı olmadığını deyib. İ.Şahin bildirib ki, əgər silah gizlətmək niyyəti olsaydı, onları daha etibarlı yerdə saxlayardı. Keçmiş xüsusi təyinatlı polis komandiri evində tapılan sui-qəsdə məruz qalacaq adamların siyahısının da ona aid olmadığını deyib. Mətbuat yazır ki, bu siyahıda Türkiyə ermənilərinin keşişi Mesrop Mutafyanın da adı var. Baş nazir Rəcəb Tayyib Ərdoğan dünən həbslərə münasibət bildirib. Müxalifətin hökuməti ölkədə qorxu imperatorluğu yaratmaq istəməkdə tənqid etməsinə cavab olaraq Ərdoğan deyib ki, kimlərin belə imperatorluq qurduğu son həbslərlə bir daha üzə çıxıb. Onun sözlərinə görə, Türkiyə artıq əvvəlki Türkiyə deyil: “Heç kim özünü qanunlardan yüksəkdə saymasın. Ana müxalifət partiyası və bəzi media qurumlarının nədən təşvişə düşdüyünü anlamıram. Əksi isbat edilənə qədər hər kəs günahsızdır. Ancaq hakimlər də vəzifələrində müstəqildir. Heç kim məhkəməyə müdaxilə edə bilməz. Silahların, planların quyulardan necə çıxdığını bilirik”.