Mahmud Kərimov: «Dünya Azərbaycanlılarının İkinci Qurultayı Azərbaycan diasporu tarixində yeni mərhələnin əsasını qoyub» Bakıda Dünya Azərbaycanlılarının Əlaqələndirmə Şurasının iclası öz işinə başlayıb Bu gün Bakıda Dünya Azərbaycanlılarının Əlaqələndirmə Şurasının iclası öz işinə başlayıb. Tədbiri açan şuranın idarə heyətinin sədri Mahmud Kərimov bildirib ki, Dünya Azərbaycanlılarının İkinci Qurultayı Azərbaycan diasporu tarixində yeni mərhələnin əsasını qoyub. O qeyd edib ki, ikinci qurultaydan sonra xarici ölkələrdə yaşayan azərbaycanlıların təşkilatlanması geniş vüsət alıb, onların ictimai siyasi həyatda iştirakı yüksəlib. M.Kərimov qeyd edib ki, toplantıya şura üzvlərindən əlavə, dünyanın 17 ölkəsindən nüfuzlu azərbaycanlı icma və birlik rəhbərləri, həmçinin türk və yəhudi icmalarının nümayəndələrindən ibarət 39 qonaq dəvət oulnub. Açılış nitqindən sonra Azərbaycanın dövlət himni səsləndirilib. Heydər Əliyevin xatirəsi bir dəqiqəlik sükutla yad edilib. Heydər Əliyevin dünya azərbaycanlılarının həmrəyliyi sahəsində fəaliyyətinə həsr olunmuş «Ayrılarmı könül candan» filmi nümayiş etdirilib. Daha sonra təşkilat komitəsinin sədri Dünya Azərbaycanlılarının Əlaqələndirmə Şurasının idarə heyətinin üzvü Nazim İbrahimov çıxış edib. O da Dünya Azərbaycanlılarının İkinci Qurultayının nəticələrini yüksək qiymətləndirib və bildirib ki, qurultay azərbaycanlıların yaşadıqları ölkələrdə ictimai mövqelərinin möhkəmlənməsinə xidmət edir. Nazim İbrahimov qeyd edib ki, Azərbaycan icmaları fəaliyyət göstərdikləri ölkələrin ictimai-siyasi həyatında fəal çıxış etməyə çalışır, siyasi partiya və təşkilatlarla əlaqələr qurur. Prezident Aparatı ictimai-siyasi əlaqələr şöbəsinin rəhbəri Əli Həsənov isə bildirib ki, Heydər Əliyevin qəlbində olan dünya azərbaycanlılarının birliyi ideyası dünya azərbaycanlılarının təşkilatlanmasına və diaspora işinin başlanmasına təkan verdi: «1991-ci il dekabrın 16-da Heydər Əliyev Naxçıvan Muxtar Respublikasında dünya azərbaycanlılarının birlik ideyasını dövlət siyasəti səviyyəsinə qaldırdı. O vaxtdan başlayaraq dünya azərbaycanlılarının birlik ideyası gündəmə gəlib. 31 dekabr dünya azərbaycanlılarının həmrəylik günü qeyd olunmağa başlayıb. 2001-ci ildə dünya azərbaycanlılarının ilk tarixi qurultayı keçirilib. Dünya azərbaycanlılarının təşkilatlanmasının 15 ilə yaxın tarixi var. Dövlət siyasəti bu sahədə olmasaydı, buna nail olmaq olmazdı. Dünya azərbaycanlılarının birləşdirilməsi ideyası əsasında 40 milyondan çox azərbaycanlı birləşib. Bu, o qədər də asan iş deyil. Bu gün biz arxayınçılıqla deyə bilərik ki, Azərbaycan diasporu mövcuddur və bunların qarşısında Azərbaycanla bağlı qlobal işləri görmək vəzifəsi qoyulub». Daha sonra tədbirdə idarə heyətinin üzvü Tomris Azəri və Milli Məclisin spiker müavini Bahar Muradova çıxış edib. Birinci hissənin bir qədər sonra yekunlaşması gözlənilir. İkinci hissədə isə Dünya Azərbaycanlılarının Həmrəylik Xartiyasının layihəsi müzakirə ediləcək. Sənədin əsas məqsədi diasporun qarşısında duran vəzifələri müəyyənləşdirmək, Azərbaycan lobbiçiliyini qurmaq, xarici ölkələrdə yaşayan azərbaycanlıların sosial, mənəvi, iqtisadi fəaliyyətinə dəstək vermək, eyni zamanda Azərbaycan həqiqətlərini dünyaya çatdırmasında diasporun fəaliyyət istiqamətlərini müəyyən etməkdir. Xaricdəki Azərbaycan cəmiyyətlərinin nümayəndələri bu sənədin qəbuluna böyük ümidlər bəsləyir. Anar Məmmədov /ANS PRESS/