YENİ HƏRƏKATIN ADI NƏDİR? TƏSİSÇİLƏR MÜXTƏLİF VARİANTLAR SƏSLƏNDİRİR Müsavat, Xalq Cəbhəsi, Liberal, Vətəndaş və İnkişaf, Demokrat, Ümid partiyaları, Azərbaycan Naminə İctimai Forum, Sülh və Demokratiya İnstitutu, Dini Etiqad və Vicdan Azadlıqlarını Müdafiə Mərkəzi və başqa vətəndaş cəmiyyəti qurumlarının yanvarın 9-da elan etdiyi hərəkatın adı kütləvi informasiya vasitələrində müxtəlif cür təqdim olunur: Respublika və Qarabağ Uğrunda Vətəndaş Hərəkatı, Qarabağ və Respublika Uğrunda Vətəndaş Hərəkatı, Qarabağ və Demokratik Respublika Uğrunda İctimai Hərəkat, Qarabağ və Respublika Hərəkatı və s. «Media forum» saytı təşkilatın adını dəqiqləşdirmək üçün qurumun təsisçilərinə müraciət edib. Müsavat Partiyasının başqanı İsa Qəmbər bildirib ki, hərəkatın yaranması siyasi qərardır: «Yaxın günlərdə qurumun əsasnaməsi hazırlanıb müzakirəyə çıxarılacaq və hərəkatın adı ilə bağlı çoxvariantlılıq aradan qaldırılacaq. Adla bağlı hər hansı ciddi fikir ayrılığı yox idi. Sadəcə, toplantı işitrakçılarının yadında ad müxtəlif cür qala bilər. Mənim yadımda «Media forum»un istifadə etdiyi variant qalıb – Respublika və Qarabağ Uğrunda Vətəndaş Hərəkatı». Azərbaycan Naminə İctimai Forumun prezidenti Eldar Namazovun sözlərinə görə, təsis toplantısında həm respublika quruluşu, həm də Qarabağın müdafiəsinə yönəlik hərəkatın yaranması razılığına gəlinib: «Təsisçilərin məramı bu adda öz əksini tapmalıdır. Ola bilər ki, tədbiri işıqlandıran jurnalistlər adı müxtəlif cür ifadə edirlər, ya «respublika», ya da «Qarabağ» sözünü önə çıxarırlar. Ancaq hərəkatın rəsmi sənədləri hazırlananda və referendum üçün təşəbbüs qrupu adından Mərkəzi Seçki Komissiyasına müraciət ünvanlananda bu cür xırda məsələlər həllini tapacaq». Ümid Partiyasının sədri İqbal Ağazadə isə bildirib ki, qurumun adı Qarabağ və Respublika Uğrunda Vətəndaş Hərəkatıdır. Demokrat Partiyasının lideri Sərdar Cəlaloğlu deyib ki, qurumun razılaşdırılmış adı belədir: «Respublika və Qarabağ Uğrunda Vətəndaş Hərəkatı». Son qərarın belə olduğunu deyən partiya sədri martın 18-də keçirilməsi nəzərə tutulan referendumda daha çox sual doğuran iki məqamın olduğunu vurğulayıb: «Bunlarından biri respublika quruluşunun mahiyyətini zəiflədən maddə, yəni bir nəfərin təkrarən iki dəfədən artıq seçilməsinə qoyulan qadağanın götürülməsidir. İkincisi, prezidentə Azərbaycan qanunlarından fərqli qaydaları nəzərdə tutan hökumətlərarası müqavilələri təsdiq və ya ləğv etmək səlahiyyəti verilməsi məsələsidir ki, bu zaman Qarabağın taleyi narahatlıq doğurur. Ona görə hər iki ifadə referenduma qarşı çıxan qüvvələri bir araya gətirən hərəkatın adında öz əksini tapıb». «Media forum»